Read Tunisian Arabic New Testament بُطْرُسْ الأَوِلْ 3 Bible Online

بُطْرُسْ الأَوِلْ 3 - Tunisian Arabic New Testament bible

بُطْرُسْ الأَوِلْ 3

¹وْإِنْتُومَا زَادَا يَا نْسَاء، طِيعُوا رْجَالْكُمْ، حَتَّى إِذَا كَانْ ثَمَّة شْكُونْ مِنْهُمْ مَا هُمْشْ يْطِيعُوا فِي الكِلْمَة مْتَاعْ اللهْ، مُمْكِنْ يِتْهْدَاوْ مِنْ غِيرْ كِلْمْتُو بِالسِّيرَة مْتَاعْ نْسَاهُمْ،

²وَقْتِلِّي يْتَبّْعُوا سِيرِتْكُمْ الطَّاهْرَة بْإِحْتِرَامْ.

³مَا تْخَلِّيوْشْ الزِّينَة مْتَاعْكُمْ تْكُونْ مِنْ بَرَّة بِالشْعَرْ المَظْفُورْ وِالذْهَبْ وِاللِّبْسَة الغَالْيَة،

⁴آمَا خَلِّيوهَا تْكُونْ مِنْ دَاخِلْ فِي القَلْبْ بِالرُّوحْ الطَّيْبَة وِالهَادْيَة الِّي مَا تَفْنَاشْ، وِلِّي هِيَ غَالْيَة بَرْشَة عِنْدْ رَبِّي.

⁵رَاهُمْ هَكَّا كَانُوا قْبَلْ النْسَاء القِدِّيسَاتْ وِلِّي عِنْدْهُمْ رَجَاءْ في اللهْ يْزَيّْنُوا فِي رْوَاحْهُمْ وْكَانُوا يْطِيعُوا فِي رْجَالْهُمْ،

⁶كِيفْ سَارَّة الِّي كَانِتْ اطِّيعْ فِي إِبْرَاهِيمْ، وِتْنَادِيلُو يَا سِيدِي. وْإِنْتُومَا تَوَّا بْنَاتْهَا إِذَا كَانْ تِتْصَرّْفُوا بِالبَاهِي وْمَا تْخَافُوشْ مِنْ حَتَّى شَيْء.

⁷وْإِنْتُومَا زَادَا يَا رْجَالْ، عِيشُوا مْعَ نْسَاكُمْ وْرَاعُولْهُمْ الِّي هُومَا ضْعَافْ وْإِكْرْمُوهُمْ، مَا دَامْكُمْ وُرَّاثْ مِتْشَارْكِينْ فِي النِّعْمَة مْتَاعْ الحَيَاةْ، بَاشْ الصَّلَوَاتْ مْتَاعْكُمْ مَا تِتْعَطِّلْشْ.

⁸فِي الإِخِّرْ، كُونُوا الكُلْكُمْ رَايْ وَاحِدْ وْحِسُّوا بِبْعَضْكُمْ وْحِبُّوا الإِخْوَة وِحِنُّوا عْلِيهُمْ وِاتْواضْعُوا.

⁹مَا تْكَافْؤُوشْ الشَّرْ بِالشَّرْ وِالسَّبَّانْ بِالسَّبَّانْ، آمَا بِالعَكْسْ بَارْكُوا، عْلَى خَاطِرْكُمْ تِدْعِيتُو لِلشَّيْء هَاذَا بَاشْ تَاخْذُوا بَرْكَة.

¹⁰رَاهُو الِّي يْحِبْ يِتْمَتَّعْ بِالحَيَاةْ وِيْشُوفْ نْهَارَاتْ بَاهِينْ يَحْفِظْ لْسَانُو مِالشَّرْ وْفُمُّو مِنْ الكِذْبْ

¹¹يَعْمِلْ الخِيرْ وْيِبْعِدْ عْلَى الشَّرْ يْلَوِّجْ عْلَى السَّلاَمْ وْيِجْرِي وْرَاهْ

¹²رَاهُو الرَّبْ يُخْزُرْ لِلأَبْرَارْ وْيِسْمَعْ صْلاَتْهُمْ وِلِّي يَعْمْلُوا فِي الشَّرْ يْجِي ضِدّْهُمْ.

¹³تَوَّا شْكُونْ بَاشْ يْضُرّْكُمْ إِذَا كَانْ تَحْرْصُوا عْلَى الخِيرْ؟

¹⁴آمَا حَتَّى إِذَا كَانْ تِتْعَذّْبُوا عْلَى خَاطِرْكُمْ تْلَوّْجُوا عْلَى البِرْ، رَاكُمْ بَاشْ تِتْبَارْكُوا! مَا تْخَافُوشْ مِنْهُمْ وْمَا تِتْقَلّْقُوشْ،

¹⁵آمَا قَدّْسُوا المَسِيحْ فِي قْلُوبْكُمْ كِيفْ رَبْ. حَضّْرُوا رْوَاحْكُمْ دِيمَا بَاشْ تْجَاوْبُوا أَيْ وَاحِدْ عْلَى السْبَبْ مْتَاعْ الرَّجَاءْ الِّي عِنْدْكُمْ.

¹⁶وْجَاوْبُوا بِسْيَاسَة وْإِحْتِرَامْ، وْحَافْظُوا عْلَى ضَمِيرْكُمْ طَاهِرْ، بَاشْ الِّي يَحْكِيوْ بِالخَايِبْ عْلَى سِيرِتْكُمْ البَاهْيَة فِي المَسِيحْ يِحْشْمُوا عْلَى رْوَاحْهُمْ.

¹⁷إِذَا كَانْ الوَاحِدْ حَبّْلُو رَبِّي بَاشْ يِتْعَذِّبْ وْهُوَ يَعْمِلْ فِي الخِيرْ، رَاهُو خِيرْلُو مِنْ يِتْعَذِّبْ وْهُوَ يَعْمِلْ فِي الشَّرْ.

¹⁸المَسِيحْ زَادَا مَاتْ مَرَّة وَحْدَة عْلَى خَاطِرْ الذْنُوبْ. رَغْمِلِّي هُوَ البَارْ مَاتْ عْلَى خَاطِرْ المِذْنْبِينْ بَاشْ يْقَرِّبْنَا للهْ. جَسَدُو مَاتْ آمَا رُوحُو حَيَّة،

¹⁹وْفِي الرُّوحْ هَاذِي مْشَى يْخَبِّرْ فِي الأَرْوَاحْ المَرْبُوطَة فِي الحَبْسْ

²⁰الِّي عْصَاتْ قْبَلْ، وَقْتِلِّي اللهْ كَانْ صَابِرْ عْلِيهُمْ فِي النْهَارَاتْ الِّي نُوحْ يَصْنَعْ فِيهُمْ فِي السْفِينَة الِّي مَنْعُوا بِيهَا شْوَيَّة مِالنَّاسْ مِالمَاء وِلِّي هُومَا ثْمَنْيَة.

²¹وِالشَّيْء هَاذَا كَانْ مِثَالْ لِلمَعْمُودِيَّة بَاشْ نُخْلْصُوا، مُوشْ بْتَنْحِيتْ الوْسَخْ مِالبْدَنْ، آمَا بْطَلْبَانْ اللهْ بْضَمِيرْ طَاهِرْ عْلَى طْرِيقْ القْيَامَة مْتَاعْ يَسُوعْ المَسِيحْ

²²وْهُوَ قَاعِدْ عْلَى يْمِينْ اللهْ بَعْدْ مَا مْشَى لِلسْمَاء وْعِنْدُو سُلْطَة عْلَى المْلاَيْكَة وِالحَاجَاتْ الِّي عِنْدْهَا سُلْطَة وِالحَاجَاتْ القْوِيَّة الِّي فِي السْمَاءْ.