Read Tunisian Arabic New Testament العِبْرَانِيِّينْ 10 Bible Online

العِبْرَانِيِّينْ 10 - Tunisian Arabic New Testament bible

العِبْرَانِيِّينْ 10

¹مَا دَامْهَا الشَّرِيعَة مَاهِي إِلاَّ ظُلْ مْتَاعْ الحَاجَاتْ البَاهْيَة الِّي بَاشْ تْجِي وْمَا هِيشْ هِيَ بِيدْهَا الحْقِيقَة، إِمَّالاَ مَا تْنَجِّمْشْ تْخَلّي الِّي يِتْقَرّْبُوا بِيهَا للهْ يْوَلُّو صَالْحِينْ بِالذْبَايِحْ هِيَ بِيدْهَا الِّي يْقَدّْمُوا فِيهَا دِيمَا عَامْ بَعْدْ عَامْ،

²وِلاَّ رَاهُمْ بَطّْلُوا مَا عَادِشْ يْقَدّْمُوهَا؟ إِذَا كَانْ الِّي يِعْبْدُوا فِي اللهْ اطَّهْرُوا مَرَّة وَحْدَة، رَاهُمْ مَا عَادِشْ بَاشْ يْحِسُّوا بِالذَّنْبْ فِي ضَمَايِرْهُمْ.

³آمَا الذْبَايِحْ هَاذِي تْذَكِّرْ بِالْخَطِيّة عَامْ بَعْدْ عَامْ،

⁴عْلَى خَاطِرْ مُسْتَحِيلْ إِنُّو دَمْ الثِّيرَانْ وِالعْتَارِيسْ يْنَحِّي الذْنُوبْ.

⁵هَاذَاكَا عْلاَشْ المَسِيحْ وَقْتِلِّي جَا لِلعَالَمْ قَالْ: مَا حَبِّيتِشْ ذْبِيحَة وْقُرْبَانْ، آمَا حَضِّرْتْلِي جَسَدْ،

⁶وْمَا فْرَحْتِشْ بِالقُرْبَانْ الِّي يِتْحْرَقْ وْقُرْبَانْ الْخَطِيّة،

⁷آمَا قُلْتْ: هَانِي جِيتْ يَا اللهْ، بَاشْ نَعْمِلْ الِّي تْحِبْ عْلِيهْ، كِيفْ مَا هُوَ مَكْتُوبْ عْلِيَّ فِي الكْتَابْ.

⁸وَقْتِلِّي قَالْ: «مَا حَبِّيتِشْ ذْبَايِحْ وْقَرَابِينْ وْلاَ فْرَحْتْ بِالقَرَابِينْ المَحْرُوقَة وْلاَ بْقَرَابِينْ الذْنُوبْ.» رَغْمِلِّي هِيَ يْقَدّْمُوهَا كِيفْ مَا تْقُولْ الشَّرِيعَة.

⁹وِمْبَاعِدْ قَالْ: «هَانِي جِيتْ بَاشْ نَعْمِلْ الشَّيْء الِّي تْحِبْ عْلِيهْ»، هُوَ طَيِّحْ العَهْدْ الأُوِّلْ بَاشْ يِبْنِي العَهْدْ الثَّانِي.

¹⁰وْبِالإِرَادَة هَاذِيكَا أَحْنَا تْقَدِّسْنَا بِالقُرْبَانْ مْتَاعْ جَسَدْ يَسُوعْ المَسِيحْ فَرْدْ مَرَّة.

¹¹وْكُلْ كَاهِنْ يَاقِفْ كُلْ يُومْ وْيِخْدِمْ خِدْمْتُو وِيْقَدِّمْ الذْبِيحَة هِيَ بِيدْهَا بَرْشَة مَرَّاتْ، وْهِيَ مَا تْنَجِّمْشْ تْنَحِّي الذْنُوبْ.

¹²آمَا وَقْتِلِّي المَسِيحْ قَدِّمْ ذْبِيحَة وَحْدَة فَرْدْ مَرَّة عْلَى خَاطِرْ الذْنُوبْ، قْعَدْ عْلَى يْمِينْ اللهْ،

¹³وْهُوَ تَوَّا يِسْتَنَّى حَتَّى لِينْ اللهْ يْحُطْ الأَعْدَاءْ مْتَاعُو تَحْتْ سَاقِيهْ،

¹⁴رَاهُو بْقُرْبَانْ وَاحِدْ رَدْ الِّي قَدِّسْهُمْ الكُلْهُمْ كَامْلِينْ لِلأَبَدْ.

¹⁵وِالرُّوحْ القُدُسْ زَادَا يِشْهْدِلْنَا. بَعْدْ مَا قَالْ:

¹⁶يْقُولْ الرَّبْ: هَاذَا هُوَ العَهْدْ الِّي بَاشْ نَعْمْلُو مْعَاهُمْ بَعْدْ الأَيَّامَاتْ هَاذُوكُمْ بَاشْ نْحُطْ الشَّرِيعَة مْتَاعِي فِي قْلُوبْهُمْ وْنِكْتِبْهَا فِي عْقُولْهُمْ

¹⁷وْمَا عَادِشْ بَاشْ نِتْذَكِّرْ ذْنُوبْهُمْ وِغْلاَطْهُمْ.

¹⁸كِيِتْغِفْرُوا هَاذُومَا، مُوشْ لاَزِمْ يِتْقَدِّمْ حَتَّى قُرْبَانْ عْلَى خَاطِرْ الذْنُوبْ.

¹⁹هَاذَاكَا عْلاَشْ أَحْنَا وَاثْقِينْ، يَا الإِخْوَة، مَادَامْنَا عِنْدْنَا ثِيقَة الِّي أَحْنَا نُدْخْلُوا لْقُدْسْ الأَقْدَاسْ بْدَمْ يَسُوعْ،

²⁰بِالطْرِيقْ الجْدِيدْ وِالحَيْ الِّي عْمَلْهُولْنَا فِي الحْجَابْ، مَعْنَاهَا فِي جَسَدُو،

²¹وْمَادَامْ عِنْدْنَا كَاهِنْ عْظِيمْ مَسْؤُولْ عْلَى بِيتْ اللهْ،

²²خَلِّينَا نُقْرْبُوا بْقَلْبْ صَادِقْ وْبِالثِّيقَة الكَامْلَة مْتَاعْ الإِيمَانْ، وِقْلُوبْنَا مِطَّهْرَة مِالنِّيَّة الخَايْبَة وِبْدُونَاتْنَا مَغْسُولَة بْمَاء طَاهِرْ،

²³خَلِّينَا نْشِدُّوا صْحِيحْ في الرّجَاءْ مْتَاعْنَا الِّي نِشْهْدُوا بِيهْ مِنْ غِيرْ مَا نِتْرَدَدُوا، رَاهُو اللهْ الِّي وْعِدْ أَمِينْ،

²⁴وْخَلِّينَا نَحْرْصُوا كِيفَاشْ نْشَجّْعُوا بْعَضْنَا عْلَى المْحَبَّة وِالأَعْمَالْ الصَّالْحَة،

²⁵وْمَا نْبَطّْلُوشْ نِتْقَابْلُوا كِيفْ مَا بَطّْلُوا جْمَاعَة مِنْكُمْ، آمَا نْشَجّْعُوا بْعَضْنَا، بْقَدْرْ مَا تْشُوفُوا الِّي يُومْ الرَّبْ قْرُبْ.

²⁶إِذَا كَانْ نِذْنْبُوا قَاصْدِينْ، بَعْدْ مَا عْرَفْنَا الحَقْ، رَاهِي مُوشْ بَاشْ تَبْقَى ثَمَّة ذْبِيحَة تْكَفِّرْ عْلَى الذْنُوبْ،

²⁷آمَا نِسْتَنَّاوْ الحْسَابْ وْنَارْ شَاعْلَة بَاشْ تَاكُلْ العَاصِينْ وْإِحْنَا خَايْفِينْ.

²⁸الِّي يْخَالِفْ الشَّرِيعَة مْتَاعْ مُوسَى يْمُوتْ مِنْ غِيرْ رَحْمَة بِشْهَادِةْ زُوزْ وِلاَّ ثْلاَثَة شْهُودْ،

²⁹حَسْبْ رَايْكُمْ قَدَّاشُو أَكْبِرْ العِقَابْ الِّي يِسْتْحَقُّو الرَّاجِلْ الِّي هَانْ إِبْنْ اللهْ وْنَجِّسْ الدَّمْ مْتَاعْ العَهْدْ الِّي تْقَدِّسْ بِيهْ وِحْقَرْ الرُّوحْ الِّي تْجِي مِنُّو النِّعْمَة؟

³⁰أَحْنَا نَعْرْفُوا الِّي قَالْ: «آنَا الِّي نِنْتَقَمْ، آنَا بَاشْ نْكَافِي.» وْقَالْ زَادَا: «الرَّبْ بَاشْ يُحْكُمْ عْلَى شَعْبُو.»

³¹يَا وِيلُو الِّي يْطِيحْ فِي يْدِينْ اللهْ الحَيْ!

³²آمَا تْذَكّْرُوا الأَيَّامَاتْ الِّي فَاتُوا بَعْدْ مَا شُفْتُوا النُّورْ قَدَّاشْ تْحَمِّلْتُوا مِنْ حْرُوبَاتْ قْوِيَّة وِعْذَابْ،

³³مَرَّاتْ عَايْرُوكُمْ وْعَانِيتُوا مِالضِّيقْ قُدَّامْ النَّاسْ وْمَرَّاتْ شَارِكْتُوا الِّي وْقَعِّلْهُمْ الشَّيْء هَاذَا.

³⁴كِحَسِّيتُوا بِالمَرْبُوطِينْ وِقْبِلْتُوا إِنُّو أَمْلاَكُّمْ تِتْفَكِّلْكُمْ وْإِنْتُومَا فَرْحَانِينْ، وِعْرَفْتُوا الِّي إِنْتُومَا عِنْدْكُمْ أَمْلاَكْ مَا خِيرْ وْمَا تَفْنَاشْ.

³⁵هَاذَاكَا عْلاَشْ مَا تْخَلِّيوْشْ ثِيقِتْكُمْ تُضْعُفْ، رَاكُمْ بَاشْ تَاخْذُوا عْلِيهَا ثْوَابْ كْبِيرْ.

³⁶رَاكُمْ مِحْتَاجِينْ لِلصَّبْرْ بَاشْ تْنَجّْمُوا تَعْمْلُوا إِرَادِةْ اللهْ وْتَاخْذُوا الشَّيْء الِّي وْعِدْ بِيهْ.

³⁷بَعْدْ شْوَيَّة الِّي جَايْ بَاشْ يْجِي وْمُوشْ بَاشْ يَبْطَى.

³⁸البَارْ بِالإِيمَانْ بَاشْ يَحْيَى وْإِذَا كَانْ يَرْتَدْ، مَا نَرْضَاشْ عْلِيهْ.

³⁹آمَا أَحْنَا رَانَا مَا نَاشْ مِنْ هَاذُوكُمْ الِّي يَرْتَدّو وِيْضِيعُوا، آمَا رَانَا مِنْ هَاذُوكُمْ الِّي عِنْدْهُمْ إِيمَانْ وْيَحْفْظُوا رْوَاحْهُمْ.