Read Tunisian Arabic New Testament يَعْقُوبْ 3 Bible Online

يَعْقُوبْ 3 - Tunisian Arabic New Testament bible

يَعْقُوبْ 3

¹يَا إِخْوْتِي، مَا يِلْزِمْشْ يْكُونْ مِنْكُمْ بَرْشَة مُعَلّْمِينْ. مَا كَانِشْ رَانَا بَاشْ يِتْحْكَمْ عْلِينَا أَكْثِرْ.

²وقَدَّاشْنَا نُغْلْطُوا الكُلْنَا. وْإِذَا كَانْ وَاحِدْ مَا يُغْلُطْشْ فِي كْلاَمُو، رَاهُو كَامِلْ وْقَادِرْ بَاشْ يِتْحَكِّمْ فِي بَدْنُو الكُلُّو.

³خُوذُوا مِثَالْ الحْصَانْ، وَقْتِلِّي نْحُطُّوا اللْجَامْ فِي فُمُّو بَاشْ يْطَاوِعْنَا، نِتْحَكّْمُوا فِي بَدْنُو الكُلُّو.

⁴وِالسْفِينَة زَادَا رَغْمِلِّي هِيَ كْبِيرَة وِالرِّيحْ الِّي تْحَرِّكْ فِيهَا قْوِيَّة، يْسُوقْهَا دْمَانْ صْغِيرْ لْوِينْ يْحِبْ الرَّايِسْ.

⁵وِاللْسَانْ زَادَا هَكَّا، هُوَ عُضْوْ صْغِيرْ آمَا يِتْفُوخِرْ بَرْشَة. شُوفُوا قَدَّاشْهَا صْغِيرَة النَّارْ الِّي تَحْرِقْ غَابَة كْبِيرَة!

⁶وِاللْسَانْ نَارْ، وْمِنْ بِينْ الأَعْضَاءْ مْتَاعْ البْدَنْ هُوَ عَالَمْ مْتَاعْ الشْرُورْ يْنَجِّسْ البْدَنْ الكُلُّو وْيَحْرِقْ حْيَاتْنَا الكُلْهَا مِنْ أَوِّلْهَا لإِخِّرْهَا بْنَارْ جَايَة مِنْ جْهَنِّمْ.

⁷الإِنْسَانْ يْنَجِّمْ يِتْحَكِّمْ فِي الوُحُوشْ وِالطْيُورْ وِالحَيَوَانَاتْ الِّي تَزْحِفْ وِلِّي فِي البْحَرْ،

⁸آمَا اللْسَانْ مَا يْنَجِّمْشْ الإِنْسَانْ يِتْحَكِّمْ فِيهْ. رَاهُو شَرْ مَا يِتْحَازِشْ، مْعَبِّي بِالسِّمْ الْقَاتِلْ،

⁹نْبَارْكُوا بِيهْ رَبّْنَا وْبُونَا وْنِلْعْنُوا بِيهْ النَّاسْ المَخْلُوقِينْ عْلَى صُورِةْ اللهْ.

¹⁰مِالفُمْ هُوَ بِيدُو تُخْرُجْ البَرْكَة وِاللَّعْنَة، وِالشَّيْء هَاذَا مَا يِلْزْمُوشْ يْكُونْ، يَا إِخْوْتِي.

¹¹يَاخِي عِينْ وَحْدَة تْخَرِّجْ المَاء الحْلُو وِالمُرْ؟

¹²يَاخِي الكَرْمَة، يَا إِخْوْتِي، تْجِيبْ الزِّيتُونْ وِلاَّ العِنْبَايَة تْجِيبْ الكَرْمُوسْ؟ وِالعِينْ المَالْحَة زَادَا مَا تْخَرِّجِّشْ المَاء الحْلُو.

¹³شْكُونُو هُوَ حَكِيمْ وْعَارِفْ مَا بِينَاتْكُمْ؟ إِمَّالاَ خَلِّيهْ يْوَرِّي أَعْمَالُو الصَّالْحَة كِيَعْمِلْهَا بْتَوَاضُعْ وْحِكْمَة.

¹⁴آمَا اذَا كَانْ قْلُوبْكُمْ فِيهَا الحُسْدْ وِالعَرْكْ، إِمَّالاَ مَا تِتْفُوخْرُوشْ وْمَا تِكْذْبُوشْ عْلَى الحَقْ.

¹⁵الحِكْمَة الِّي كِيفْ هَاذِي رَاهِي مَا تَهْبِطْشْ مِنْ فُوقْ، آمَا رَاهِي حِكْمَة مْتَاعْ الدِّنْيَا هَاذِي مْتَاعْ البَشَرْ وِالشْوَاطِنْ.

¹⁶رَاهُو وِينْ ثَمَّة الحُسْدْ وِالأَنَانِيَّة، ثَمَّة القْلَقْ وِالشْرُورْ الكُلْهَا.

¹⁷آمَا الحِكْمَة الِّي تِنْزِلْ مِنْ فُوقْ رَاهِي قْبَلْ كُلْ شَيْء طَاهْرَة، وْزَادَا فِيهَا سَلاَمْ وْطَيّْبَة وِتْشَاوِرْ وْمَلْيَانَة بِالرَّحْمَة وِالثَّمَرْ البَاهِي، مَا فِيهَا حَتَّى فِكْرَة خَايْبَة وْلاَ نِفَاقْ.

¹⁸وِالثَّمْرَة مْتَاعْ البِرْ تِتْزْرَعْ فِي سَلاَمْ بِيْدِينْ النَّاسْ الِّي يَعْمْلُوا السَّلاَمْ.