Read Tunisian Arabic New Testament بُطْرُسْ الأَوِلْ 1 Bible Online

بُطْرُسْ الأَوِلْ 1 - Tunisian Arabic New Testament bible

بُطْرُسْ الأَوِلْ 1

¹مِنْ بُطْرُسْ، رَسُولْ يَسُوعْ المَسِيحْ، للمِتْغَرّْبِينْ وِمْفَرّْتِينْ فِي كُلْ بْلاَصَة فِي بُنْطُسْ وْغَلاَطْيَة وْكَبَّدُوكِيَّة وْأَسِيَّة وْبِثِينِيَّةَ، الِّي خْتَارْكُمْ

²اللهْ الآبْ بْعِلْمُو مِنْ قْبَلْ بْرُوحُو وْبِالطّاعَة وْكِتِتْرَشُّوا بْدَمْ يَسُوعْ المَسِيحْ. بَرْشَة نِعْمَة وْسَلاَمْ عْلِيكُمْ.

³مُبَارَكْ اللهْ بُو رَبّْنَا يَسُوعْ المَسِيحْ الِّي تُولِدْنَا مِنْ جْدِيدْ بْرَحْمْتُو العْظِيمَة لْرَجَاءْ حَيْ بِالقْيَامَة مْتَاعْ يَسُوعْ المَسِيحْ مِنْ بِينْ المُوتَى،

⁴وِلْوَرْثَة مَا تَفْنَاشْ وْمَا تِفْسِدْشْ وْمَا تُوفَاشْ، مَحْفُوظَة لِيكُمْ فِي السْمَاءْ،

⁵إِنْتُومَا الِّي تَحْفِظْكُمْ قُدْرِةْ اللهْ بِالإِيمَانْ لْخَلاَصْ بَاشْ يِتْكْشِفْ فِي آخِرْ الزْمَانْ،

⁶تَفْرْحُوا بِالشَّيْء هَاذَا، رَغْمِلِّي تَوَّا مُمْكِنْ تِحْزْنُوا لْمُدَّة قْصِيرَة بْأَنْوَاعْ مْتَاعْ تَجَارِبْ

⁷بَاشْ إِيمَانْكُمْ الصْحِيحْ الِّي هُوَ أَغْلَى مِالذّْهَبْ رَغْمِلِّي هُوَ فَانِي يِتْجَرِّبْ بِالنَّارْ، يْجِيبْ الشُّكْرْ وِالمَجْدْ وِالكَرَامَة نْهَارِتْ الِّي يُظْهُرْ يَسُوعْ المَسِيحْ.

⁸الِّي تْحِبُّوهْ رَغْمِلِّي مَا رِيتُوهِشْ، وْتِمّْنُوا بِيهْ رَغْمِلِّي مَا كُمْشْ تْشُوفُوا فِيهْ تَوَّا، وْتَفْرْحُوا فَرْحَة مَجِيدَة وِعْظِيمَة مَا تِتْوْصُفْشْ

⁹وْتُوصْلُوا لِلهَدَفْ مْتَاعْ إِيمَانْكُمْ الِّي هُوَ الخَلاَصْ مْتَاعْ نْفُوسْكُمْ.

¹⁰الخَلاَصْ الِّي فَرْكْسُوا عْلِيهْ وْلَوّْجُوا عْلِيهْ الأَنْبِيَاءْ الِّي تْنَبّْأُوا عْلَى النِّعْمَة الِّي خْذِيتُوهاَ.

¹¹فَرْكْسُوا عْلَى الوَقْتْ وِالظُّرُوفْ الِّي قْصَدْهُمْ رُوحْ المَسِيحْ الِّي فِيهُمْ كِسِبْقُوا وْخَبّْرُوا عْلَى الوْجَايِعْ مْتَاعْ المَسِيحْ وِالأَمْجَادْ الِّي بَاشْ يْجِيوْ مْبَعْدْهَا.

¹²وْتِكْشِفِّلْهُمْ الِّي مَا كَانُوشْ يِخْدْمُوا فِي رْوَاحْهُمْ آمَا يِخْدْمُوا فِيكُمْ، فِي الحَاجَاتْ الِّي خَبّْرُوكُمْ بِيهَا تَوَّا النَّاسْ الِّي بَشّْرُوكُمْ عْلَى طْرِيقْ الرُّوحْ القُدُسْ الِّي تِبْعَثْ مِالسْمَاءْ. الحَاجَاتْ الِّي المْلاَيْكَة يِشْتْهَاوْ بَاشْ يَعْرْفُوهُمْ.

¹³هَاذَاكَا عْلاَشْ كُونُوا فَايْقِينْ لِلخِدْمَة وِاتْحَكّْمُوا فِي رْوَاحْكُمْ وْخَلِّى يْكُونْ عِنْدْكُمْ رَجَاءْ فِي النِّعْمَة الِّي تْجِيكُمْ وَقْتِلِّي يُظْهُرْ يَسُوعْ المَسِيحْ.

¹⁴وْكِيفْ وْلاَدْ طَايْعِينْ، مَا اتَّبْعُوشْ الشْهَاوِي هِيَ بِيدْهَا الِّي تَبَّعْتُوهَا كِكُنْتُوا عَايْشِينْ فِي الجَهْلْ،

¹⁵آمَا كُونُوا قِدِّيسِينْ فِي تَصَرُّفَاتْكُمْ الكُلْهَا كِيفْ مَا الِّي دْعَاكُمْ زَادَا قُدُّوسْ.

¹⁶مَا دَامُو الكْتَابْ المُقَدَّسْ يْقُولْ: «يِلْزِمْكُمْ تْكُونُوا قِدِّيسِينْ عْلَى خَاطِرْنِي آنَا قُدُّوسْ.»

¹⁷وْإِذَا كَانْكُمْ تْعَيّْطُولُو بُو، هَاكَا الِّي يُحْكُمْ عْلَى كُلْ وَاحِدْ عْلَى قَدْرْ أَعْمَالُو مِنْ غِيرْ مَا يْحَابِي حَتَّى حَدْ، إِمَّالاَ عِيشُوا مُدِّةْ غُرْبِتْكُمْ فِي الأَرْضْ وْإِنْتُومَا خَايْفِينْ مِنْ رَبِّي،

¹⁸عَارْفِينْ الِّي إِنْتُومَا تِفْدِيتُوا مِالسِّيرَة البَاطْلَة الِّي وْرِثْتُوهَا مِنْ عِنْدْ جْدُودْكُمْ، مُوشْ بِالحَاجَاتْ الفَانْيَة كِيفْ الذْهَبْ وِالفِضَّة،

¹⁹آمَا بْدَمْ غَالِي، دَمْ خَرُوفْ مَا فِيهِشْ عِيبْ وْمُوشْ أَجْرِبْ، دَمْ المَسِيحْ.

²⁰الِّي مَعْرُوفْ قْبَلْ مَا تِتْخْلَقْ الدِّنْيَا، آمَا ظْهُرْ فِي آخِرْ الزْمَانْ عْلَى خَاطِرْكُمْ.

²¹وِعْلَى طْرِيقُو هُوَ عِنْدْكُمْ إِيمَانْ بِالله الِّي قَيّْمُو مِنْ بِينْ المُوتَى وِعْطَاهْ المَجْدْ، بَاشْ إِيمَانْكُمْ وِالرَّجَاءْ مْتَاعْكُمْ يْكُونُوا فِي اللهْ.

²²وْتَوَّا، بَعْدْ مَا طَهِّرْتُوا نْفُوسْكُمْ بِالطَّاعَة مْتَاعْكُمْ لِلحَقْ وْوَلِّيتُوا تْحِبُّوا اخْوِتْكُمْ بِحْقِيقَة، إِمَّالاَ حِبُّوا بْعَضْكُمْ حُبْ طَاهِرْ مِالقَلْبْ.

²³رَاكُمْ تُولِدْتُوا مِنْ جْدِيدْ، مُوشْ مِنْ زَرْعْ يِفْنَى، آمَا مِنْ زَرْعْ مَا يَفْنَاشْ، مِنْ كِلْمِةْ اللهْ الحَيَّة وِالدَّايْمَة.

²⁴رَاهُو كُلْ بَشَرْ كِيفْ الحْشِيشْ. وِالمَجْدْ مْتَاعُو الكُلُّو كِنُوَّارْ الحْشِيشْ. الحْشِيشْ يِيبِسْ وِالنُّوَّارْ يْطِيحْ،

²⁵آمَا كِلْمِةْ الرَّبْ ادُّومْ لِلأَبَدْ. الكِلْمَة هَاذِي هِيَ الِّي تْبَشِّرْتُوا بِيهَا.