Read Tunisian Arabic New Testament بُطْرُسْ الثَّانِيْ 1 Bible Online

بُطْرُسْ الثَّانِيْ 1 - Tunisian Arabic New Testament bible

بُطْرُسْ الثَّانِيْ 1

¹مِنْ سِمْعَانْ بُطْرُسْ الخَادِمْ وِالرَّسُولْ مْتَاعْ يَسُوعْ المَسِيحْ، لِلِّي خْذَاوْ إِيمَانْ غَالِي قَدْ الإِيمَانْ الِّي عِنْدْنَا عْلَى طْرِيقْ البِرْ مْتَاعْ إِلاَهْنَا وِالمُخَلِّصْ مْتَاعْنَا يَسُوعْ المَسِيحْ:

²إِنْ شَاءْ اللهْ النِّعْمَة وِالسَّلاَمْ يُكْثْرُولْكُمْ فِي المَعْرْفَة مْتَاعْ اللهْ وْيَسُوعْ رَبّْنَا.

³القُدْرَة مْتَاعْ اللهْ عْطَاتْنَا الحَاجَاتْ الصَّالْحَة الكُلْهَا لِلحَيَاةْ وِالتَّقْوَى عْلَى طْرِيقْ المَعْرْفَة مْتَاعْ الِّي دْعَانَا لْمَجْدُو وْأَخْلاَقُو.

⁴الِّي عْطَانَا بِيهُمْ الوُعُودْ الغَالْيَة وِالعْظِيمَة مْتَاعُو، بَاشْ عْلَى طْرِيقْ الحَاجَاتْ هَاذِي تْنَجّْمُوا تِمْنْعُوا مِالفْسَادْ الِّي فِي الدِّنْيَا بِسْبَبْ الشْهَاوِي وِتْوَلِّيوْ مْشَارْكِينْ فِي الطْبِيعَة مْتَاعْ اللهْ.

⁵هَاذَاكَا عْلاَشْ حَاوْلُوا أَكْثِرْ مَا تْنَجّْمُوا بَاشْ إِيمَانْكُمْ يْظَهِّرْ إنْكُمْ فَاضْلِينْ، وِالْفَضِيلَة تُظْهُرْ فِيهَا مَعْرْفَة

⁶وِالمَعْرْفَة تْوَرِّي التَّحَكُّمْ فِي النَّفْسْ، وِالتَّحَكُّمْ فِي النَّفْسْ يْوَرِّي الصَّبْرْ، وِالصَّبْرْ يْظَهِّرْ التَّقْوَى،

⁷وِالتَّقْوَى تْظَهِّرْ المْعَزَّة الِّي بِينْ الإِخْوَة، وِالمْعَزَّة الِّي بِينْ الإِخْوَة تْظَهِّرْ المْحَبَّة.

⁸رَاهُو إِذَا كَانْ الحَاجَاتْ هَاذُومَا عِنْدْكُمْ مِنْهُمْ بَرْشَة بَاشْ يَحْفْظُوكُمْ مِنْ إِنّْكُمْ تْكُونُوا مَا كُمْشْ نَافْعِينْ وْمَا عِنْدْكُمْشْ ثَمَرْ فِي المَعْرْفَة مْتَاعْ رَبّْنَا يَسُوعْ المَسِيحْ.

⁹رَاهُو الِّي مَا عِنْدُوشْ الحَاجَاتْ هَاذُومَا أَعْمَى وْمَا يُخْزُرْشْ لِبْعِيدْ، وِنْسَى الِّي هُوَ اطَّهَّرْ مِنْ ذْنُوبُو الِّي كَانْ يَعْمِلْ فِيهُمْ.

¹⁰هَاذَاكَا عْلاَشْ، يَا إِخْوْتِي، اسْعَاوْ أَكْثِرْ مَا يُمْكِنْ بَاشْ تْثَبّْتُوا دَعْوِةْ اللهْ وِاخْتِيَارُو لِيكُمْ. رَاكُمْ إِذَا تَعْمْلُوا الشَّيْء هَاذَاكَا عْمُرْكُمْ مَا اطِّيحُوا.

¹¹إِمَّالاَ بَاشْ يِتْحَلِّلْكُمْ بَابْ كْبِيرْ بَاشْ تُدْخْلُوا للْمَلَكُوتْ الِّي يَبْقَى لِلأَبَدْ، مْتَاعْ رَبّْنَا وْمُخَلّصْنَا يَسُوعْ المَسِيحْ.

¹²هَاذَاكَا عْلاَشْ نْحِبْ دِيمَا نْذَكِّرْكُمْ بِالحَاجَاتْ هَاذِي، رَغْمِلِّي إِنْتُومَا تَعْرْفُوهُمْ وْثَابْتِينْ فِي الحْقِيقَة الِّي عِنْدْكُمْ.

¹³وْيُظْهُرْلِي بَاهِي، انِّي نْشَجَّعْكُمْ كِنْذَكِّرْكُمْ بِالشَّيْء هَاذَا، مَا دَامْنِي فِي الخِيمَة مْتَاعْ البْدَنْ هَاذَا

¹⁴رَانِي نَعْرِفْ الِّي آنَا بَاشْ نُخْرُجْ مِالخِيمَة مْتَاعْ البْدَنْ هَاذَا عْلَى قْرِيبْ، كِيفْ مَا ظَهِّرْلِي الرَّبْ يَسُوعْ المَسِيحْ.

¹⁵وْبِشْ نَعْمِلْ الِّي نِقْدِرْ عْلِيهْ بَاشْ تْكُونُوا قَادْرِينْ فِي كُلْ وَقْتْ إِنّْكُمْ تِتْذَكّْرُوا الحَاجَاتْ هَاذُومَا بَعْدْ مَا نِمْشِي.

¹⁶رَانَا مَا تَبَّعْنَاشْ خْرَافَاتْ مْلَفّْقَة وَقْتِلِّي عَرِّفْنَاكُمْ بِالقُوَّة وِالجَّيَّانْ مْتَاعْ رَبّْنَا يَسُوعْ المَسِيحْ، آمَا كُنَّا شَاهْدِينْ عْلَى القُدْرَة مْتَاعُو.

¹⁷رَاهُو خْذَا كَرَامَة وْمَجْدْ مِنْ عِنْدْ اللهْ الآبْ وِالصُّوتْ جَاهْ بِالمَجْدْ العْظِيمْ: «هَاذَا هُوَ ابْنِي الِّي نْحِبُّو وِلِّي فْرَحْتْ بيه.»

¹⁸سْمَعْنَا الصُّوتْ هَاذَا جَايْ مِالسْمَاءْ، وْكُنَّا مْعَاهْ فِي الجْبَلْ المُقَدَّسْ.

¹⁹وْعَنْدْنَا كِلْمِةْ النُّبُوءَة، الِّي ثِبْتِتْ أَكْثِرْ، وْبَاهِي كَانْ اتَّبْعُوهَا كِيفْ فْنَارْ يِضْوِي فِي بْلاَصَة ظَلْمَة، حَتَّى لِينْ يْجِي النْهَارْ وْنِجْمِةْ الصْبَاحْ تُطْلُعْ فِي قْلُوبْكُمْ،

²⁰وِقْبَلْ كُلْ شَيْء يِلْزِمْكُمْ تَعْرْفُوا الشَّيْء هَاذَا: إِنُّو مَا ثَمَّاشْ حَتَّى نُبُوءَة مِالكْتَابْ المُقَدَّسْ يْنَجِّمْ الوَاحِدْ يْفَسِّرْهَا كِيفْ مَا يْحِبْ.

²¹عْلَى خَاطِرْ مَا ثَمَّاشْ حَتَّى نُبُوءَة جَاتْ بِالقَرَارْ مْتَاعْ إِنْسَانْ، آمَا ثَمَّة نَاسْ الرُّوحْ القُدُسْ خَلاَّهُمْ يِتْكَلّْمُوا بِكْلاَمْ اللهْ.