Read Tunisian Arabic New Testament العِبْرَانِيِّينْ 13 Bible Online

العِبْرَانِيِّينْ 13 - Tunisian Arabic New Testament bible

العِبْرَانِيِّينْ 13

¹خَلِّي المْحَبَّة الِّي بِينْ الإِخْوَة تْكُونْ دَايْمَة

²وْمَا تَنْسَاوْشْ بَاشْ تْرَحّْبُوا بِالبْرَايْنِيَّة، رَاهُو بِالشَّيْء هَاذَا ثَمَّة شْكُونْ الِّي ضَيّْفُوا مْلاَيْكَة مِنْ غِيرْ مَا يَعْرْفُوا.

³اذَّكّْرُوا الِّي مَرْبُوطِينْ فِي الحَبْسْ كَإِنّْكُمْ فِي الحَبْسْ مْعَاهُمْ، وِالْمَذْلُولِين كَإِنّْكُمْ مَذْلُولِينْ مْعَاهُمْ.

⁴خَلِّي النَّاسْ الكُلْهُمْ يِحْتَرْمُوا الْحَياةْ الزَّوْجِيَّة، وْخَلِّي الفَرْشْ يْكُونْ طَاهِرْ، رَاهُو اللهْ بَاشْ يُحْكُمْ عْلَى الفَاسْدِينْ وِلِّي يَزْنُوا.

⁵خَلِّي سِيرِتْكُمْ تْكُونْ طَاهْرَة مِنْ مْحَبِّةْ الفْلُوسْ. اقْتَنْعُوا بِلِّي عِنْدْكُمْ. رَاهُو اللهْ قَالْ: «عُمْرِي مَا نْهَمّْلِكْ وْلاَ نْخَلِّيكْ.»

⁶وِانَّجْمُوا نْقُولُوا وْإِحْنَا وَاثْقِينْ: الرَّبْ يْعَاوِنِّي مَا نْخَافِشْ. شْنُوَّة البَشَرْ بَاشْ يَعْمِلِّي؟

⁷اذَّكّْرُوا القَادَة مْتَاعْكُمْ الِّي حْكَاوْلْكُمْ عْلَى كِلْمِةْ اللهْ. أُخْزْرُوا لِنْهَايِةْ سِيرِتْهُمْ وْتَبّْعُوهُمْ فِي الإِيمَانْ.

⁸يَسُوعْ المَسِيحْ هُوَ بِيدُو آمِسْ وِاليُومْ وْلِلأَبَدْ.

⁹مَا اتَّبْعُوشْ أَيْ تَعْلِيمْ غْرِيبْ وْكِيفْ مَا جَا، رَاهُو بَاهِي إِذَا كَانْ القَلْبْ يِتْقَوَّى بِالنِّعْمَة، مُوشْ بُمَّاكِلْ مْتَاعْ عِبَادَاتْ مَا نَفْعِتْشْ الِّي تَبّْعُوهَا.

¹⁰عِنْدْنَا مَذْبَحْ مَاكَانِشْ للِّي كَانُوا يِخْدْمُوا فِي الخِيمَة الحَقْ بَاشْ يَاكْلُوا مِنُّو.

¹¹رَاهُمْ الحَيَوَانَاتْ الِّي يْجِيبْ دَمّْهُمْ كْبِيرْ الكُهَّانْ لْقُدْسْ الأَقْدَاسْ عْلَى خَاطِرْ الذْنُوبْ يِتْحَرْقُوا البَرَّة مِالمْدِينَة.

¹²وْهَكَّا يَسُوعْ زَادَا، تْعَذِّبْ لْبَرَّة مِالبِيبَانْ مْتَاعْ المْدِينَة، بَاشْ يْقَدِّسْ النَّاسْ بْدَمُّو هُوَ.

¹³إِمَّالاَ خَلِّينَا نُخْرْجُولُو لْبَرَّا مِالمْدِينَة وِنْهِزُّوا العْذَابْ وِالعَارْ الِّي هَزُّو هُوَ.

¹⁴رَانَا مَا عِنْدْنَاشْ مْدِينَة دَايْمَة لِهْنَا، آمَا رَانَا نلَوّْجُوا عْلَى المْدِينَة الِّي بَاشْ تْجِي فِي المُسْتَقْبِلْ.

¹⁵خَلِّينَا دِيمَا نْقَدّْمُوا لْرَبِّي ذْبِيحَة مْتَاعْ تَسْبِيحْ عْلَى طْرِيقْ يَسُوعْ، الِّي هِيَ الغَلَّة الِّي تُخْرُجْ مِالفُمْ الِّي يِعْتَرِفْ بْإِسْمُو.

¹⁶مَا تَنْسَاوْشْ بَاشْ تَعْمْلُوا الخِيرْ وْتِتْشَارْكُوا فِي الحَاجَاتْ الِّي عِنْدْكُمْ، رَاهِي الذْبَايِحْ الِّي كِيفْ هَكَّا تْرَضِّي اللهْ.

¹⁷طِيعُوا القَادَة مْتَاعْكُمْ وْأَسْمْعُوا كْلاَمْهُمْ، رَاهُمْ حَارْصِينْ عْلَى رْوَاحْكُمْ كَإِنّْهُمْ بَاشْ يِتْحَاسْبُوا عْلِيهَا، بَاشْ يَعْمْلُوا الشَّيْء هَاذَا وْهُومَا فَرْحَانِينْ، مُوشْ وْهُومَا حْزَانَى مَا كَانِشْ رَاكُمْ مَا تِسْتْفَادُوشْ.

¹⁸صَلِّيوْلْنَا، رَانَا مِتْأَكّْدِينْ الِّي أَحْنَا عِنْدْنَا ضَمِيرْ، نْحِبُّوا نِتْصَرّْفُوا بِالقْدَا فِي كُلْ شَيْء.

¹⁹نْأَكِّدْ عْلِيكُمْ أَكْثِرْ مَا يُمْكِنْ بَاشْ تْصَلِّيو إِنِّي نَرْجْعِلْكُمْ فِيسَعْ.

²⁰وْإِلاَهْ السَّلاَمْ الِّي قَيّمْ رَبّْنَا يَسُوعْ مِنْ بِينْ المُوتَى، الِّي هُوَ الرَّاعِي العْظِيمْ مْتَاعْ الغْنَمْ، بْدَمْ العَهْدْ الِّي يَبْقَى لِلأَبَدْ،

²¹بَاشْ يَعْطِيكُمْ كُلْ شَيْء بَاهِي بَاشْ تْنَجّْمُوا تَعْمْلُوا إِرَادْتُو ؛ وْهُوَ قَاعِدْ يَعْمِلْ فِينَا فِي الشَّيْء الِّي يْرَضِّيهْ عْلَى طْرِيقْ يَسُوعْ المَسِيحْ لِيهْ المَجْدْ لِلأَبَدْ. آمِينْ.

²²نُطْلُبْ مِنْكُمْ، يَا خْوَاتِي، إِنّْكُمْ تِتْحَمّْلُوا جْوَابِي الِّي شَجَّعْتْكُمْ بِيهْ، رَانِي كْتِبْتْهُولْكُمْ بْإِخْتِصَارْ.

²³نْخَبِّرْكُمْ الِّي خُونَا تِيمُوثَاوُسْ خْرَجْ مِالحَبْسْ. تَوْ نْجِيكُمْ آنَا وْيَاهْ إِذَا كَانْ يْجِي عْلَى قْرِيبْ.

²⁴سَلّْمُوا عْلَى القَادَة مْتَاعْكُمْ الكُلْهُمْ وِعْلَى المُؤْمْنِينْ الكُلْهُمْ. يْسَلْمُوا عْلِيكُمْ الإِخْوَة الِّي جَاوْ مِنْ إِيطَالْيَا.

²⁵النِّعْمَة مْعَاكُمْ الكُلْكُمْ. آمِينْ.