Read Tunisian Arabic New Testament يَعْقُوبْ 2 Bible Online

يَعْقُوبْ 2 - Tunisian Arabic New Testament bible

يَعْقُوبْ 2

¹وْمَا دَامْكُمْ، يَا خْوَاتِي، مُؤْمْنِينْ بْرَبْنَا يَسُوعْ المَسِيحْ الِّي لِيهْ المَجْدْ، مَا تْمَيّْزُوشْ حَتَّى حَدْ عْلَى الآخَرْ.

²إِذَا كَانْ دْخَلْ لِلمَجْمَعْ مْتَاعْكُمْ وَاحِدْ غْنِي فِي صْوَابْعُو خْوَاتِمْ ذْهَبْ وْلاَبِسْ لِبْسَة غَالْيَة، وِمْبَاعِدْ دْخَلْ وَاحِدْ فْقِيرْ لاَبِسْ لِبْسَة قْدِيمَة،

³وِتْلَفِّتُّوا لِلِّي لاَبِسْ اللِّبْسَة الغَالْيَة وْقُلْتُولُو: «إِنْتِ أُقْعُدْ هْنَا فِي البْلاَصَة الأُولَى»، وْقُلْتُوا لِلفْقِيرْ: «إِنْتِ آقِفْ لْغَادِي»، وِلاَّ «أُقْعُدْ هْنَا عِنْدْ سَاقِينَا»،

⁴إِذَا عْمَلْتُوا هَكَّا، يَاخِي مَا تْكُونُوشْ فَرِّقْتُوا مَا بِينْ بْعَضْكُمْ وْوَلِّيتُوا تُحْكْمُوا بْنِيَّة خَايْبَة؟

⁵اسْمْعُوا، يَا إِخْوْتِي الِّي نْحِبّْهُمْ: يَاخِي مُوشْ اللهْ خْتَارْ الفُقَرَاءْ مْتَاعْ العَالَمْ هَاذَا بَاشْ يْكُونُوا غُنْيَا بِالإِيمَانْ وْيُورْثُوا المَمْلْكَة الِّي وْعِدْ بِيهَا الِّي يْحِبُّوهْ؟

⁶وْإِنْتُومَا تَحْقْرُوا فِي الفْقِيرْ! وِشْكُونْهُمْ الِّي يُظْلْمُوا فِيكُمْ وِيْهِزُّوا فِيكُمْ لِلمْحَاكِمْ، يَاخِي مُوشْ الغُنْيَا؟

⁷يَاخِي مُوشْ هُومَا الِّي يَكْفْرُوا بِالإِسْمْ العْظِيمْ الِّي تِدْعِيتُوا بِيهْ؟

⁸إِذَا كَانْ تَعْمْلُوا بْأَعْظِمْ وْصِيَّة فِي الشَّرِيعَة الِّي وَصَّى بِيهَا الكْتَابْ المُقَدَّسْ، وِلِّي هِيَ: «حِبْ قْرِيبِكْ كِيفْ مَا تْحِبْ رُوحِكْ»، رَاهُو أَحْسِنْ مَا تَعْمْلُوا.

⁹وْآمَا إِذَا كَانْ عَامِلْتُوا وَاحِدْ عْلَى الآخَرْ رَاكُمْ تَعْمْلُوا ذَنْبْ وِالشَّرِيعَة تُحْكُمْ عْلِيكُمْ الحُكْمْ مْتَاعْهَا الِّي تُحْكْمُو عْلِيكُمْ كِيفْ ظَالْمِينْ.

¹⁰وِلِّي عْمَلْ بِالشَّرِيعَة الكُلْهَا وْقَصِّرْ فِي وْصِيَّة وَحْدَة مِنْهَا رَاهُو غْلُطْ فِيهَا الكُلْهَا،

¹¹رَاهُو الِّي قَالْ: «مَا تَزْنَاشْ»، قَالْ زَادَا: «مَا تُقْتُلْشْ.» وْإِذَا كَانْ قْتَلْتْ وْمَا زْنِيتِشْ، رَاكْ كَسِّرْتْ الشَّرِيعَة.

¹²إِمَّالاَ اتْكَلّْمُوا وْأَعْمْلُوا كِيفْ النَّاسْ الِّي اللهْ بَاشْ يُحْكُمْ عْلِيهُمْ بِالشَّرِيعَة الِّي تْرُدّْنَا أَحْرَارْ،

¹³رَاهُو الحُكْمْ مَا يَرْحِمْشْ الِّي مَا يَرْحِمْشْ، وِالرَّحْمَة تِغْلِبْ الحُكْمْ.

¹⁴شْنُوَّة فَايِدْةْ الإِنْسَانْ، يَا إِخْوْتِي، كِيْقُولْ الِّي هُوَ عَنْدُو إِيمَانْ مِنْ غِيرْ مَا تْكُونْ عَنْدُو أَعْمَالْ؟ يَاخِي الإِيمَانْ هَاذَا يْنَجِّمْ يْخَلّْصُو؟

¹⁵إِذَا كَانْ فِي وُسْطْكُمْ خُو وِلاَّ أُخْتْ عْرَايَا وْمَا عِنْدْهُمْشْ حَتَّى شَيْء يَاكْلُوهْ،

¹⁶شْنُوَّة الفَايْدَة كِتْقُولُولْهُمْ: «امْشِيوْ مُطْمَانِينْ! أُسْخْنُوا وْأَشْبْعُوا»، إِذَا كَانْ مَا تَعْطِيوْهُمْشْ الشَّيْء الِّي مِحْتَاجِينْلُو؟

¹⁷الإِيمَانْ زَادَا، إِذَا كَانُو مِنْ غِيرْ أَعْمَالْ رَاهُو مِيتْ.

¹⁸وْمُمْكِنْ وَاحِدْ مِنْكُمْ يْقُولْ: «إِنْتِ عِنْدِكْ إِيمَانْ وْآنَا عِنْدِي أَعْمَالْ، وَرِّينِي كِيفَاشْ يْكُونْ إِيمَانِكْ مِنْ غِيرْ أَعْمَالْ، وْآنَا نْوَرِّيكْ إِيمَانِي بِالأَعْمَالْ مْتَاعِي.»

¹⁹إِنْتِ تِمِّنْ إِنُّو اللهْ وَاحِدْ؟ هَاذَا بَاهِي. وِالشْوَاطِنْ زَادَا يِمّْنُوا بِيهْ وْيِتْرَعْدُوا.

²⁰يَا بَشَرْ يَلِّي مَا عِنْدِكْشْ عْقَلْ، يَاخِي تْحِبْ دَلِيلْ الِّي الإِيمَانْ يْكُونْ مِنْ غِيرْ فَايْدَة مِنْ غِيرْ أَعْمَالْ؟

²¹شُوفْ بُونَا إِبْرَاهِيمْ، يَاخِي مُوشْ تْبَرِرْ بِالأَعْمَالْ وَقْتِلِّي قَدِّمْ وِلْدُو إِسْحَاقْ عْلَى المَذْبَحْ؟

²²إِنْتِ تْشُوفْ الِّي إِيمَانُو خْدِمْ مْعَ أَعْمَالُو، وْإِيمَانُو وَلَّى كَامِلْ بِالأَعْمَالْ،

²³وْهَكّا تَمْ الشَّيْء الِّي قَالُو الكْتَابْ المُقَدَّسْ: «إِبْرَاهِيمْ امِّنْ بِالله وَاللهْ رَدُّو بَارْ» وِتْسَمَّى خَلِيلْ اللهْ.

²⁴شُفْتُوا كِيفَاشْ، إِمَّالاَ، الِّي الإِنْسَانْ يِتْبَرِرْ بِالأَعْمَالْ مُوشْ بِالإِيمَانْ آكَاهُو.

²⁵كِيفْ رَاحَابْ الِّي سِيرِتْهَا مُوشْ بَاهْيَة زَادَا، يَاخِي مُوشْ تْبَرَرِتْ بِالأَعْمَالْ مْتَاعْهَا وَقْتِلِّي سْتَقْبْلِتْ الرْجَالْ المَبْعُوثِينْ وِمْبَاعِدْ بَعْثِتْهُمْ فِي ثْنِيَّة أُخْرَى؟

²⁶كِيفْ مَا البْدَنْ مِنْ غِيرْ رُوحْ مَيِّتْ، الإِيمَانْ زَادَا مِنْ غِيرْ أَعْمَالْ مَيِّتْ.