Read Tunisian Arabic New Testament العِبْرَانِيِّينْ 3 Bible Online

العِبْرَانِيِّينْ 3 - Tunisian Arabic New Testament bible

العِبْرَانِيِّينْ 3

¹إِمَّالاَ يَا خْوَاتِي القِدِّيسِينْ الِّي مْشَارْكِينْ فِي الدَّعْوَة مْتَاعْ اللهْ، شُوفُوا يَسُوعْ الرَّسُولْ وِكْبيرْ الكُهَّانْ مْتَاعْ الإِيمَانْ الِّي نِعْتَرْفُوا بِيهْ،

²رَاهُو أَمِينْ مْعَ الِّي خْتَارُو، كِيفْ مَا كَانْ مُوسَى أَمِينْ فِي بِيتْ اللهْ الكُلُّو.

³رَاهُو هَاذَا وَلَّى مِسْتْحَقْ لْمَجْدْ أَكْثِرْ مِنْ مُوسَى، عْلَى قَدْ مَا هُو البَنَّايْ مْتَاعْ الدَّارْ عَنْدُو قْدَرْ أَكْثِرْ مِالدَّارْ.

⁴كُلْ دَارْ عِنْدْهَا بَنَّايْ، وِالله هُوَ الِّي يِبْنِي كُلْ شَيْء.

⁵وْمُوسَى كَانْ أَمِينْ فِي بِيتْ اللهْ الكُلُّو وْخَادِمْ يِشْهِدْ عْلَى الشَّيْء الِّي اللهْ بَاشْ يْخَبِّرْ بِيهْ.

⁶آمَا المَسِيحْ، مَا دَامُو إِبْنْ اللهْ هُوَ أَمِينْ فِي بِيتْ اللهْ الِّي هِيَ أَحْنَا، إِذَا كَانْ شَدِّينَا صْحِيحْ فِي الفُخْرَة الِّي عِنْدْنَا وِالثِّيقَة والرَّجَاءْ مْتَاعْنَا.

⁷هَاذَاكَا عْلاَشْ، كِيفْ مَا يْقُولْ الرُّوحْ القُدُسْ: اليُومْ، إِذَا سْمَعْتُوا صُوتْ اللهْ،

⁸مَا تْكَسّْحُوشْ قْلُوبْكُمْ كِيفْ مَا عْمَلْتُوا نْهَارِتْ الِّي عْصِيتُونِي، نْهَارِتْ الِّي جَرِّبْتُونِي فِي الصَّحْرَاء،

⁹وِينْ جَرّْبُوني جْدُودْكُمْ، وْشَافُوا الأَعْمَالْ مْتَاعِي لْمُدِّةْ أَرْبْعِينْ سْنَة.

¹⁰هَاذَاكَا عْلاَشْ عِفْتْ الجِيلْ هَاذَاكَا وْقُلْتْ: قْلُوبْهُمْ بْقَاتْ فِي الضْلاَلْ وْمَا عَرْفُوشْ الثْنَايَا مْتَاعِي،

¹¹وِحْلِفْتْ وَقْتِلِّي غْضَبْتْ عْلِيهُمْ إِنّْهُمْ مَا يُدْخْلُوشْ لِلرَّاحَة مْتَاعِي.

¹²رُدُّوا بَالْكُمْ، يَا الإِخْوَة، إِنُّو مَا يْكُونِشْ فِي وُسْطْكُمْ وَاحِدْ قَلْبُو قَاسِي وْمُوشْ مُؤْمِنْ يْبَعّْدُو عْلَى اللهْ الحَيْ،

¹³آمَا شَجّْعُوا بْعَضْكُمْ كُلْ يُومْ، مَا دَامُو الوَقْتْ مَازَالْ يِتْسَمَّى «اليُومْ»، كِيفْ مَا يْقُولْ الكْتَابْ المُقَدَّسْ، بَاشْ حَتَّى وَاحِدْ فِيكُمْ مَا تْغُرُّو الذْنُوبْ وْقَلْبُو يْوَلِّي قَاسِي.

¹⁴رَانَا أَحْنَا الكُلْنَا مِتْشَارْكِينْ مْعَ المَسِيحْ إِذَا نْشِدُّوا صْحِيحْ لِلإِخْرْ فِي الثِّيقَة الِّي عِنْدْنَا مِالأُوِّلْ.

¹⁵رَاهُو الكْتَابْ المُقَدَّسْ يْقُولْ: «اليُومْ، إِذَا كَانْ سْمَعْتُوا صُوتْ اللهْ مَا تْكَسّْحُوشْ قْلُوبْكُمْ كِيفْ مَا عْمَلْتُوا يُومِتْ الِّي عْصِيتُوا.»

¹⁶وِشْكُونْهُمْ الِّي ثَارُوا عْلِيهْ بَعْدْ مَا سَمْعُوا صُوتُو؟ يَاخِي مُوشْ هُومَا الِّي خَرِّجْهُمْ مُوسَى مِنْ مَصْرْ الكُلْهُمْ؟

¹⁷وِعْلَى شْكُونْ اللهْ غْضَبْ لْمُدِّةْ أَرْبْعِينْ سْنَة؟ يَاخِي مُوشْ عَلِّي عَمْلُوا الذْنُوبْ وْطَاحُوا مُوتَى فِي الصَّحْرَاء؟

¹⁸وِعْلَى شْكُونْ حْلِفْ «أَنّْهُمْ مَا يُدْخْلُوشْ لِلرَّاحَة مْتَاعُو؟» يَاخِي مُوشْ عَلِّي ثَارُوا عْلِيهْ؟

¹⁹وِنْشُوفُوا الِّي هُومَا مَا نَجّْمُوشْ يُدْخْلُوا لِلرَّاحَة مْتَاعُو عْلَى خَاطِرْهُمْ مَا حَبُّوشْ يِمّْنُوا.