Read Tunisian Arabic New Testament العِبْرَانِيِّينْ 4 Bible Online

العِبْرَانِيِّينْ 4 - Tunisian Arabic New Testament bible

العِبْرَانِيِّينْ 4

¹مَا دَامُو عِنْدْنَا وَعْدْ الِّي أَحْنَا بَاشْ نُدْخْلُوا لْرَاحِةْ اللهْ، يِلْزِمْنَا نْخَافُوا لَوَاحِدْ مِنَّا يِتْخَلِّفْ وْمَا يُدْخُلْشْ.

²رَاهُو سْمَعْنَا البْشَارَة كِيفْ مَا سَمْعُوهَا هُومَا، آمَا هُومَا مَا سْتْفَادُوشْ مِالكْلاَمْ الِّي سَمْعُوهْ عْلَى خَاطِرْهُمْ مَا امّْنُوشْ بِيهْ.

³آمَا أَحْنَا المُؤْمْنِينْ رَانَا نُدْخْلُوا لِلرَّاحَة مْتَاعْ اللهْ. كِيفْ مَا قَالْ: «حْلِفْتْ وَقْتِلِّي غْضَبْتْ إِنّْهُمْ مَا يُدْخْلُوشْ لِلرَّاحَة مْتَاعِي!» رَغْمِلِّي الأَعْمَالْ مْتَاعُو تَمِّتْ مِلِّي تْخَلْقِتْ الدِّنْيَا.

⁴وْقَالْ فِي بْلاَصَة فِي الكْتَابْ عْلَى النْهَارْ السَّابِعْ: «وْإِرْتَاحْ اللهْ فِي النْهَارْ السَّابِعْ مِنْ الحَاجَاتْ الِّي يَعْمِلْ فِيهُمْ الكُلْهُمْ.»

⁵وْقَالْ زَادَا فِي الكْتَابْ: «مَا يُدْخْلُوشْ لِلرَّاحَة مْتَاعِي.»

⁶وِلِّي سَمْعُوا البْشَارَة فِي الأُوِّلْ مَا دَخْلُوشْ لِلرَّاحَة مْتَاعْ اللهْ عْلَى خَاطِرْهُمْ عَاصِينُو، آمَا ثَمَّة أُخْرِينْ بَاشْ يُدْخْلُوا لِلرَّاحَة مْتَاعْ اللهْ

⁷هَاذَاكَا عْلاَشْ حَطْ اللهْ مَرَّة أُخْرَى نْهَارْ آخَرْ إِسْمُو «اليُومْ» عْلَى لْسَانْ دَاوُدْ، بَعْدْ زْمَانْ طْوِيلْ، كِيفْ مَا تْقَالْ: «اليُومْ، إِذَا كَانْ سْمَعْتُوا صُوتْ اللهْ مَا تْكَسّْحُوشْ قْلُوبْكُمْ.»

⁸لُوكَانْ يَشُوعْ دَخِّلْهُمْ لْرَاحِةْ اللهْ، تَالِي رَاهُو اللهْ مَا حْكَاشْ مْبَاعِدْ عْلَى يُومْ آخِرْ.

⁹إِمَّالاَ، بْقَاتْ لْشَعْبْ اللهْ رَاحَة كِيفْ الرَّاحَة مْتَاعْ اللهْ فِي اليُومْ السَّابِعْ،

¹⁰الِّي يُدْخُلْ لْرَاحِةْ اللهْ يَرْتَاحْ مِنْ أَعْمَالُو كِيفْ مَا اللهْ إِرْتَاحْ مِالأَعْمَالْ مْتَاعُو.

¹¹خَلِّينَا نَسْعَاوْ أَكْثِرْ مَا يُمْكِنْ بَاشْ نُدْخْلُوا لِلرَّاحَة هَاذِيكَا بَاشْ حَتَّى وَاحِدْ مِنَّا مَا يْطِيحْ كِيمَا عَمْلُوا جْدُودْنَا بِسْبَبْ المَعْصْيَة مْتَاعْهُمْ.

¹²رَاهِي كِلْمِةْ اللهْ حَيَّة وْتَفْعِلْ، أَمْضَى مِنْ كُلْ سِيفْ مَاضِي مِالجِيهْتِينْ، تُدْخُلْ لِلبْلاَصَة الغَارْقَة الِّي مَا بِينْ النَّفْسْ وِالرُّوحْ وِالمْفَاصِلْ وِالمُخْ مْتَاعْ العْظَامْ، وْتُحْكُمْ عْلَى أَحَاسِيسْ القَلْبْ وِالأَفْكَارْ مْتَاعُو.

¹³وْمَا ثَمَّاشْ حَتَّى خْلِيقَة تَخْفَى عْلَى رَبِّي، آمَا رَاهُو كُلْ شَيْء مَكْشُوفْ قُدَّامْ عِينِيهْ وْبِشْ يْحَاسِبْنَا.

¹⁴خَلِّينَا نْشِدُّوا صْحِيحْ فِي الشَّيْء الِّي نِمّْنُوا بِيهْ وْنِعْتَرْفُو بِيهْ، رَاهُو عِنْدْنَا يَسُوعْ إِبْنْ اللهْ كْبيرْ الكُهَّانْ عْظِيمْ تْعَدَّى فِي السْمَاوَاتْ.

¹⁵وِكْبيرْ الكُهَّانْ مْتَاعْنَا مُوشْ كَايْدُو بَاشْ يَرْحِمْ ضَعْفْنَا، هُوَ الِّي تْجَرِّبْ كِيفْنَا بِالتَّجَارِبْ الكُلْهَا آمَا مَا عْمَلْشْ الذْنُوبْ.

¹⁶خَلِّينَا نْقَدّْمُوا بْثِيقَة لِلعَرْشْ مْتَاعْ اللهْ الِّي يَعْطِي النِّعْمَة بَاشْ نَاخْذُوا رَحْمَة وْنَلْقَاوْ نِعْمَة تْعَاوِنَّا كِنِحْتَاجُوا.