Read Tunisian Arabic New Testament بُطْرُسْ الأَوِلْ 2 Bible Online

بُطْرُسْ الأَوِلْ 2 - Tunisian Arabic New Testament bible

بُطْرُسْ الأَوِلْ 2

¹إِمَّالاَ نَحِّيوْ عْلِيكُمْ كُلْ خُبْثْ وْكُلْ تَحَيُّلْ وْنِفَاقْ وْحُسْدْ وْكُلْ سَبَّانْ،

²وْكِيفْ وْلاَدْ صْغَارْ مَازَالُوا كِتْوِلْدُوا اشْتْهَاوْ الحْلِيبْ الصَّافِي مْتَاعْ الرُّوحْ، بَاشْ تِكْبْرُوا بِيهْ لِلخَلاَصْ.

³إِذَا كَانْ ذُقْتُوا البْهَاوَة مْتَاعْ الرَّبْ.

⁴الِّي جِيتُولُو، لْهَاكَا الحَجْرَة الحَيَّة الِّي النَّاسْ رَفْضُوهَا، آمَا مُخْتَارَة وْغَالْيَة عِنْدْ اللهْ.

⁵وْكُونُوا إِنْتُومَا بِيدْكُمْ حَجْرَة حَيَّة مِبْنِيِّينْ كِيفْ دَارْ مْتَاعْ الرُّوحْ، بَاشْ تْكُونُوا كُهَّانْ مُقَدّْسِينْ بَاشْ تْقَدّْمُوا الذْبَايِحْ مْتَاعْ الرُّوحْ مَقْبُولَة عِنْدْ اللهْ بْيَسُوعْ المَسِيحْ.

⁶رَاهُو مَكْتُوبْ فِي الكْتَابْ المُقَدَّسْ: فِي صِهْيُونْ نْحُطْ حَجْرَة حَجْرَة مْتَاعْ سَاسْ مُخْتَارَة وْغَالْيَة، وِلِّي يِمِّنْ بِيهْ مَا يْخِيبِشْ.

⁷هَاذَاكَا عْلاَشْ إِنْتُومَا المُؤْمْنِينْ عِنْدْكُمْ قِيمَة كْبِيرَة. آمَا عِنْدْ الِّي مَا يِمّْنُوشْ رَاهِي الحَجْرَة الِّي رَفْضُوهَا البَنَّايَا وَلاَّتْ حَجْرِةْ السَّاسْ.

⁸هَاذِي هِيَ الحَجْرَة الِّي بَاشْ تَضْرِبْ النَّاسْ، الحَجْرَة الِّي بَاشْ تْخَلِّيهُمْ يِتْعَثّْرُوا. وْهُومَا تْعَثّْرُوا عْلَى خَاطِرْهُمْ مَا امّْنُوشْ بِالكِلْمَة: هَاذَاكَا الشَّيْء الِّي تْحَطُّو فيهْ!

⁹آمَا إِنْتُومَا رَاكُمْ ذُرِّيَّة مُخْتَارِينْ وْكُهَّانْ مُلُوكْ وْأُمَّة مُقَدّْسَة وْشَعْبْ غَالِى عْلَى اللهْ، خْتَارْكُمْ بَاشْ تْخَبّْرُوا بِالأَعْمَالْ العْظِيمَة مْتَاعْ اللهْ الِّي دْعَاكُمْ مِالظْلاَمْ لِلنُّورْ العْجِيبْ مْتَاعُو.

¹⁰قْبَلْ مَا كُنْتُوشْ شَعْبْ، وْتَوَّا وَلِّيتُوا شَعْبْ قْبَلْ مَا عْرَفْتُوشْ رَحْمِةْ اللهْ. وْتَوَّا خْذِيتُوا رَحْمِةْ الله.

¹¹وْنُطْلُبْ مِنْكُمْ، يَا حْبَابِي، كِيفْ بْرَايْنِيَّة وِمْطَرّْدِينْ مِنْ بْلاَدْكُمْ فِي الدِّنْيَا هَاذِي، إِنّْكُمْ مَا اتَّبْعُوشْ الشْهَاوِي مْتَاعْ البْدَنْ، الِّي هِيَ دِيمَا تْحَارِبْ الرُّوحْ.

¹²وْخَلِّيوْ سِيرِتْكُمْ تْكُونْ بَاهْيَة بَرْشَة قُدَّامْ الشْعُوبْ الِّي مَا يِمّْنُوشْ بْرَبِّي بَاشْ وَقْتِلِّي يِتْهْمُوكُمْ الِّي انْتُومَا تَعْمْلُوا فِي الشَّرْ، يْشُوفُوا أَعْمَالْكُمْ الصَّالْحَة وِيْمَجّْدُوا اللهْ فِي اليُومْ الِّي يِتْفَقِّدْكُمْ فِيهْ.

¹³طِيعُوا السُّلْطَة مْتَاعْ البَشَرْ، عْلَى خَاطِرْ الرَّبْ: طِيعُوا الرَّئِيسْ الِّي هُوَ أَعْلَى سُلْطَة،

¹⁴وِالوُلاَّةْ الِّي حَطّْهُمْ بَاشْ يْعَاقْبُوا النَّاسْ الأَشْرَارْ وْيِكْرْمُوا الِّي يَعْمْلُوا فِي الخِيرْ.

¹⁵رَاهُو اللهْ يْحِبّْكُمْ تَعْمْلُوا الخِيرْ بَاشْ تْسَكّْتُوا النَّاسْ الجُهَّالْ الِّي مَا يِفْهْمُوشْ.

¹⁶إِنْتُومَا أَحْرَارْ، مُوشْ كِيفْ الِّي يْرُدُّوا الحُرِّيَّة غْطَاء بَاشْ يَعْمْلُوا الشَّرْ، آمَا كِيفْ خُدَّامْ مْتَاعْ اللهْ.

¹⁷إِكْرْمُوا النَّاسْ الكُلْهُمْ، حِبُّوا الإِخْوَة، خَافُوا رَبِّي، إِكْرْمُوا الرَّئِيسْ.

¹⁸يَا خُدَّامْ، طِيعُوا الأَسْيَادْ مْتَاعْكُمْ وِاحْتَرْمُوهُمْ فِي كُلْ شَيْء، مُوشْ البَاهِينْ وِالطَّيّْبِينْ آكَاهُو آمَا الصْعَابْ زَادَا.

¹⁹رَاهِي نِعْمَة إِذَا كَانْ الوَاحِدْ يُصْبُرْ عْلَى الوْجَايِعْ وِالعْذَابْ وِالظُّلْمْ عْلَى خَاطِرْ رَبِّي.

²⁰شْنُوَّة تِسْتْفَادُوا كِتُصْبْرُوا بَعْدْ مَا تِتْضَرْبُوا وَقْتِلِّي تُغْلْطُوا؟ آمَا إِذَا كَانْ تُصْبْرُوا وْإِنْتُومَا تِتْعَذّْبُوا عْلَى خَاطِرْكُمْ تَعْمْلُوا فِي الخِيرْ، رَاهِي نِعْمَة مِنْ عِنْدْ اللهْ.

²¹رَاهُو اللهْ دْعَاكُمْ لِلشَّيْء هَاذَا، وِالمَسِيحْ زَادَا تْعَذِّبْ عْلَى خَاطِرْكُمْ وْرَدْ رُوحُو مِثَالْ بَاشْ تِمْشِيوْ فِي جُرّْتُو.

²²الِّي مَا عْمَلْشْ حَتَّى ذَنْبْ، وْمَا خْرَجْشْ مِنْ فُمُّو حَتَّى كِذْبْ.

²³وَقْتِلِّي تْسَبْ مَا رَجَّعْشْ السَّبَّة. وَقْتِلِّي تْعَذِّبْ مَا هَدِدْشْ حَتَّى حَدْ، آمَا سَلِّمْ أُمْرُو لِلِّي يُحْكُمْ بِالعَدْلْ،

²⁴هُوَ بِيدُو هَزْ الذْنُوبْ مْتَاعْنَا فِي جَسَدُو عْلَى الصَّلِيبْ بَاشْ نْمُوتُوا عْلَى الذْنُوبْ وْنَحْيَاوْ فِي البِرْ. إِنْتُومَا تِشْفِيتُوا بِالجْرُوحْ مْتَاعُو.

²⁵رَاكُمْ كُنْتُوا ضَايْعِينْ كِيفْ الغْنَمْ آمَا تَوَّا تِهْدِيتُوا لِلرَّاعِي وِالحَارِسْ مْتَاعْ نْفُوسْكُمْ.