Read Tunisian Arabic New Testament العِبْرَانِيِّينْ 2 Bible Online

العِبْرَانِيِّينْ 2 - Tunisian Arabic New Testament bible

العِبْرَانِيِّينْ 2

¹هَاذَاكَا عْلاَشْ يِلْزِمْنَا نْشِدُّوا صْحِيحْ فِي التَّعْلِيمْ الِّي تْعَلِّمْنَاهْ بَاشْ مَا نْضَيّْعُوشْ الطْرِيقْ الصْحِيحْ.

²وِالرِّسَالَة الِّي تْبَعْثِتْ عْلَى طْرِيقْ المْلاَيْكَة ثِبْتِتْ الِّي هِيَ صْحِيحَة، وِلِّي حَقْرُوهَا وْمَا حَطُّوهَاشْ فِي بَالْهُمْ تْعَاقْبُوا العِقَابْ الِّي يِسْتْحَقُّوهْ.

³إِمَّالاَ كِيفَاشْ أَحْنَا نِمْنْعُوا مِالعِقَابْ إِذَا مَا نَعْطُوشْ قِيمَة لْخَلاَصْ كِيمَا هَاذَا؟ الرَّبْ خَبِّرْنَا بِيهْ مِالأُوِّلْ، وْزَادُوا أَكّْدُوهُولْنَا النَّاسْ الِّي سَمْعُوهْ،

⁴وِالله أَكِّدْ الشْهَادَاتْ مْتَاعْهُمْ بْأَمَارَاتْ وِعْجَايِبْ وْأَنْوَاعْ مْتَاعْ مُعْجْزَاتْ، وْبِالمَوَاهِبْ مْتَاعْ الرُّوحْ القُدُسْ الِّي يْفَرِّقْهَا كِيفْ مَا حَبْ.

⁵رَاهُو اللهْ مَا حَطِّشْ العَالَمْ الِّي جَايْ وِلِّي نِحْكُوا عْلِيهْ تَحْتْ سُلْطِةْ المْلاَيْكَة،

⁶وْثَمَّة شْكُونْ مِنْهُمْ قَالْ فِي الكْتُبْ المُقَدّْسَة: شْكُونُو هُوَ الإِنْسَانْ يَا اللهْ حَتَّى لِينْ تِتْذَكّْرُو؟ وِشْكُونْ هُوَ إِبْنْ الإِنْسَانْ حَتَّى لِينْ تْفَكِّرْ فِيهْ؟

⁷رَدِّيتُو أَقَلْ مِالمْلاَيْكَة بِشْوَيَّة لْمُدَّة مِالزْمَانْ، وِعْطِيتُو مَجْدْ وْكَرَامَة،

⁸وْحَطِّيتْ كُلْ شَيْء تَحْتْ سَاقِيهْ. إِذَا كَانْ اللهْ حَطْ كُلْ شَيْء تَحْتْ سُلْطْتُو رَاهُو مَا خَلاَّشْ حَتَّى حَاجَة مَا هِيشْ اطِّيعْ فِيهْ. آمَا تَوَّا رَانَا مَا نَاشْ نْشُوفُوا فِي كُلْ شَيْء تَحْتْ سُلْطْتُو

⁹آمَا هَاكَا الِّي اللهْ رَدُّو أَقَلْ مِالمْلاَيْكَة بِشْوَيَّة لْمُدَّة مِالزْمَانْ، الِّي هُوَ يَسُوعْ، نْشُوفُوهْ حَاطْ فُوقْ رَاسُو تَاجْ المَجْدْ وِالكَرَامَة عْلَى خَاطْرُو تْحَمِّلْ الوْجَايِعْ مْتَاعْ المُوتْ، وْنْعِمْ اللهْ عْلِينَا كِخَلاَّهْ يْذُوقْ المُوتْ عْلَى خَاطِرْ النَّاسْ الكُلْ.

¹⁰إِي نْعَمْ، بَاهِي إِنُّو اللهْ الِّي كُلْ شَيْء كَانْ عْلَى خَاطْرُو هُوَ وْبِيهْ هُوَ، كِحَبْ يِهْدِي بَرْشَة مِنْ وْلاَدُو لِلمَجْدْ، رَدْ رَئِيسْ خَلاَصْهُمْ كَامِلْ عْلَى طْرِيقْ الوْجَايِعْ،

¹¹رَاهُو الِّي يْقَدِّسْ وِلِّي يِتْقَدّْسُوا عِنْدْهُمْ أَصْلْ وَاحِدْ، هَاذَاكَا عْلاَشْ مَا يِحْشِمْشْ بِيهُمْ بَاشْ يْسَمِّيهُمْ إِخْوَة،

¹²وِيْقُولْ: بَاشْ نْبَشِّرْ إِخْوْتِي بْإِسْمِكْ وْفِي وُسْطْ الجْمَاعَة نْسَبّْحِكْ.

¹³وِيْقُولْ زَادَا: آنَا تْوَكِّلْتْ عْلَى اللهْ. وْزَادَا: هَانِي مْعَ الوْلاَدْ الِّي عْطَاهُمْلِي اللهْ.

¹⁴وْكِكَانُوا الوْلاَدْ مِتْشَارْكِينْ فِي اللْحَمْ وِالدَّمْ، تْشَارِكْ مْعَاهُمْ يَسُوعْ زَادَا فِي الطْبِيعَة هَاذِي بَاشْ يِقْضِي بْدَمُّو عَلِّي عَنْدُو سُلْطِةْ المُوتْ، الِّي هُوَ بْلِيسْ،

¹⁵وِيْحَرَّرْ الِّي عَدَّاوْا حْيَاتْهُمْ الكُلْهَا عَبِيدْ وْخَايْفِينْ مِالمُوتْ.

¹⁶جَا مُوشْ بَاشْ يْعَاوِنْ المْلاَيْكَة، آمَا بَاشْ يْعَاوِنْ ذُرِّيِّةْ إِبْرَاهِيمْ

¹⁷يَاخِي كَانْ لاَزْمُو يْكُونْ يِشْبِهْ لِخْوَاتُو فِي كُلْ شَيْء، بَاشْ يْكُونْ كْبيرْ الكُهَّانْ، رَحِيمْ وْأَمِينْ فِي خِدْمِةْ اللهْ، وِيْكَفِّرْ عْلَى ذْنُوبْ الشَّعْبْ،

¹⁸وْوَلَّي قَادِرْ بَاشْ يْعَاوِنْ الِّي يِتْجَرّْبُوا عْلَى خَاطْرُو هُوَ بِيدُو تْجَرِّبْ وِتْعَذَّبْ.