Read Tunisian Arabic New Testament بُطْرُسْ الأَوِلْ 5 Bible Online

بُطْرُسْ الأَوِلْ 5 - Tunisian Arabic New Testament bible

بُطْرُسْ الأَوِلْ 5

¹إِمَّالاَ نُطْلُبْ مِالشْيُوخْ الِّي مَا بِينَاتْكُمْ، آنَا الِّي شِيخْ كِيفْهُمْ وْشَاهِدْ عْلَى عْذَابْ المَسِيحْ كِيفْ مَانِي شْرِيكْ فِي المَجْدْ الِّي بَاشْ يُظْهُرْ عْلَى قْرِيبْ،

²إِنّْكُمْ تَرْعَاوْ شَعْبْ اللهْ الِّي إِنْتُومَا مَسْؤُولِينْ عْلِيهُمْ وْتِتْلْهَاوْ بِيهُمْ مُوشْ بِالسِّيفْ عْلِيكُمْ آمَا بْإِرَادِتْكُمْ، كِيفْ مَا يْحِبْ اللهْ، مُوشْ عْلَى خَاطِرْ الرِّبْحْ الحْرَامْ آمَا عْلَى خَاطِرْكُمْ تْحِبُّوا تَعْمْلُوا الشَّيْء هَاذَاكَا.

³وْمُوشْ تِتْحَكّْمُوا فِي الِّي إِنْتُومَا مَسْؤُولِينْ عْلِيهُمْ، آمَا كُونُوا مِثَالْ لِلشَّعْبْ.

⁴وْوَقْتِلِّي يُظْهُرْ رَئِيسْ الرُّعَاةْ مْتَاعْ الشَّعْبْ بَاشْ تَاخْذُوا تَاجْ مْتَاعْ مَجْدْ مَا يِفْسِدْشْ.

⁵وْإِنْتُومَا زَادَا يَا شَبَابْ، طِيعُوا الشْيُوخْ وْإِسْمْعُوا كْلاَمْ بْعَضْكُمْ وِتْوَاضْعُوا اللهْ يْجِي ضِدْ المِتْكَبّْرِينْ، آمَا يَعْطِي نِعْمَة لِلمِتْوَاضْعِينْ.

⁶هَاذَاكَا عْلاَشْ اتْوَاضْعُوا تَحْتْ يِدْ اللهْ القْوِيَّة بَاشْ يَرْفِعْكُمْ فِي وَقْتُو.

⁷حُطُّوا عْلِيهْ هْمُومْكُمْ الكُلْ، رَاهُو يِتْلْهَى بِيكُمْ.

⁸رُدُّوا بَالْكُمْ وْفِيقُوا، رَاهُو عْدُوكُمْ بْلِيسْ قَاعِدْ يْدُورْ وْيِزْهِرْ كِيفْ الصِّيدْ يْلَوِّجْ عْلَى شْكُونْ يِبْلْعُو.

⁹إِيجُوا ضِدُّو وْإِنْتُومَا ثَابْتِينْ فِي إِيمَانْكُمْ، عَارْفِينْ الِّي خْوَاتْكُمْ فِي العَالَمْ الكُلُّو قَاعْدِينْ يْعَانِيوْ فِي العْذَابْ هُوَ بِيدُو.

¹⁰وْبَعْدْ مَا تْعَذِّبْتُوا شْوَيَّة وَقْتْ، الإِلاَهْ الِّي عَنْدُو النِّعْمَة الكُلْهَا الِّي دْعَاكُمْ لِلمَجْدْ مْتَاعُو الِّي يْدُومْ لِلأَبَدْ فِي المَسِيحْ هُوَ بِيدُو بَاشْ يْثَبِّتْكُمْ وِيْقَوِّيكُمْ وْيِبْنِيكُمْ.

¹¹السُّلْطَة لِيهْ لِلأَبَدْ. آمِينْ.

¹²الجْوَابْ القْصِيرْ هَاذَا تِكْتِبْ بْيِدْ سِلْوَانُسْ، وْهُوَ بِالنِّسْبَة لِيَّ كِيفْ خُو أَمِينْ، كْتِبْتِلْكُمْ بِاخْتِصَارْ نْأَكِّدْ عْلِيكُمْ وْنِشْهِدْ الِّي هَاذِي نِعْمِةْ اللهْ الحَقَّانِيَّة، إِثْبْتُوا فِيهَا.

¹³تْسَلِّمْ عْلِيكُمْ الِّي فِي بَابِلْ وِلِّي هِيَ زَادَا مُخْتَارَة. يْسَلِّمْ عْلِيكُمْ وِلْدِي مَرْقُسْ زَادَا.

¹⁴سَلّْمُوا عْلَى بْعَضْكُمْ ابُّوسِةْ المْحَبَّة. سَلاَمْ لِيكُمْ الكُلْكُمْ إِنْتُومَا الِّي فِي المَسِيحْ. آمِينْ.