Read Tunisian Arabic New Testament بُطْرُسْ الأَوِلْ 4 Bible Online

بُطْرُسْ الأَوِلْ 4 - Tunisian Arabic New Testament bible

بُطْرُسْ الأَوِلْ 4

¹مَا دَامُو المَسِيحْ تْعَذِّبْ فِي الْجَسَدْ، سَلّْحُوا رْوَاحْكُمْ بِالفِكْرَة هَاذِي بِيدْهَا، رَاهُو الِّي يِتْعَذِّبْ فِي جَسَدُو يْبَطِّلْ الذْنُوبْ،

²بَاشْ يْعِيشْ بْقِيِّةْ العْمُرْ فِي الْجَسَدْ مُوشْ بِالشْهَاوِي مْتَاعْ البَشَرْ، آمَا بْإِرَادِةْ اللهْ.

³يِزِّيكُمْ الِّي عَدِّيتُوهْ مِنْ عْمُرْكُمْ تَعْمْلُوا فِي الحَاجَاتْ الِّي يْحِبُّوا يَعْمْلُوهَا الشْعُوبْ الِّي مَا يِمّْنُوشْ بْرَبِّي، عَايْشِينْ فِي النْجَاسَة وِالشْهَاوِي وِالسُّكْرْ وِالخْلاَعَة وْقَعْدَاتْ الشْرَابْ وِعْبَادِةْ الصْنَبْ الِّي هِيَ حْرَامْ.

⁴وْهُومَا تَوَّا مِسْتَغْرْبِينْ فِيكُمْ الِّي إِنْتُومَا مَا تِجْرِيوْشْ مْعَاهُمْ وْرَاء الخْلاَعَة المْسَيّْبَة وْهُومَا يْهِينُوا فِيكُمْ،

⁵آمَا رَاهُمْ بَاشْ يِتْحَاسْبُوا قُدَّامْ الِّي هُوَ حَاضِرْ بَاشْ يُحْكُمْ عْلَى الحَيِّينْ وِالمُوتَى.

⁶رَاهُو هَاذَاكَا عْلاَشْ حَتَّى المُوتَى زَادَا تْبَشّْرُوا بِالإِنْجِيلْ، بَاشْ حَتَّى إِذَا كَانْ تِحْكَمْ عْلِيهُمْ فِي الْجَسَدْ كِيفْ البَشَرْ يْعِيشُوا فِي الرُّوحْ كِيفْ اللهْ.

⁷نْهَايِةْ كُلْ شَيْء قُرْبِتْ، هَاذَاكَا عْلاَشْ اتْحَكّْمُوا فِي رْوَاحْكُمْ وْفِيقُوا بَاشْ تْصَلِّيوْ

⁸قْبَلْ كُلْ شَيْء خَلِّيوْ مْحَبِّتْكُمْ لِبْعَضْكُمْ تْكُونْ قْوِيَّة، رَاهِي المْحَبَّة تُسْتُرْ بَرْشَة ذْنُوبْ.

⁹ضَيّْفُوا بْعَضْكُمْ مِنْ غِيرْ مَا تِتْشَكَّاوْ،

¹⁰خَلِّي كُلْ وَاحِدْ يِسْتَعْمِلْ المَوْهْبَة الِّي خْذَاهَا بَاشْ يِخْدِمْ الأُخْرِينْ، كِيفْ وُكَلاَءْ صَالْحِينْ عْلَى نِعْمِةْ اللهْ المِتْنَوّْعَة.

¹¹أَيْ وَاحِدْ يِتْكَلِّمْ خَلِّيهْ يِتْكَلِّمْ بِكْلاَمْ اللهْ، وْأَيْ وَاحِدْ يَعْمِلْ خِدْمَة خَلِّيهْ يِخْدِمْهَا بِالقُوَّة الِّي يَعْطِيهَا اللهْ، بَاشْ اللهْ يِتْمَجِّدْ فِي كُلْ شَيْء بْيَسُوعْ المَسِيحْ، المَجْدْ وِالسُّلْطَة لِيهْ لِلأَبَدْ. آمِينْ.

¹²يَا حْبَابِي، مَا تِسْتَغْرْبُوشْ فِي المْصِيبَة الِّي تَحْرِقْ الِّي جَايِتْكُمْ، بَاشْ تْجَرِّبْكُمْ، كَإِنّْهَا حَاجَة غْرِيبَة قَاعْدَة تَاقْعِلْكُمْ،

¹³آمَا أَفْرْحُوا بْقَدْرْ مَا تْشَارْكُوا فِي العْذَابْ مْتَاعْ المَسِيحْ، بَاشْ زَادَا تَفْرْحُوا وْتِتْهَنُّوا وَقْتِلِّي يْظَهِّرْ المَجْدْ مْتَاعُو.

¹⁴صَحَّة لِيكُمْ إِذَا كَانْ تْعَايِرْتُوا بِسْبَبْ إِسْمْ المَسِيحْ عْلَى خَاطِرْ رُوحْ اللهْ وِالمَجْدْ بَاشْ يَهْبِطْ عْلِيكُمْ.

¹⁵آمَا مَا تْخَلِّيوْشْ حَتَّى وَاحِدْ فِيكُمْ يِتْعَذِّبْ كِيفْ قَاتِلْ، وِلاَّ سَارِقْ، وِلاَّ يَعْمِلْ فِي الشَّرْ وِلاَّ يِدَّخِّلْ فِي أُمُورْ غِيرُو،

¹⁶آمَا إِذَا كَانْ وَاحِدْ يِتْعَذِّبْ عْلَى خَاطْرُو مَسِيحِي، خَلِّيهْ مَا يِحْشِمْشْ آمَا يْمَجِّدْ اللهْ عْلَى خَاطْرُو مِتْسَمِّى بِالإِسْمْ هَاذَا.

¹⁷رَاهُو جَا الوَقْتْ الِّي بَاشْ يِبْدَى فِيهْ الحُكْمْ بْشَعْبْ اللهْ. وْإِذَا كَانْ يِبْدَى بِينَا، كِيفَاشْ بَاشْ تْكُونْ نْهَايِةْ الِّي مَا يْطِيعُوشْ إِنْجِيلْ اللهْ؟

¹⁸إِذَا كَانْ الإِنْسَانْ البَارْ يُخْلُصْ بِصْعُوبَة، شْنُوَّة بَاشْ يَعْمِلْ الفَاسِدْ وِالمِذْنِبْ؟

¹⁹إِمَّالاَ الِّي قَاعْدِينْ يِتْعَذّْبُوا كِيفْ مَا تْحِبْ إِرَادِةْ اللهْ خَلِّيهُمْ يَعْمْلُوا الخِيرْ وِيْحُطُّوا رْوَاحْهُمْ بِينْ يْدِينْ الخَالِقْ الأَمِينْ.