Read Tunisian Arabic New Testament العِبْرَانِيِّينْ 8 Bible Online

العِبْرَانِيِّينْ 8 - Tunisian Arabic New Testament bible

العِبْرَانِيِّينْ 8

¹وْآخِرْ كِلْمَة هِيَ إِنَّا عِنْدْنَا كْبِيرْ كُهَّانْ كِيفْ هَكَّا، قْعَدْ عْلَى يْمِينْ عَرْشْ القُوَّة الِّي فِي السْمَاءْ،

²يِخْدِمْ فِي قُدْسْ الأَقْدَاسْ وِالخِيمَة الحَقَّانِيَّة الِّي عْمَلْهَا الرَّبْ مُوشْ الإِنْسَانْ.

³وْكُلْ كْبيرْ كُهَّانْ يِتْحَطْ بَاشْ يْقَدِّمْ القَرَابِينْ وِالذْبَايِحْ، هَاذَاكَا عْلاَشْ كْبِيرْ الكُهَّانْ مْتَاعْنَا يِلْزِمْ يْكُونْ عَنْدُو شَيْء يْقَدّْمُو.

⁴لُوكَانْ جَا يَسُوعْ فِي الأَرْضْ تَالِي رَاهُو مَا تْحَطِّشْ كَاهِنْ، عْلَى خَاطِرْ ثَمَّة كُهَّانْ يْقَدّْمُوا القَرَابِينْ كِيفْ مَا تْقُولْ الشَّرِيعَة.

⁵هَاذُومَا يِخْدْمُوا فِي شَيْء يِشْبِهْ لِلسْمَاوَاتْ وِالظِّلْ مْتَاعْهَا. وَقْتِلِّي مُوسَى حَبْ يَعْمِلْ الخِيمَة وْحَى لِيهْ اللهْ وْقَالْ: «أَحْرِصْ بَاشْ تَعْمِلْ كُلْ شَيْء كِيفْ مَا وَرِّيتِكْ فُوقْ الجْبَلْ.»

⁶آمَا المَسِيحْ خْذَا خِدْمَة خِيرْ مِلِّي خْذَاوْهَا الكُهَّانْ الِّي قَبْلُو عْلَى قَدْرْ مَاهُو وْسِيطْ مْتَاعْ عَهْدْ خِيرْ مِالعَهْدْ الأُوِّلْ، عْلَى خَاطْرُو مِبْنِي عْلَى وُعُودْ خِيرْ مِنْ الوُعُودْ هَاذُوكُمْ.

⁷لُوكَانْ جَا العَهْدْ الأُوِّلْ مَا فِيهِشْ حَتَّى عِيبْ، تَالِي رَاهُو مُوشْ لاَزِمْ يْجِي عَهْدْ ثَانِي.

⁸وِالله يْلُومْ شَعْبُو وَقْتِلِّي يْقُولْ: «هَامْ بَاشْ يْجِيوْ أَيَّامَاتْ نَعْمِلْ فِيهُمْ عَهْدْ جْدِيدْ مْعَ بَنِي إِسْرَائِيلْ وِمْعَ بَنِي يَهُوذَا،

⁹مُوشْ كِيفْ العَهْدْ الِّي عْمَلْتُو مْعَ جْدُودْهُمْ. مِنْ يْدِيهُمْ شَّدِّيتْهُمْ، وْمِنْ أَرْضْ مَصْرْ خَرِّجْتْهُمْ، يَاخِي مَا ثِبْتُوشْ عْلَى عَهْدِي. هَاذَاكَا عْلاَشْ هَمِّلْتْهُمْ، يْقُولْ رَبِّي.

¹⁰وْهَاذَا هُوَ العَهْدْ الِّي نْعَاهِدْ بِيهْ بَنِي إِسْرَائِيلْ بَعْدْ الأَيَّامَاتْ هَاذُومَا، يْقُولْ رَبِّي: بَاشْ نْحُطْ الشَّرِيعَة مْتَاعِي فِي عْقُولْهُمْ وْنِكْتِبْهَا عْلَى قْلُوبْهُمْ، وِيْكُونُوا شَعْبِي وِنْكُونْ إِلاَهْهُمْ.

¹¹وْحَتَّى وَاحِدْ مَا هُو بَاشْ يْعَلِّمْ وِلْدْ بْلاَدُو وِلاَّ خُوهْ وِيْقُلُّو: أَعْرِفْ رَبِّي، عْلَى خَاطِرْهُمْ بَاشْ يَعْرْفُونِي الكُلْهُمْ مِنْ صْغِيرْهُمْ لِكْبِيرْهُمْ،

¹²رَانِي نِغْفْرِلْهُمْ ذْنُوبْهُمْ وْعُمْرِي مَا نِتْذَكِّرْ غْلاَطْهُمْ.»

¹³وِالله كِتْكَلِّمْ عْلَى عَهْدْ جْدِيدْ رَدْ العَهْدْ الأُوِّلْ قْدِيمْ، وْكُلْ شَيْء وَلَّى قْدِيمْ وِكْبِرْ وِقْريبْ يِفْنَى.