Read Tunisian Arabic New Testament يَعْقُوبْ 5 Bible Online

يَعْقُوبْ 5 - Tunisian Arabic New Testament bible

يَعْقُوبْ 5

¹يَا الغُنْيَا، إِبْكِيوْ وْنَوّْحُوا عْلَى المْصَايِبْ الِّي بَاشْ تَهْبِطْ عْلِيكُمْ.

²خِيرَاتْكُمْ فِسْدِتْ وْلِبْسِتْكُمْ كْلاَهَا السُّوسْ.

³ذْهَبْكُمْ وْفِضِّتْكُمْ كْلاَهُمْ الصْدِيدْ الِّي يِشْهِدْ عْلِيكُمْ وْيَاكُلْ بْدُونَاتْكُمْ كِيفْ النَّارْ. تِكْنْزُوا وْإِحْنَا فِي النْهَارَاتْ الإِخْرَانِينْ،

⁴وِالخَدَّامَا الِّي حَصْدُولْكُمْ أَرْضْكُمْ وِلِّي سْرِقْتُولْهُمْ خْلاَصْهُمْ قَاعْدِينْ يْصِيحُوا، وِالصْيَاحْ مْتَاعْهُمْ وْصُلْ وْسَمْعُوا رَبْ الجُنُودْ.

⁵عِشْتُوا عْلَى الأَرْضْ فِي الضْخَامَاتْ وِالخِيرْ وِسْمِنْتُوا لِلنْهَارْ الِّي بَاشْ تِتْذِبْحُوا فِيهْ.

⁶حْكُمْتُوا عْلَى البَرِيءْ وِقْتَلْتُوهْ وْهُوَ مَا دَافِعْشْ عْلَى رُوحُو.

⁷أُصْبْرُوا، يَا إِخْوْتِي، حَتَّى لِينْ يْجِي الرَّبْ. شُوفُوا الفَلاَّحْ كِيفَاشْ يُصْبُرْ وَقْتِلِّي قَاعِدْ يِسْتَنَّى فِي الغَلَّة الغَالْيَة مْتَاعْ الأَرْضْ، مْوَسِّعْ بَالُو مْعَاهَا حَتَّى لِينْ يْصُبْ المْطَرْ مْتَاعْ الخْرِيفْ وِالمْطَرْ الِّي فِي الرْبِيعْ.

⁸إِمَّالاَ إِنْتُومَا زَادَا أُصْبْرُوا وْخَلِّيوْ قْلُوبْكُمْ تْكُونْ قْوِيَّة، رَاهُو الرَّبْ قْرِيبْ يْجِي.

⁹مَا تِتْشَكَّاوْشْ عْلَى بْعَضْكُمْ، يَا الإِخْوَة، بَاشْ اللهْ مَا يُحْكُمْشْ عْلِيكُمْ. الِّي يُحْكُمْ عْلَى النَّاسْ وَاقِفْ قُدَّامْ البَابْ.

¹⁰أَعْمْلُوا، يَا الإِخْوَة، كِيفْ الأَنْبِيَاءْ الِّي تْكَلّْمُوا بْإِسْمْ الرَّبْ وِتْعَذّْبُوا وْصُبْرُوا.

¹¹هَانَا نْقُولُوا صَحَّة لِيهُمْ الِّي صُبْرُوا. سْمَعْتُوا بْصَبْرْ أَيُّوبْ وِعْرَفْتُوا كِيفَاشْ اللهْ جَازَاهْ. رَاهُو اللهْ رَؤُوفْ رَحِيمْ.

¹²وِقْبَلْ كُلْ شَيْء، يَا إِخْوْتِي، مَا تِحْلْفُوشْ لاَ بِالسْمَاءْ وْلاَ بِالأَرْضْ وْلاَ بْحَتَّى شَيْء آخَرْ. خَلِّيوْ الإِيهْ مْتَاعْكُمْ تْكُونْ إِيهْ وِاللاَّ مْتَاعْكُمْ تْكُونْ لاَ، بَاشْ مَا يِتْحْكَمْشْ عْلِيكُمْ.

¹³يَاخِي ثَمَّة شْكُونْ فِيكُمْ قَاعِدْ يِتْعَذِّبْ؟ خَلِّيهْ يْصَلِّي! يَاخِي فِيكُمْ شْكُونْ فَرْحَانْ؟ خَلِّيهْ يْسَبَّحْ اللهْ!

¹⁴يَاخِي ثَمَّة شْكُونْ فِيكُمْ مْرِيضْ؟ خَلِّيهْ يِسْتَدْعَي شْيُوخْ الكَنِيسَة بَاشْ يْصَلِّيوْ مِنْ أَجْلُو وْيِدْهْنُوهْ بِالزِّيتْ بْإِسْمْ الرَّبْ.

¹⁵وِالصَّلاَةْ مْعَ الإِيمَانْ تِشْفِي المْرِيضْ، وِالرَّبْ يْرَجَّعْلُو صَحّْتُو. وْإِذَا كَانْ عْمَلْ ذَنْبْ يِغْفِرْهُولُو.

¹⁶إِمَّالاَ إِعْتَرْفُوا لِبْعَضْكُمْ بِالذْنُوبْ، وْصَلِّيوْ عْلَى خَاطِرْ بْعَضْكُمْ بَاشْ تِتْشْفَاوْ. رَاهِي صْلاَةْ النَّاسْ الأَبْرَارْ قْوِيَّة بَرْشَة.

¹⁷إِيلِيَّا كَانْ بَشَرْ كِيفْنَا فِي كُلْ شَيْء وْصَلَّى بْقُوَّة، بَاشْ المْطَرْ مَا تْصُبِّشْ، يَاخِي المْطَرْ مَا صَبِّتْشْ عْلَى الأَرْضْ لْمُدِّةْ ثْلاَثَة سْنِينْ وْسِتَّة شْهُرْ.

¹⁸وِمْبَاعِدْ رْجَعْ يْصَلِّي، يَاخِي السْمَاءْ عْطَاتْ المْطَرْ وِالأَرْضْ جَابِتْ خِيرَاتْهَا.

¹⁹يَا إِخْوْتِي، إِذَا كَانْ وَاحِدْ فِيكُمْ بْعِدْ عْلَى الحَقْ وْوَاحِدْ آخَرْ رَجّْعُو لِيهْ،

²⁰خَلِّيهْ يَعْرِفْ إِنُّو الِّي يْرَجَّعْ وَاحِدْ مِذْنِبْ مِنْ طْرِيقْ الضْلاَلْ رَاهُو خَلِّصْ رُوحْ مِالمُوتْ وِسْتَرْ بَرْشَة ذْنُوبْ.