Read Tunisian Arabic New Testament العِبْرَانِيِّينْ 5 Bible Online

العِبْرَانِيِّينْ 5 - Tunisian Arabic New Testament bible

العِبْرَانِيِّينْ 5

¹رَاهُو كُلْ كْبيرْ كُهَّانْ يِخْتَارُوهْ مِنْ بِينْ النَّاسْ ويِتْحَطْ عْلَى خَاطِرْ النَّاسْ فِي الخِدْمَة مْتَاعْ اللهْ، بَاشْ يْقَدِّمْ القَرَابِينْ وِالذْبَايِحْ بَاشْ يْكَفِّرْ عْلَى الذْنُوبْ.

²قَادِرْ بَاشْ يْحِنْ عْلَى الجُهَّالْ وِالضَّالِّينْ، عْلَى خَاطْرُو هُوَ بِيدُو ضْعِيفْ،

³وْكَانْ لاَزْمُو يْقَدِّمْ كَفَّارَة عْلَى ذْنُوبُو كِيفْ مَا يْقَدِّمْ كَفَّارَة عْلَى ذْنُوبْ الشَّعْبْ.

⁴وْحَتَّى وَاحِدْ مَا يْشِدْ بْلاَصِةْ كْبيرْ الكُهَّانْ، إِلاَّ إِذَا كَانْ اللهْ دْعَاهْ كِيفْ مَا دْعَى هَارُونْ.

⁵وِالمَسِيحْ زَادَا مَا حَطِّشْ رُوحُو فِي البْلاَصَة مْتَاعْ كْبيرْ الكُهَّانْ، آمَا اللهْ هُوَ الِّي قَالُّو: «إِنْتِ ابْنِي وْآنَا اليُومْ جِبْتِكْ.»

⁶وْقَالُّو فِي بْلاَصَة أُخْرَى فِي الكْتَابْ المُقَدَّسْ: «إِنْتِ كَاهِنْ لِلأَبَدْ مِنْ فِرْقِةْ مَلْكِيصَادِقْ.»

⁷وْهُوَ الِّي وَقْتِلِّي كَانْ بَشَرْ صَلَّى وِتْشَحِّتْ رَبِّي الِّي قَادِرْ بَاشْ يْخَلّْصُو مِالمُوتْ وْهُوَ يْصِيحْ بِالقْوِي وْيِبْكِي، وْسْمَعْلُو عْلَى خَاطْرُو مُتَّقِي.

⁸وْرَغْمِلِّي هُوَ الإِبْنْ تْعَلِّمْ الطَّاعَة بِالوْجَايِعْ الِّي عَانَاهَا.

⁹وْوَقْتِلِّي وْصُلْ لِلكَمَالْ وَلَّى سْبَبْ فِي إِنُّو الِّي يْطِيعُوهْ الكُلْهُمْ يُخْلْصُوا لِلأَبَدْ،

¹⁰وِالله سَمَّاهْ كْبيرْ الكُهَّانْ فِي الفِرْقَة مْتَاعْ مَلْكِيصَادِقْ.

¹¹وْعَنْدْنَا بَرْشَة كْلاَمْ انَّجّْمُوا نْقُولُوهْ عْلَى الرَّاجِلْ هَاذَا، آمَا صْعِيبْ بَاشْ نْفَسّْرُوهْ عْلَى خَاطِرْكُمْ تِفْهْمُوا بِصْعُوبَة،

¹²وْكَانْ لاَزِمْكُمْ تَوَّا تْوَلِّيوْا مُعَلّْمِينْ، آمَا إِنْتُومَا مَازِلْتُوا مِحْتَاجِينْ لِشْكُونْ يْعَلِّمْكُمْ الحَاجَاتْ الأُولَى مْتَاعْ كِلْمِةْ اللهْ. إِنْتُومَا مِحْتَاجِينْ لِلحْلِيبْ، مُوشْ لْمَاكْلَة قْوِيَّة.

¹³وِلِّي يُشْرُبْ الحْلِيبْ آكَاهُو رَاهُو طْفُلْ صْغِيرْ مَا عِنْدُوشْ خِبْرَة فِي الكْلاَمْ مْتَاعْ البِرْ.

¹⁴آمَا المَاكْلَة القْوِيَّة، رَاهِي لِلكْبَارْ الِّي إِحْسَاسْهُمْ مْدَرِّبْ عْلَى إِنُّو يْفَرِّقْ مَا بِينْ الخِيرْ وِالشَّرْ.