Read Tunisian Arabic New Testament يَعْقُوبْ 4 Bible Online

يَعْقُوبْ 4 - Tunisian Arabic New Testament bible

يَعْقُوبْ 4

¹شْنُوَّة الِّي يْخَلِّيكُمْ تِتْحَارْبُوا وْتِتْعَارْكُوا؟ مُوشْ الشْهَاوِي مْتَاعْكُمْ الِّي تِتْعَارِكْ فِي وُسْطْ بْدُونَاتْكُمْ؟

²تِشْتْهَاوْ وْمَا تِمْلْكُوشْ يَاخِي تُقْتْلُوا. تِحْسْدُوا وْمَا تْنَجّْمُوشْ تَاخْذُوا يَاخِي تْوَلِّيوْا تِتْعَارْكُوا وِتْحَارْبُوا. إِنْتُومَا مَحْرُومِينْ عْلَى خَاطِرْكُمْ مَا تُطْلْبُوشْ،

³وْكِتُطْلْبُوا مَا تَاخْذُوشْ عْلَى خَاطِرْكُمْ تُطْلْبُوا حَاجَاتْ خَايْبَة بَاشْ تُصْرْفُوهَا فِي الشْهَاوِي مْتَاعْكُمْ.

⁴يَا خَايْنِينْ، يَاخِي مَا تَعْرْفُوشْ الِّي مْحَبِّةْ العَالَمْ تْخَلِّيكُمْ تْوَلِّيوْا أَعْدَاءْ اللهْ؟ وِلِّي يْحِبْ العَالَمْ يْوَلِّي العْدُو مْتَاعْ اللهْ.

⁵يَاخِي مَاشِي فِي بَالْكُمْ إِنُّو الِّي قَالُو الكْتَابْ المُقَدَّسْ بَاطِلْ: «إِنُّو الرُّوحْ الِّي سَاكِنْ فِينَا يْغِيرْ؟»

⁶آمَا هُوَ يَعْطِي نِعْمَة أَكْثِرْ. وِالكْتَابْ المُقَدَّسْ يْقُولْ: «اللهْ يْجِي ضِدْ المِتْكَبّْرِينْ وْيِنْعِمْ عْلَى المِتْوَاضْعِينْ.»

⁷إِمَّالاَ طِيعُوا اللهْ وْقَاوْمُوا بْلِيسْ بَاشْ يُهْرُبْ مِنْكُمْ.

⁸أُقْرْبُوا للهْ يُقْرْبِلْكُمْ. أَغْسْلُوا يْدِيكُمْ، يَا مِذْنْبِينْ، وْطَهّْرُوا قْلُوبْكُمْ يَلِّي مَا كُمْشْ ثَابْتِينْ عْلَى رَايْ وَاحِدْ.

⁹إِحْزْنُوا عْلَى هَمّْكُمْ وْنَوّْحُوا وْإِبْكِيوْ. خَلِّي الضُّحْكْ مْتَاعْكُمْ يْوَلِّي بْكَاء وِالفَرْحَة مْتَاعْكُمْ تْوَلِّي هَمْ.

¹⁰تْوَاضْعُوا قُدَّامْ الرَّبْ وِالرَّبْ يَرْفِعْكُمْ.

¹¹مَا تَحْكِيوْشْ عْلَى بْعَضْكُمْ بِالخَايِبْ، يَا إِخْوْتِي، رَاهُو الِّي يَحْكِي عْلَى خُوهْ بِالخَايِبْ وْيُحْكُمْ عْلَى خُوهْ رَاهُو يَحْكِي بِالخَايِبْ عْلَى الشَّرِيعَة وْيُحْكُمْ عْلَى الشَّرِيعَة. وْإِذَا كَانِكْ تُحْكُمْ عْلَى الشَّرِيعَة، رَاكْ مَاكِشْ قَاعِدْ تَعْمِلْ بِيهَا، آمَا قَاعِدْ تُحْكُمْ عْلِيهَا.

¹²ثَمَّة وَاحِدْ بَرْكْ يْحُطْ الشَّرِيعَة وْوَاحِدْ بَرْكْ يُحْكُمْ، وْهُوَ الِّي يِقْدِرْ بَاشْ يْخَلِّصْ وْبَاشْ يِهْلِكْ. شْكُونِكْ إِنْتِ حَتَّى لِينْ تُحْكُمْ عْلَى خُوكْ؟

¹³وْيَلِّي تْقُولُوا: «اليُومْ وِلاَّ غُدْوَة بَاشْ نِمْشِيوْا لِلمْدِينَة هَاذِي وِلاَّ هَاذِيكَا، وْنَبْقَاوْا عَامْ نِخْدْمُوا فِي التِّجَارَة وْنِرْبْحُوا»،

¹⁴إِنْتُومَا مَا تَعْرْفُوا حَتَّى شَيْء عْلَى غُدْوَة. شْنُوَّة هِيَ حْيَاتْكُمْ؟ إِنْتُومَا ضْبَابْ يُظْهُرْ شْوَيَّة وِمْبَاعِدْ يِمْشِي.

¹⁵هَاذَاكَا عْلاَشْ يِلْزِمْكُمْ تْقُولُوا: «إِنْ شَاءْ اللهْ، نْعِيشُوا وْنَعْمْلُوا الشَّيْء هَاذَا وِلاَّ الشَّيْء هَاذَاكَا!»

¹⁶آمَا إِنْتُومَا تَوَّا تِتْفُوخْرُوا بِالتَّكَبُّرْ مْتَاعْكُمْ، وِالفُخْرَة الِّي كِيفْ هَكَّا الكُلْهَا شَرْ.

¹⁷الِّي يَعْرِفْ كِيفَاشْ يَعْمِلْ الخِيرْ وْمَا يَعْمْلُوشْ رَاهُو عْمَلْ ذَنْبْ.