Read Tunisian Arabic New Testament العِبْرَانِيِّينْ 6 Bible Online

العِبْرَانِيِّينْ 6 - Tunisian Arabic New Testament bible

العِبْرَانِيِّينْ 6

¹خَلِّينَا بَعْدْ مَا عْرَفْنَا مَبادئْ تَعْليمْ الْمسِيحْ، نِتْعَدَّاوْ لِلتَّعْلِيمْ الكَامِلْ، مَنْ غِيرْ مَا نِتْخَلّوا عْلَى التَّوْبَة عْلَى الأَعْمَالْ الخَايْبَة وِالإِيمَانْ بِالله

²وِالعِبَادَاتْ مْتَاعْ المَعْمُودِيَّة وْحَطَّانْ اليْدِينْ وِقْيَامِةْ المُوتَى وِالحُكْمْ الِّي يْدُومْ لِلأَبَدْ.

³وْهَاذَا هُوَ الشَّيْء الِّي بَاشْ نَعْمْلُوهْ إِنْ شَاءْ اللهْ.

⁴رَاهُمْ الِّي شَافُوا النُّورْ مَرَّة وْذَاقُوا المَوْهْبَة مْتَاعْ السْمَاءْ وْوَلاَّوْ مْشَارْكِينْ فِي الرُّوحْ القُدُسْ،

⁵وْذَاقُوا كِلْمِةْ اللهْ الصَّالْحَة وِالمُعْجْزَاتْ مْتَاعْ الزْمَانْ الجَّايْ،

⁶وِمْبَاعِدْ طَاحُوا، صْعِيبْ عْلِيهُمْ بَاشْ يِتْجَدَدُوا وْيَرْجْعُوا يْتُوبُوا عْلَى خَاطِرْهُمْ يُصْلْبُوا إِبْنْ اللهْ مَرَّة أُخْرَى وِيْجِيبُولُو العَارْ.

⁷كِيفْ كُلْ أَرْضْ شُرْبِتْ مِالمْطَرْ الِّي صَبِّتْ عْلِيهَا بَرْشَة مَرَّاتْ وْجَابِتْ خُضْرَة بَاهْيَة لِلِّي تْزُرْعِتْ عْلَى خَاطِرْهُمْ، رَاهُو اللهْ يْبَارِكْهَا.

⁸آمَا إِذَا كَانْ جَابِتْ شُوكْ وِسْدِرْ، رَاهِي مَرْفُوضَة وِقْريبْ تِتْلْعَنْ وْعَاقْبِتْهَا هِيَ انّْهَا تِتْحْرَقْ.

⁹وْرَغْمِلِّي أَحْنَا نْقُولُوا فِي الكْلاَمْ هَاذَا، يَا حْبَابْنَا، رَانَا مِتْأَكّْدِينْ الِّي عِنْدْكُمْ حَاجَاتْ مَا خِيرْ تْخَلِّيكُمْ تُخْلْصُوا.

¹⁰رَاهُو اللهْ مُوشْ ظَالِمْ حَتَّى لِينْ يِنْسَى الشَّيْء الِّي عْمَلْتُوهْ وِالمْحَبَّة الِّي ظَهِّرْتُوهَا وَقْتِلِّي خْدِمْتُوا الإِخْوَة المُؤْمْنِينْ وْمَا زِلْتُوا تِخْدْمُوا فِيهُمْ عْلَى خَاطِرْ إِسْمُو.

¹¹آمَا أَحْنَا رَانَا نْحِبُّوا كُلْ وَاحِدْ فِيكُمْ يْوَرِّي الِّي هُوَ يَسْعَى كِيفْ مَا هَكَّا حَتَّى لِلإِخْرْ، بَاشْ الثِّيقَة الكَامْلَة الِّي فِي الرّجَاءْ مْتَاعْكُمْ اتِّمْ.

¹²مَا نْحِبُّوكُمْشْ تْكُونُوا بُخْلِيِّينْ، آمَا تَبّْعُوا النَّاسْ الِّي يِمّْنُوا وْيُصْبْرُوا، وْيُورْثُوا الشَّيْء الِّي وْعِدْ بِيهْ اللهْ.

¹³وْوَقْتِلِّي اللهْ وْعِدْ إِبْرَاهِيمْ حْلِفْ بْرُوحُو، عْلَى خَاطْرُو مَا عِنْدُوشْ شْكُونْ هُوَ أَعْظِمْ مِنْ رُوحُو بَاشْ يِحْلِفْ بِيهْ،

¹⁴قَالْ: «بَاشْ نْبَارْكِكْ وِنْكَثِّرْ ذُرِّيتِكْ بَرْشَة.»

¹⁵وْهَكَّا صْبَرْ إِبْرَاهِيمْ وْنَالْ الوَعْدْ.

¹⁶وِالنَّاسْ يِحْلْفُوا بِشْكُونْ هُوَ أَعْظِمْ مِنْهُمْ، وِالحَلْفَانْ يْأَكّْدُوا بِيهْ كْلاَمْهُمْ وِيْقُصُّوا العْنَادْ.

¹⁷وِالله زَادَا، زَادْ عْلَى كْلاَمُو بِالحَلْفَانْ، كِحَبْ يْأَكِّدْ لِلوَارْثِينْ الوَعْدْ بَاشْ يْتَمِّمْ الشَّيْء الِّي يْحِبْ عْلِيهْ.

¹⁸وْإِحْنَا الِّي شَادِّينْ فِي رَبِّي، عِنْدْنَا مَا يْشَجِّعْنَا بَرْشَة بَاشْ نْشِدُّوا صْحِيحْ فِي الرّجَاءْ الِّي عْطَاهُولْنَا بِالوَعْدْ وِالْقَسَمْ، وْهُومَا حَاجْتِينْ ثَابْتِينْ مُوشْ مُمْكِنْ اللهْ يِكْذِبْ فِيهُمْ.

¹⁹وِالثِّيقَة هَاذِي لِنْفُوسْنَا كِيفْ المُخْطَافْ القْوِي الِّي يِتْعَمِّلْ عْلِيهْ وْيُدْخُلْ لِلبْلاَصَة الدَّخْلاَنِيَّة الِّي وْرَاء الحْجَابْ.

²⁰لْوِينْ دْخَلْ يَسُوعْ عْلَى خَاطِرْنَا، كِسْبِقْنَا، وْوَلَّى كْبِيرْ الكُهَّانْ لِلأَبَدْ فِي الفِرْقَة مْتَاعْ مَلْكِيصَادِقْ.