Read Tunisian Arabic New Testament العِبْرَانِيِّينْ 9 Bible Online

العِبْرَانِيِّينْ 9 - Tunisian Arabic New Testament bible

العِبْرَانِيِّينْ 9

¹العَهْدْ الأُوِّلْ كَانِتْ عَنْدُو فَرَايِضْ مْتَاعْ العِبَادَة وِبْلاَصَة مُقَدّْسَة فِي الأَرْضْ.

²رَاهِي كَانِتْ ثَمَّة خِيمَة مَنْصُوبَة هِيَ الخِيمَة الِّي مِنْ قُدَّامْ وْتِتْسَمَّى قُدْسْ الأَقْدَاسْ، وْفِيهَا المْنَارَة وْطَاوِلْةْ الخُبْزْ مْتَاعْ القُرْبَانْ.

³وْكَانْ ثَمَّة وْرَاء الحْجَابْ الثَّانِي خِيمَة أُخْرَى يِتْقَالِلْهَا قُدْسْ الأَقْدَاسْ،

⁴وْفِيهَا الكَانُونْ مْتَاعْ الذْهَبْ وْتَابُوتْ العَهْدْ وِالكُلُّو مْغَلِّفْ بِالذْهَبْ، وْفِيهْ طَاسَة ذْهَبْ فِيهَا المَنْ وْفِيهْ عْصَا هَارُونْ الِّي طَلّْعِتْ الوْرَقْ وِاللُّوحْتِينْ مْتَاعْ العَهْدْ.

⁵وِالكَارُوبِيمْ مْتَاعْ المَجْدْ كَانُوا فُوقْ التَّابُوتْ يْظَلَلُوا عْلَى الغْطَاءْ الِّي كَانْ يِتْسَمَّى كُرْسِي الرَّحْمَة حَاجَاتْ مَا انَّجّْمُوشْ تَوَّا نَحْكِيوْ عْلِيهُمْ بِالتَّفْصِيلْ.

⁶كِتْكُونْ الحَاجَاتْ هَاذِي حَاضْرَة هَكَّا، يُدْخْلُوا الكُهَّانْ لِلخِيمَة الأُولَى فِي كُلْ وَقْتْ وْيَعْمْلُوا الفَرَايِضْ مْتَاعْ العِبَادَة.

⁷آمَا كْبِيرْ الكُهَّانْ هُوَ وَحْدُو الِّي يُدْخُلْ لِلخِيمَة الثَّانْيَة مَرَّة فِي العَامْ، وْمَا يُدْخْلِلْهَا إِلاَّ إِذَا كَانْ هَازْ الدَّمْ الِّي يْقَدّْمُو كَفَّارَة عْلَى ذْنُوبُو وِعْلَى الذْنُوبْ الِّي عَمْلُوهَا الشَّعْبْ مِنْ غِيرْ مَا يُقْصْدُوا

⁸وبِالشَّيْء هَاذَا الرُّوحْ القُدُسْ يْوَرِّي الِّي الطْرِيقْ لْقُدْسْ الأَقْدَاسْ مُوشْ مَحْلُولْ مَا دَامْهَا الخِيمَة الأُولَى مَازَالِتْ مُوجُودَة.

⁹وِالشَّيْء هَاذَا يْلَمَّحْ لِلوَقْتْ الحَاضِرْ، وْكَانُوا يْقَدّْمُوا فِيهْ فِي قَرَابِينْ وِذْبَايِحْ مَا تْرُدِّشْ الضَّمِيرْ مْتَاعْ الِّي يْقَدِّمْ فِيهُمْ كَامِلْ.

¹⁰وْهُومَا فَرَايِضْ يْخُصُّوا البْدَنْ وْمَحْصُورِينْ فِي المَاكْلَة وِالشْرَابْ وْبَرْشَة طُرُقْ مْتَاعْ غْسِيلْ، وْكَانِتْ لاَزْمَة حَتَّى لِينْ يْجِي الوَقْتْ الِّي يْصَلِّحْ فِيهْ اللهْ كُلْ شَيْء.

¹¹آمَا المَسِيحْ جَا كْبيرْ الكُهَّانْ لِلخِيرَاتْ الِّي بَاشْ تْجِي وِتْعَدَّى فِي خِيمَة أَعْظِمْ وْكَامْلَة، مَا هِيشْ مَصْنُوعَة بِيْدِينْ البَشَرْ، مَعْنَاهَا مَاهِيشْ تَابْعَة لِلخْلِيقَة هَاذِي،

¹²وِدْخَلْ لْقُدْسْ الأَقْدَاسْ مَرَّة وَحْدَة، مُوشْ بْدَمْ العْتَارِيسْ وِالعْجُولْ، آمَا بْدَمُّو، وِفْدَانَا لِلأَبَدْ.

¹³إِذَا كَانْ رَشَّانْ دَمْ العْتَارِيسْ وِالثِّيرَانْ وِرْمَادْ عِجْلَة يْقَدِّسْ المَنْزُوسِينْ وِيْطَهّْرِلْهُمْ بْدُونَاتْهُمْ،

¹⁴إِمَّالاَ دَمْ المَسِيحْ الِّي قَدِّمْ رُوحُو للهْ بِالرُّوحْ الِّي يَبْقَى لِلأَبَدْ قُرْبَانْ مَا فِيهِشْ حَتَّى عِيبْ، قَدَّاشْ بَاشْ يْكُونْ قَادِرْ عْلَى إِنُّو يْطَهِّرْ ضَمَايِرْنَا مِالأَعْمَالْ المِيتَة بَاشْ نِعْبْدُوا اللهْ الحَيْ.

¹⁵هَاذَاكَا عْلاَشْ هُوَ الوْسِيطْ الِّي جَابْ عَهْدْ جْدِيدْ لِلمِسْتَدْعِينْ لِيهْ بَاشْ يَاخْذُوا مِيرَاثْ مَوْعُودْ بِيهْ يْدُومْ لِلأَبَدْ، عْلَى خَاطْرُو مَاتْ كَفَّارَة عْلَى الذْنُوبْ الِّي عْمَلْهَا الشَّعْبْ فِي أَيَّامَاتْ العَهْدْ الأُوِّلْ.

¹⁶وِينْ تْكُونْ ثَمَّة الوْصِيَّة يِلْزِمْ نْوَرِّيوْ إِنُّو الِّي وَصَّى بِيهَا مَاتْ،

¹⁷الوْصِيَّة مَرْهُونَة فِي مُوتْ الِّي وَصَّى بِيهَا، مَا عِنْدْهَاشْ حَتَّى قِيمَة إِذَا كَانْ مُولاَهَا مَازَالْ حَيْ.

¹⁸هَاذَاكَا عْلاَشْ حَتَّى العَهْدْ الأُوِّلْ ثْبِتْ بِالدَّمْ،

¹⁹مُوسَى بَعْدْ مَا خَبِّرْ الشَّعْبْ بِالوْصَايَا الكُلْهُمْ كِيفْ مَا هُومَا مُوجُودِينْ فِي الشَّرِيعَة، خْذَا دَمْ العْجُولْ وِالعْتَارِيسْ، وِمْعَاهْ مَاء وْصُوفْ أَحْمَرْ وْعُودْ رِيحَانْ، وْرَشُّو عْلَى كْتَابْ الشَّرِيعَة بِيدُو وِعْلَى الشَّعْبْ الكُلُّو

²⁰وْقَالْ: «هَاذَا هُوَ الدَّمْ الِّي يْثَبِّتْ العَهْدْ الِّي أْمَرْكُمْ بِيهْ اللهْ.»

²¹وْمُوسَى زَادْ رَشْ الخِيمَة وِالمَاعُونْ مْتَاعْ العِبَادَة بِالدَّمْ.

²²وْمَحْسُوبْ فِي الشَّرِيعَة حَتَّى شَيْء مَا يْوَلِّي طَاهِرْ كَانْ بِالدَّمْ، وْمَا ثَمَّاشْ غُفْرَانْ الذْنُوبْ إِذَا كَانْ مَا سَالِشْ الدَّمْ.

²³إِذَا كَانْ الأُمُورْ الِّي تِشْبِهْ لِلحَاجَاتْ الِّي فِي السْمَاءْ يِلْزِمْهَا تِطَّهِّرْ بِالفَرَايِضْ هَاذِي، رَاهِي الحَاجَاتْ الِّي فِي السْمَاءْ بِيدْهَا يِلْزِمْهَا تِطَّهِّرْ بِذْبَايِحْ خِيرْ مِنْ هَاذِيكَا،

²⁴رَاهُو المَسِيحْ مَا دْخَلْشْ لِبْلاَصَة مُقَدّْسَة عَمْلِتْهَا يْدِينْ البَشَرْ تِشْبِهْ لِلبْلاَصَة المُقَدّْسَة الحَقَّانِيَّة، آمَا رَاهُو دْخَلْ لِلسْمَاء بِيدْهَا بَاشْ تَوَّا يُظْهُرْ قُدَّامْ اللهْ عْلَى خَاطِرْنَا،

²⁵مُوشْ عْلَى خَاطْرُو بَاشْ يْقَدِّمْ رُوحُو بَرْشَة مَرَّاتْ كِيفْ مَا كْبِيرْ الكُهَّانْ يُدْخُلْ لْقُدْسْ الأَقْدَاسْ كُلْ عَامْ هَازْ دَمْ مُوشْ دَمُّو،

²⁶مَا كَانِشْ يِلْزْمُو يِتْعَذِّبْ بَرْشَة مَرَّاتْ مِلِّي تْخَلْقِتْ الدِّنْيَا. آمَا هُوَ ظْهُرْ تَوَّا مَرَّة وَحْدَة فِي آخِرْ الزْمَانْ بَاشْ يْنَحِّي الذْنُوبْ كِيْقَدِّمْ رُوحُو ذْبِيحَة للهْ.

²⁷وْكِيفْ مَا البَشَرْ مْقَدِّرْ لِيهُمْ إِنّْهُمْ يْمُوتُوا مَرَّة وَحْدَة، وِمْبَاعِدْ يِتْحَاسْبُوا،

²⁸المَسِيحْ زَادَا قَدِّمْ رُوحُو مَرَّة وَحْدَة بَاشْ يْنَحِّي ذْنُوبْ بَرْشَة نَاسْ. وْبِشْ يُظْهُرْ مَرَّة ثَانْيَة، مُوشْ عْلَى خَاطِرْ الذْنُوبْ، آمَا بَاشْ الِّي يِسْتَنُّوا فِيهْ يُخْلْصُوا.