Read Tunisian Arabic New Testament العِبْرَانِيِّينْ 11 Bible Online

العِبْرَانِيِّينْ 11 - Tunisian Arabic New Testament bible

العِبْرَانِيِّينْ 11

¹الإِيمَانْ هُوَ إِنَّا نَاثْقُوا فِي الشَّيْء الِّي نِتْرَجُّوهْ وِنْكُونُوا مِتْأَكّْدِينْ مِنْ حَاجَاتْ مَا نَاشْ نْشُوفُوا فِيهَا.

²وْبِيهْ هُوَ شْهِدْ اللهْ لِلشْيُوخْ مْتَاعْ قْبَلْ.

³بِالإِيمَانْ نِفْهْمُوا الِّي العَالَمْ تِخْلَقْ بْكِلْمِةْ اللهْ، وْهَكَّا الشَّيْء الِّي نْشُوفُوا فِيهْ تِعْمَلْ مِنْ حَاجَاتْ مَا هِيشْ ظَاهْرَة.

⁴بِالإِيمَانْ قَدِّمْ هَابِيلْ للهْ ذْبِيحَة مَقْبُولَة أَكْثِرْ مِنْ قَايينْ، وْبِيهَا رْضَى عْلِيهْ اللهْ كِيفْ رَاجِلْ بَارْ، اللهْ شْهِدْلُو كِقْبِلْ القَرَابِينْ مْتَاعُو، هُوَ مَاتْ آمَا مَازَالْ يِتْكَلِّمْ بِالإِيمَانْ مْتَاعُو.

⁵بِالإِيمَانْ أَخْنُوخْ تِرْفَعْ بَاشْ مَا يْشُوفِشْ المُوتْ، وْمَا لْقَاوْهِشْ عْلَى خَاطِرْ اللهْ رَفْعُو. وِقْبَلْ مَا يِتْرْفَعْ تِشْهِدْلُو الِّي هُوَ رَضَّى اللهْ.

⁶وْمِنْ غِيرْ إِيمَانْ مُسْتَحِيلْ نْرَضِّيوْهْ. رَاهُو أَيْ وَاحِدْ يُقْرُبْ مِنْ اللهْ يِلْزْمُو يِمِّنْ الِّي هُوَ مُوجُودْ وْإِنُّو يْجَازِي الِّي يْفَرْكْسُوا عْلِيهْ.

⁷بِالإِيمَانْ نُوحْ حَطْ فِي قَلْبُو كِنَبّْهُو اللهْ لْحَاجَاتْ مَا تِتْشَافِشْ وِصْنَعْ السْفِينَة بَاشْ يْمَنَّعْ عَايِلْتُو. وْهَكَّا حْكُمْ عْلَى العَالَمْ وْوَلَّي وَارِثْ لِلبِرْ الِّي يْجِي بِالإِيمَانْ.

⁸بِالإِيمَانْ إِبْرَاهِيمْ طَاعْ وَقْتِلِّي دْعَاهْ اللهْ بَاشْ يُخْرُجْ وْيِمْشِي لِلبْلاَصَة الِّي كَانْ بَاشْ يُورِثْهَا، وِخْرَجْ البَرَّا وْهُوَ مُوشْ عَارِفْ عْلَى رُوحُو وِينْ مَاشِي.

⁹بِالإِيمَانْ سْكِنْ فِي الأَرْضْ الِّي وِعْدُو بِيهَا اللهْ كَإِنُّو فِي أَرْضْ غْرِيبَة، سَاكِنْ فِي الخْيَامْ هُوَ وْإِسْحَاقْ وْيَعْقُوبْ الِّي مْشَارْكِينُو فِي الوَعْدْ هُوَ بِيدُو.

¹⁰إِبْرَاهِيمْ كَانْ يِسْتَنَّى فِي المْدِينَة الِّي عِنْدْهَا سَاسْ الِّي اللهْ بْنَاهَا وِعْمَلْهَا.

¹¹بِالإِيمَانْ سَارَّة بِيدْهَا وَلاَّتْ قَادْرَة بَاشْ تْوَلِّي حِبْلَى حَتَّى بَعْدْ مَا عْمُرْهَا فَاتْ، مَا دَامْهَا عَرْفِتْ إِنُّو الِّي وْعِدْهَا أَمِينْ،

¹²هَاذَاكَا عْلاَشْ مِنْ رَاجِلْ وَاحِدْ الِّي هُوَ إِبْرَاهِيمْ وِلِّي هُوَ قْرِيبْ يْمُوتْ تْوِلْدِتْ ذُرِّيَّة عْدَدْهُمْ كْبِيرْ قَدْ نْجُومْ السْمَاءْ وْمَا يِتْعَدُّوشْ كِالرْمَلْ مْتَاعْ شَطْ البْحَرْ.

¹³وْهَاذُومَا الكُلْهُمْ مَاتُوا وْهُومَا مُؤْمْنِينْ مِنْ غِيرْ مَا يَاخْذُوا الشَّيْء الِّي وْعِدْهُمْ بِيهْ اللهْ، آمَا شَافُوهْ وْحَيُّوهْ مِنْ بْعِيدْ. وِاعْتَرْفُوا الِّي هُومَا كَانُوا بْرَايْنِيَّة وْمِتْعَدِّينْ عْلَى الأَرْضْ،

¹⁴رَاهُمْ النَّاسْ الِّي يْقُولُوا الكْلاَمْ هَاذَا يْوَرِّيوْ الِّي هُومَا يْفَرْكْسُوا عْلَى بْلاَدْ.

¹⁵كَانْ جَاوْ يْفَكّْرُوا فِي هَاكَا الأَرْضْ الِّي خَرْجُوا مِنْهَا، تَالِي رَاهِي كَانِتْ عِنْدْهُمْ الفُرْصَة بَاشْ يَرْجْعُوا.

¹⁶آمَا هُومَا كَانُوا يْحِبُّوا عْلَى بْلاَدْ مَا خِيرْ، الِّي هِيَ البْلاَدْ الِّي فِي السْمَاءْ. هَاذَاكَا عْلاَشْ اللهْ مَا يِحْشِمْشْ مِنْ إِنُّو يِتْسَمَّى إِلاَهْهُمْ عْلَى خَاطْرُو حَضّْرِلْهُمْ مْدِينَة.

¹⁷بِالإِيمَانْ إِبْرَاهِيمْ وَقْتِلِّي إمْتَحْنُو اللهْ قَدِّمْ إِسْحَاقْ ذْبِيحَة، وْهُوَ الِّي وِعْدُو اللهْ كَانْ مُسْتْعَدْ بَاشْ يْقَدِّمْ الوْلِدْ الوَحِيدْ الِّي عَنْدُو

¹⁸الِّي تْقَالْ عْلِيهْ: «بْإِسْحَاقْ بَاشْ تْكُونْ عِنْدِكْ ذُرِّيَّة.»

¹⁹إِبْرَاهِيمْ فْهِمْ إِنُّو اللهْ قَادِرْ بَاشْ يْقَيِّمْ النَّاسْ حَتَّى مِالمُوتْ وْرَجَّعْ إِسْحَاقْ مِالمُوتْ كَإِنُّو مَاتْ وْقَامْ.

²⁰بِالإِيمَانْ إِسْحَاقْ بَارِكْ يَعْقُوبْ وْعِيسُو بْحَاجَاتْ بَاشْ تَاقَعْ فِي المُسْتَقْبِلْ.

²¹بِالإِيمَانْ يَعْقُوبْ وَقْتِلِّي قْرِيبْ يْمُوتْ بَارِكْ وْلاَدْ يُوسُفْ الإِثْنِينْ وْهُوَ سَاجِدْ عْلَى رَاسْ العْصَا مْتَاعُو

²²بِالإِيمَانْ يُوسُفْ فِي آخِرْ عُمْرُو حْكَى لْبَنِي إِسْرَائِيلْ كِيفَاشْ بَاشْ يُخْرْجُوا مِنْ مَصْرْ وْوَصَّاهُمْ كِيفَاشْ بَاشْ يِدْفْنُوا عْظَامُو.

²³بِالإِيمَانْ مُوسَى وَقْتِلِّي تُولِدْ خَبُّوهْ أُمُّو وْبُوهْ ثْلاَثَة شْهُرْ، كِشَافُوا الِّي هُوَ مِزْيَانْ وْمَا خَافُوشْ مِالقَرَارْ مْتَاعْ المَلِكْ.

²⁴بِالإِيمَانْ مُوسَى وَقْتِلِّي كْبِرْ مَا حَبِّشْ يِتْسَمَّى وِلْدْ بِنْتْ فَرْعُونْ،

²⁵وِاخْتَارْ بَاشْ يْعِيشْ ذْلِيلْ مْعَ شَعْبْ اللهْ عْلَى إِنُّو يِتْمَتَّعْ بِالشِّيخَاتْ مْتَاعْ الْخَطِيّة،

²⁶إِعْتَبِرْ الِّي العْذَابْ عْلَى خَاطِرْ المَسِيحْ ثَرْوَة أَعْظِمْ مِنْ كْنُوزْ مَصْرْ، عْلَى خَاطْرُو كَانْ يُخْزُرْ لِلثْوَابْ الِّي بَاشْ يَاخْذُوا فِي المُسْتَقْبِلْ

²⁷بِالإِيمَانْ مُوسَى خْرَجْ مِنْ مَصْرْ مُوشْ خَايِفْ مِالغُشْ مْتَاعْ المَلِكْ، عْلَى خَاطْرُو صْبَرْ كَإِنُّو يْشُوفْ فِلِّي مَا يِتْشَافِشْ.

²⁸بِالإِيمَانْ عْمَلْ الفِصْحْ وْرَشْ الدَّمْ، بَاشْ مَلاَكْ المُوتْ مَا يْمِسِّشْ الوْلَدْ البَدْرِي فِي كُلْ دَارْ.

²⁹بِالإِيمَانْ بَنِي إِسْرَائِيلْ تْعَدَّاوْ فِي البْحَرْ الأَحْمَرْ كَإِنّْهُمْ يِمْشِيوْ فِي البَرْ، آمَا وَقْتِلِّي المَصْرِيِّينْ حَبُّوا يَعْمْلُوا الشَّيْء هُوَ بِيدُو غَرْقُوا.

³⁰بِالإِيمَانْ طَاحِتْ الأَسْوَارْ مْتَاعْ أَرِيحَا بَعْدْ مَا دَارُوا بِيهَا بَنِي إِسْرَائِيلْ سَبْعَة أَيَّامْ.

³¹بِالإِيمَانْ رَاحَابْ الِّي سِيرِتْهَا مُوشْ بَاهْيَة مَا مَاتِتْشْ مْعَ العَاصِينْ، عْلَى خَاطِرْهَا ضَيّْفِتْ الجَوَاسِيسْ.

³²وْآشْ بَاشْ نْقُولْ آخَرْ؟ الوَقْتْ مَا يِكْفِينِيشْ بَاشْ نَحْكِي عْلَى جِدْعُونْ وْبَارَاقْ وْشَمْشُونْ وْيَفْتَاحْ وْدَاوُدْ وْصَمُوئِيلْ وِالأَنْبِيَاءْ.

³³الِّي بِالإِيمَانْ غَلْبُوا بُلْدَانْ وْحُكْمُوا بِالعَدْلْ وِخْذُوا الشَّيْء الِّي وْعِدْهُمْ بِيهْ اللهْ وْسَكّْرُوا افَّامْ الصْيُودَا

³⁴وْطَفَّاوْ النَّارْ الهَايْجَة وِنْجَاوْ مِالمُوتْ بِالسْيُوفَا وِتْقَوَّاوْ بَعْدْ مَا كَانُوا ضْعَافْ وْوَلاَّوْ قْوِيِّينْ فِي الحَرْبْ وْخَلَّاوْ جْيُوشْ البْرَايْنِيَّة يُهْرْبُوا،

³⁵وِنْسَاء رَجْعُولْهُمْ الِّي مَاتُولْهُمْ بَعْدْ مَا قَامُوا. وْثَمَّة شْكُونْ تْعَذّْبُوا وْمَا حَبُّوشْ يِتْسَيّْبُوا بَاشْ يْقُومُوا مَرَّة أُخْرَى لْحَيَاةْ مَا خِيرْ،

³⁶ثَمَّة أُخْرِينْ عَانَاوْ مِالتْمِسْخِيرْ وِالضَّرْبَانْ بِالسُّوطْ، وْعَانَاوْ حَتَّى مِالسْلاَسِلْ وِالحَبْسْ.

³⁷وْثَمَّة شْكُونْ مِنْهُمْ الِّي تْرُجْمُوا وْثَمَّة شْكُونْ تْقَصُّوا عْلَى ثْنِينْ وِتْقَتْلُوا بِالسْيُوفَا وْثَمَّة شْكُونْ تْشَرّْدُوا لاَبْسِينْ جْلُودْ الغْنَمْ وِالمْعِيزْ مَحْرُومِينْ وْمَقْهُورِينْ وْمَظْلُومِينْ،

³⁸العَالَمْ مَا كَانِشْ مِسْتْحَقِّلْهُمْ، ضَايْعِينْ فِي الخْلاَء وِالجْبَالْ وِالمْغَاغِرْ وِالدْوَامِيسْ مْتَاعْ الأَرْضْ.

³⁹وْهَاذُومَا الكُلْهُمْ مَا خْذُوشْ الشَّيْء الِّي تْوَعْدُوا بِيهْ رَغْمِلِّي تِشْهِدِّلْهُمْ الِّي هُومَا مُؤْمْنِينْ،

⁴⁰مَا دَامُو اللهْ حَضِّرْ حَاجَة مَا خِيرْ لِينَا أَحْنَا بَاشْ مَا يْكُونُوشْ كَامْلِينْ مِنْ غِيرْنَا.