Read Tunisian Arabic New Testament بُطْرُسْ الثَّانِيْ 2 Bible Online

بُطْرُسْ الثَّانِيْ 2 - Tunisian Arabic New Testament bible

بُطْرُسْ الثَّانِيْ 2

¹آمَا كِيفْ مَا ظُهْرُوا أَنْبِيَاءْ كَذَّابِينْ فِي وُسْطْ الشَّعْبْ قْبَلْ، رَاهُمْ بَاشْ يُظْهْرُوا زَادَا مَا بِينَاتْكُمْ مُعَلّْمِينْ كَذَّابِينْ وْبِشْ يْدَخّْلُوا تَعَالِيمْ غَالْطَة فِي الدِّينْ تِهْلِكْ النَّاسْ وْحَتَّى الرَّبْ الِّي فْدَاهُمْ بَاشْ يُنْكْرُوهْ، وْفِيسَعْ بَاشْ يِهِزُّو رْوَاحْهُمْ لِلهْلاَكْ.

²وْبَرْشَة نَاسْ بَاشْ يْتَبّْعُوا الفَاحْشَة مْتَاعْهُمْ وْبِسْبَبْهُمْ بَاشْ يَكْفْرُوا بِطْرِيقْ الحَقْ.

³وْبِالطّْمَعْ مْتَاعْهُمْ بَاشْ يِسْتْغَلُّوكُمْ بِكْلاَمْ حْلُو وْمِلْيَانْ بِالكِذْبْ. مِنْ قْبَلْ هْلاَكْهُمْ مُوشْ بَاشْ يُبْطُلْ وِالحُكْمْ عْلِيهُمْ مُوشْ بَاشْ يَبْطَى.

⁴رَاهُو إِذَا كَانْ اللهْ مَا خَلاَّشْ المْلاَيْكَة فِي بْلاَصِتْهُمْ وَقْتِلِّي عَمْلُوا الذْنُوبْ، آمَا رْمَاهُمْ فِي جْهَنِّمْ وْحَطّْهُمْ فِي حُفْرِةْ الظْلاَمْ الِّي مَا يُوفَاشْ مَرْبُوطِينْ بِالسْلاَسِلْ حَتَّى لِينْ يْجِي يُومْ الحْسَابْ،

⁵وْمَا خَلاَّشْ حَتَّى حَدْ فِي العَالَمْ القْدِيمْ، آمَا حْفَظْ نُوحْ الِّي هُوَ الثَّامِنْ وِلِّي هُوَ يْبَشِّرْ بِالبِرْ كِجَابْ الفَيَضَانَاتْ عْلَى النَّاسْ الأَشْرَارْ.

⁶وْإِذَا كَانْ رَدْ المُدُنْ مْتَاعْ سَدُومْ وْعَمُورَة رْمَادْ وِقْلِبْهُمْ وْرَدّْهُمْ عِبْرَة لِلِّي بَاشْ يْجِيوْ مْبَعْدْهُمْ وْمَا يْخَافُوشْ رَبِّي،

⁷وْإِذَا كَانْ مَنَّعْ لُوطْ البَارْ مِالنَّاسْ العَاصِينْ الِّي كَثّْرُوا مِنْ عَمْلاَنْ الشَّرْ

⁸وْهَاكَا الإِنْسَانْ البَارْ كَانْ يِتْعَذِّبْ فِي رُوحُو البَارَّة بِالشَّرْ الِّي يَعْمْلُوا فِيهْ، مِالشَّيْء الِّي كَانْ يْشُوفْ فِيهْ وْيِسْمَعْ فِيهْ نْهَارْ بَعْدْ نْهَارْ كِكَانْ عَايِشْ فِي وُسْطْهُمْ.

⁹إِمَّالاَ رَاهُو الرَّبْ يَعْرِفْ كِيفَاشْ يْمَنَّعْ الِّي يْخَافُوا رَبِّي مِالتَّجْرْبَة وِيْخَلِّي الِّي مَا يْخَافُوشْ رَبِّي فِي العْذَابْ حَتَّى لِينْ يْجِي يُومْ الحْسَابْ،

¹⁰بِالأَخَصْ هَاكَا الِّي يِجْرِيوْ وْرَاء الشْهَاوِي المَنْزُوسَة مْتَاعْ البْدَنْ وِيِسْتْهَانُوا بِالسُّلْطَة. مَا يَحْشْمُوشْ وغَالْطِينْ فِي رْوَاحْهُمْ! مَا يْخَافُوشْ كِيْهِينُوا المَخْلُوقَاتْ الِّي عِنْدْهَا مَجْدْ،

¹¹وِينْ مُوجُودِينْ المْلاَيْكَة الِّي هُومَا عِنْدْهُمْ قُدْرَة وْقُوَّة أَكْثِرْ مِنْ المْلاَيْكَة الخَايْبِينْ، مَا يُحْكْمُوشْ عْلِيهُمْ حُكْمْ مْعَوِّجْ قُدَّامْ الرَّبْ.

¹²آمَا المُعَلّْمِينْ الكَذَّابِينْ هَاذُومَا رَاهُمْ كِيفْ حَيَوَانَاتْ مَا عِنْدْهُمْشْ عْقَلْ تْحَرّكْ فيهَا الطْبِيعَة، تْجَعْلِتْ للصِّيدْ وِالمَاكْلة، يِسْتْهِينُوا بِحْوَايِجْ مَا يَعْرْفُوهَاشْ، رَاهُمْ بَاشْ يِتْهِلْكُوا بالفْسَادْ مْتَاعْهُمْ.

¹³وْبَاشْ يْنَالُو أُجْرَة الإِثْمْ. مَاشِي فِي بَالْهُمْ الشِّيخة مْتَاعْ نْهَارْ وَاحِدْ سَعَادَة حَقِيقِيّة. فِسَادْ وعِيبْ. يِدْفِعْ فيهِمْ الْغُرُورْ وْهُومَا يَاكْلُو مْعَاكُمْ في الخِيرْ الكُلّو.

¹⁴عِينِيهُمْ مِلْيَانَة بِالزْنَى، مَا يِشْبْعُوشْ مِالذْنُوبْ، يِخْدْعُوا فِي النْفُوسْ الضْعِيفَة، قْلُوبْهُمْ ادَّرْبِتْ عْلَى الطْمَعْ. هُومَا وْلاَدْ مَلْعُونِينْ.

¹⁵خَلاَّوْ الطْرِيقْ المُسْتَقِيمْ وْضَاعُوا وِمْشَاوْ فِي طْرِيقْ بَلْعَامْ وِلْدْ بَعُورْ الِّي حَبْ يِرْبِحْ مِالشَّرْ،

¹⁶آمَا تْوَبِّخْ عْلَى المَعْصْيَة مْتَاعُو، بْهِيمَة مَا تِتْكَلِّمْشْ نُطْقِتْ بْصُوتْ بَشَرْ وْرَجّْعِتْ النَّبِي لْعَقْلُو.

¹⁷هَاذُومَا رَاهُمْ عْيُونْ مَا فِيهَاشْ مَاء وِسْحُبْ هَازِّتْهَا الرِّيحْ القْوِيَّة، وِتْحَضّْرِلْهُمْ الظْلاَمْ الِّي مَا يُوفَاشْ.

¹⁸رَاهُمْ يِتْكَلّْمُوا بِكْلاَمْ كْبِيرْ وْفَارِغْ، يِخْدْعُوا بِشْهَاوِي البْدَنْ الفَاسْدَة فِي نَاسْ هُرْبُوا بِالسِّيفْ مِنْ بِينْ الِّي عَايْشِينْ فِي الغْلَطْ.

¹⁹يُوعْدُوهُمْ بِالحُرِّيَّة وْهُومَا بِيدْهُمْ عَبِيدْ مْتَاعْ الفْسَادْ، عْلَى خَاطِرْ الإِنْسَانْ يْوَلِّي عَبْدْ مْتَاعْ الشَّيْء الِّي غَلْبُو!

²⁰رَاهُمْ إِذَا كَانْ بَعْدْ مَا مَنْعُوا مِنْ النْجَاسَة مْتَاعْ العَالَمْ عْلَى طْرِيقْ المَعْرْفَة مْتَاعْ رَبّْنَا وِالمُخَلِّصْ مْتَاعْنَا يَسُوعْ المَسِيحْ، وْيَرْجْعُوا يُحْصْلُوا فِيهُمْ وْيِتْغِلْبُوا، رَاهِي حَالِتْهُمْ فِي الإِخِّرْ بَاشْ تْكُونْ أَخْيِبْ مِلِّي كَانُوا عْلِيهْ فِي الأُوِّلْ،

²¹وْلُوكَانْ مَا عَرْفُوشْ الطْرِيقْ مْتَاعْ البِرْ خِيرِلْهُمْ مِنْ إِنّْهُمْ بَعْدْ مَا عَرْفُوهْ يِبْعْدُوا عْلَى الوْصِيَّة المُقَدّْسَة الِّي تِعْطَاتِلْهُمْ.

²²وْيَاقْعِلْهُمْ كِيفْ مَا قَالْ المَثَلْ الِّي مَا يُغْلُطْشْ: الكَلْبْ رْجَعْ لِرْدَادُو، الحْلاَلِفْ الِّي تْغِسْلُوا رَجْعُوا لِلوْسَخْ.