Read Tunisian Arabic New Testament فِلِيمُونْ 1 Bible Online

فِلِيمُونْ 1 - Tunisian Arabic New Testament bible

فِلِيمُونْ 1

¹مِنْ بُولُسْ، المَرْبُوطْ فِي الحَبْسْ عْلَى خَاطِرْ المَسِيحْ يَسُوعْ وْمِالأَخْ تِيمُوثَاوُسْ لْفِلِيمُونْ المَحْبُوبْ وِشْرِيكْنَا فِي الخِدْمَة

²وِلْأُخْتْنَا أَبْفِيَّة وْأَرْخِبُّوسْ الِّي يْجَاهِدْ مْعَانَا وْلِلكَنِيسَة الِّي فِي دَارِكْ.

³نِعْمَة وْسَلاَمْ لِيكُمْ مِنْ عِنْدْ اللهْ بُونَا وِالرَّبْ يَسُوعْ المَسِيحْ.

⁴آنَا دِيمَا نُشْكُرْ اللهْ فِي كُلْ مَرَّة نِتْذَكّْرِكْ فِي صْلاَتِي

⁵عَلِّي سْمَعْتُو عْلَى مْحَبّْتِكْ لِلقِدِّيسِينْ الكُلْ وْإِيمَانِكْ بِالرَّبْ يَسُوعْ.

⁶بَاشْ الإِيمَانْ الِّي تَحْكِي عْلِيهْ لِلأُخْرِينْ يْكُونْ قَادِرْ عْلَى إِنُّو يْظَهِّرْ الحَاجَاتْ البَاهْيَة الكُلْ الِّي عِنْدْنَا عْلَى خَاطِرْ المَسِيحْ.

⁷عْلَى خَاطْرِكْ فَرَّحْتْنِي وْشَجِّعْتْنِي بَرْشَة بِمْحَبّْتِكْ. يَا خُويَا رَاكْ عَزِّيتْ قْلُوبْ القِدِّيسِينْ.

⁸رَغْمِلِّي عِنْدِي ثِيقَة فِي المَسِيحْ إِنِّي انَّجِّمْ نُأْمْرِكْ بَاشْ تَعْمِلْ الشَّيْء الِّي يِلْزِمْ

⁹آنَا نُطْلُبْ مِنِّكْ بْإِسْمْ المْحَبَّة وِبْصِيفْتِي آنَا بُولُسْ رَاجِلْ كْبِيرْ وْمَرْبُوطْ فِي الحَبْسْ عْلَى خَاطِرْ يَسُوعْ المَسِيحْ

¹⁰نْأَكِّدْ عْلِيكْ فِيمَا يْخُصْ وِلْدِي أُونُسِيمُوسْ الِّي وَلَّى وِلْدِي وْآنَا مَرْبُوطْ بِالسْلاَسِلْ

¹¹الِّي قْبَلْ مَا كَانِتْشْ فِيهْ فَايْدَة لِيكْ. آمَا تَوَّا وَلاَّتْ فِيهْ فَايْدَة لِيكْ وْلِيَّ.

¹²آنَا بْعَثْتْهُولِكْ وْهُوَ رَاهُو قَلْبِي.

¹³وْآنَا حَبِّيتْ تْخَلِّيهْ بِحْذَايَا بَاشْ يِخْدِمْنِي فِي عُوضِكْ وْآنَا مَرْبُوطْ عْلَى خَاطِرْ الإِنْجِيلْ

¹⁴آمَا مَا حَبِّيتِشْ نَعْمِلْ حَتَّى شَيْء مِنْ غِيرْ مَا نَاخُذْ رَايِكْ بَاشْ تَعْمِلْ البَاهِي بْإِرَادْتِكْ مُوشْ عْلَى خَاطْرُو وَاجِبْ عْلِيكْ

¹⁵مُمْكِنْ هَاذَاكَا عْلاَشْ بْعِدْ عْلِيكْ مُدَّة قْصِيرَة بَاشْ يَرْجِعْلِكْ عْلَى طُولْ.

¹⁶مُوشْ كِيمَا عَبْدْ آمَا خِيرْ مِنْ عَبْدْ. كِيفْ خُو مَحْبُوبْ. بِالأَخَصْ عِنْدِي آنَا فَمَا بَالِكْ عِنْدِكْ إِنْتِ. فِي الدِّنْيَا وْفِي الرَّبْ.

¹⁷إِذَا كُنْتْ تِحْسِبْنِي شْرِيكِكْ إِقْبْلُو كِيمَا تِقْبِلْنِي آنَا.

¹⁸وْإِذَا كَانْ عْمَلِّكْ حَاجَة خَايْبَة وِلاَّ مَدْيُونْ لِيكْ بْحَاجَة إِحْسِبْهَا دِينْ عْلِيَّ آنَا

¹⁹وْآنَا بُولُسْ نِكْتِبْلِكْ بْخَطْ يِدِّي: آنَا نْخَلّْصِكْ. وْمُوشْ لاَزِمْ نْذَكّْرِكْ الِّي إِنْتِ مَدْيُونْ لِيَّا بِحْيَاتِكْ

²⁰هَاذَاكَا عْلاَشْ يَا خُويَا نُطْلُبْ مِنِّكْ بَاشْ تَعْمِلْ عْلِيَّ مْزِيَّهْ وِتْرَتِّحْ قَلْبِي فِي المَسِيحْ.

²¹كْتِبْتْلِكْ الجْوَابْ هَاذَا وْآنَا وَاثِقْ الِّي إِنْتِ اطِّيعْنِي وْعَارِفْ الِّي إِنْتِ بَاشْ تَعْمِلْ أَكْثِرْ مِلِّي نُطْلْبُو مِنِّكْ.

²²وْمَا ذَابِيَّ تْحَضَّرْلِي بِيتْ وْنِتْمَنَّى إِنِّي نَرْجْعِلْكُمْ بِسْبَبْ صَلَوَاتْكُمْ.

²³يْسَلِّمْ عْلِيكُمْ أَبَفْرَاسْ المَرْبُوطْ مْعَايَ فِي الحَبْسْ عْلَى خَاطِرْ المَسِيحْ يَسُوعْ.

²⁴وْمَرْقُسْ وْأَرِسْتَرْخُسْ وْدِيمَاسْ وْلُوقَا الِّي هُومَا مْعَايَ فِي الخِدْمَة

²⁵وْنِعْمِةْ رَبّْنَا يَسُوعْ المَسِيحْ مْعَاكُمْ.