Read Tunisian Arabic New Testament يَعْقُوبْ 1 Bible Online

يَعْقُوبْ 1 - Tunisian Arabic New Testament bible

يَعْقُوبْ 1

¹سَلاَمْ مِنْ يَعْقُوبْ عَبْدْ اللهْ وِالرَّبْ يَسُوعْ المَسِيحْ لِلمُؤْمْنِينْ المْفَرّْقِينْ مِنْ العْرُوشَاتْ الأَثْنَاشْ مْتَاعْ بَنِي إِسْرَائِيلْ.

²أَفْرْحُوا بَرْشَة، يَا إِخْوْتِي، وَقْتِلِّي تَاقْعُوا فِي أَنْوَاعْ المَشَاكِلْ الكُلْهَا.

³إِنْتُومَا تَعْرْفُوا الِّي إِيمَانْكُمْ كِيِتْجَرِّبْ فِيهَا يْجِيبْ الصَّبْرْ.

⁴خَلِّي الصَّبْرْ تْكُونْ عَنْدُو أَعْمَالْ كَامْلَة بَاشْ تْوَلِّيوْا كَامْلِينْ مِالجِيهَاتْ الكُلْهَا، مُوشْ نَاقِصْكُمْ حَتَّى شَيْء.

⁵وْإِذَا كَانْ وَاحِدْ فِيكُمْ تُنْقْصُو الحِكْمَة، خَلِّيهْ يُطْلُبْهَا مِنْ عِنْدْ اللهْ، رَاهُو اللهْ يَعْطِي لِلنَّاسْ الكُلْ بِالفَايِضْ وْمَا يْلُومِشْ.

⁶وْخَلِّيهْ يُطْلُبْهَا بْإِيمَانْ مَا فِيهِشْ حَتَّى شَكْ، عْلَى خَاطِرْ الِّي يْشِكْ يِشْبِهْ لْمُوجْ البْحَرْ وَقْتِلِّي تَلْعِبْ بِيهْ الرِّيحْ وِتْحَرّْكُو.

⁷وْوَاحِدْ كِيفْ هَاذَا مَا يِلْزْمُوشْ يِتْصَوِّرْ الِّي هُوَ بَاشْ يَاخُذْ حَاجَة مِنْ عِنْدْ الرَّبْ،

⁸الإِنْسَانْ الِّي رَايُو مُوشْ ثَابِتْ رَاهُو يِتْرَدِدْ فِي الحَاجَاتْ الِّي يَعْمِلْهُمْ الكُلْهُمْ.

⁹خَلِّي الخُو المِتْوَاضَعْ يِتْفُوخِرْ عْلَى خَاطْرُو قَدْرُو عَالِي

¹⁰وِالغْنِي يِتْفُوخِرْ عْلَى خَاطْرُو مِتْوَاضَعْ، رَاهُو الغْنِى يِفْنَى كِيفْ النُّوَّارْ مْتَاعْ الحْشِيشْ:

¹¹الشَّمْسْ الِّي تَحْرِقْ تُطْلُعْ وِتْيَبِّسْ الحْشِيشْ، يَاخِي النُّوَّارْ مْتَاعُو يْطِيحْ وْمَا عَادِشْ يْوَلِّي جْمِيلْ. هَكَّاكَا يِذْبِلْ الغْنِي وَقْتِلِّي هُوَ لاَهِي فِي الحَاجَاتْ الِّي يَعْمِلْ فِيهُمْ.

¹²صَحَّة لِيهْ الِّي يُصْبُرْ عْلَى التَّجْرْبَة، عْلَى خَاطْرُو كِيِنْجَحْ فِي التَّجْرْبَة يَاخُذْ التَّاجْ مْتَاعْ الحَيَاةْ الِّي وْعِدْ بِيهْ الرَّبْ النَّاسْ الِّي يْحِبُّوهْ.

¹³وْإِذَا وَاحِدْ دْخَلْ فِي تَجْرْبَة، مَا يِلْزْمُوشْ يْقُولْ: «المِحْنَة هَاذِي مِنْ عِنْدْ اللهْ!» عْلَى خَاطِرْ اللهْ مَا يْجَرّْبُوشْ الشَّرْ وْهُوَ مَا يْجَرَّبْ حَتَّى حَدْ بِالشَّرْ،

¹⁴آمَا الإِنْسَانْ يِتْجَرِّبْ وَقْتِلِّي تِخْدْعُو وِتْغُرُّو الشَّهْوَة مْتَاعُو.

¹⁵وِالشَّهْوَة إِذَا تِحْبِلْ تْجِيبْ الذَّنْبْ، وِالذَّنْبْ إِذَا يِكْبِرْ يْجِيبْ المُوتْ.

¹⁶يَا خْوَاتِي الِّي نْحِبّْهُمْ، مَا تِتْخِدْعُوشْ

¹⁷كُلْ هْدِيَّة صَالْحَة وْكُلْ مَوْهْبَة كَامْلَة تِنْزِلْ مِنْ فُوقْ، مِنْ عِنْدْ بُو الأَنْوَارْ. وْهُوَ الِّي لاَ يِتْبَدِّلْ وْلاَ يْدُورْ وْلا عِندُو ظُّلْ،

¹⁸وْلِدْنَا بْكِلْمِةْ الحَقْ كِيفْ مَا حَبْ بَاشْ نْكُونُوا الغَلَّة الأُولَى مْتَاعْ الخْلِيقَة.

¹⁹أَعْرْفُوا الشَّيْء هَاذَا، يَا خْوَاتِي الِّي نْحِبّْهُمْ، خَلِّي كُلْ وَاحِدْ فِيكُمْ يِسْمَعْ فِيسَعْ وْيِتْكَلِّمْ فِي عَقْلُو، يَاخُذْ وَقْتْ بَاشْ يِتْغَشِشْ،

²⁰رَاهُو الغُشْ مْتَاعْ الإِنْسَانْ مَا يَعْمِلْشْ البِرْ مْتَاعْ اللهْ.

²¹إِمَّالاَ أَرْمِيوْ عْلِيكُمْ النْزَاسَة الكُلْهَا وْأَيْ شَرْ مَازِلْتُوا تَعْمْلُوا فِيهْ، وْإِقْبْلُوا بِسْهُولَة الكِلْمَة الِّي مَغْرُوسَة فِيكُمْ وِلِّي قَادْرَة بَاشْ تْخَلِّصْ نْفُوسْكُمْ.

²²مَا تِسْمْعُوشْ كْلاَمْ اللهْ آكَاهُو مِنْ غِيرْ مَا تَعْمْلُوا بِيهْ وِتْغُشُّوا رْوَاحْكُمْ.

²³الِّي يِسْمَعْ الكْلاَمْ وْمَا يَعْمِلْشْ بِيهْ يْكُونْ كِيفْ الِّي يْشُوفْ وِجْهُو فِي المْرَايَة،

²⁴رَاهُو يْشُوفْ وِجْهُو وْيِمْشِي، وِمْبَاعِدْ يِنْسَى رُوحُو بِالوَقْتْ كِيفَاشْ كَانْ.

²⁵وْآمَا الِّي يْشُوفْ الشَّرِيعَة الكَامْلَة، شَرِيعِةْ الحُرِّيَّة، وِيْدَاوِمْ عْلِيهَا، مُوشْ يِسْمَعْ ويِنْسَى، آمَا يَعْمِلْ بِيهَا، صَحَّة لِيهْ فِي الشَّيْء الِّي يَعْمْلُو.

²⁶وِلِّي مَاشِي فِي بَالُو الِّي هُوَ مِدَّيِّنْ وْمَا يْشِدِّشْ لْسَانُو، رَاهُو يِخْدَعْ فِي رُوحُو وِالتَّدَيُّنْ مْتَاعُو فَارِغْ.

²⁷رَاهُو التَّدَيُّنْ الطَّاهِرْ وِالنْظِيفْ عِنْدْ اللهْ الآبْ هُوَ إِنُّو الإِنْسَانْ يِتْلْهَى بِاليْتَامَى وِالنْسَاء الِّي رْجَالْهُمْ مُوتَى فِي ضِيقْهُمْ، وْإِنُّو يْصُونْ رُوحُو مِالنْجَاسَة مْتَاعْ العَالَمْ.