Read Tunisian Arabic New Testament بُطْرُسْ الثَّانِيْ 3 Bible Online

بُطْرُسْ الثَّانِيْ 3 - Tunisian Arabic New Testament bible

بُطْرُسْ الثَّانِيْ 3

¹هَاذِي تَوَّا الرِّسَالَة الثَّانْيَة الِّي كْتِبْتْهَالْكُمْ، يَا حْبَابِي، وْفِيهُمْ لِثْنِينْ حَاوِلْتْ انَّبَّهْ مُخّْكُمْ النْظِيفْ.

²بَاشْ تِتْذَكّْرُوا الكْلاَمْ الِّي سِبْقُوا وْقَالُوهْ الأَنْبِيَاءْ المُقَدّْسِينْ وِالوْصِيَّة مْتَاعْ الرَّبْ وِالمُخَلِّصْ عْلَى طْرِيقْ الرُّسُلْ الِّي تْبَعْثُولْكُمْ.

³قْبَلْ كُلْ شَيْء يِلْزِمْكُمْ تِفْهْمُوا الشَّيْء هَاذَا إِنُّو بَاشْ يْجِيوْ نَاسْ يِتْمَسْخْرُوا بَرْشَة فِي آخِرْ الزْمَانْ وِيْتَبّْعُوا فِي الشْهَاوِي مْتَاعْهُمْ

⁴وِيْقُولُوا: «مُوشْ وْعِدْ بَاشْ يْجِي؟ وِينُو؟ مِلِّي مَاتُوا جْدُودْنَا وْدِيمَا كُلْ شَيْء بْقَى كِيفْ مَا هُوَ مِنْ أَوِّلْ مَا تْخَلْقِتْ الدِّنْيَا!»

⁵هُومَا مَا عَمْلُوشْ قِيمَة لِلشَّيْء هَاذَا وْبِالعَانِي نْسَاوْ الِّي السْمَاوَاتْ مِنْ قْدِيمْ الزْمَانْ تْوِجْدِتْ بْكِلْمِةْ اللهْ وِالأَرْضْ تْعَمْلِتْ مِالمَاء وْبِالمَاء،

⁶وِالعَالَمْ الِّي تُوجِدْ الوَقْتْ هَاذَاكَا غْرُقْ فِي المَاء وْتِهْلِكْ.

⁷آمَا بِالكِلْمَة هِيَ بِيدْهَا السْمَاوَاتْ وِالأَرْضْ الِّي مُوجُودِينْ تَوَّا بْقَاوْ لِلنَّارْ وِتْحُفْظُوا حَتَّى لِينْ يْجِي يُومْ الحْسَابْ وِالهْلاَكْ مْتَاعْ النَّاسْ الِّي مَا يَعْرْفُوشْ رَبِّي.

⁸وْمَا تِجْهْلُوشْ الشَّيْء هَاذَا، يَا حْبَابِي، إِنُّو يُومْ وَاحِدْ عِنْدْ الرَّبْ كِيفْ أَلْفْ سْنَة، وْأَلْفْ سْنَة كِيفْ نْهَارْ وَاحِدْ.

⁹الرَّبْ مَا يَبْطَاشْ فِي الشَّيْء الِّي وْعِدْ بِيهْ، كِيفْ مَا ثَمَّة نَاسْ يْقُولُوا عْلِيهْ، آمَا رَاهُو صَابِرْ عْلِيكُمْ وْمَا يْحِبِّشْ حَتَّى وَاحِدْ يِتْهْلِكْ، آمَا يْحِبْ النَّاسْ الكُلْهُمْ يْتُوبُوا.

¹⁰آمَا رَاهُو النْهَارْ الِّي بَاشْ يْجِي فِيهْ يُومْ الرَّبْ بَاشْ يْجِي كِيفْ السَّارِقْ، وِالوَقْتْ هَاذَاكَا السْمَاوَاتْ بَاشْ يَفْنَاوْ وْيَعْمْلُوا بَرْشَة حِسْ وِالحَاجَاتْ الِّي تْعَمْلِتْ مِنْهُمْ الدِّنْيَا بَاشْ يْذُوبُوا بِالنَّارْ، وِالأَرْضْ بَاشْ تِدَّمِّرْ وِالحَاجَاتْ الِّي تْعَمْلِتْ فِيهَا بَاشْ تِتْنَحَّى.

¹¹مَا دَامْهُمْ الحَاجَاتْ هَاذُومَا الكُلْهُمْ بَاشْ يِنْحَلّو، إِمَّالاَ كِيفَاشْ يِلْزِمْكُمْ تْعِيشُوا فِي القَدَاسَة وِالخُوفْ مِالرَّبِّي،

¹²تِسْتَنُّوا وِمْحَضّْرِينْ رْوَاحْكُمْ لِلنْهَارْ الِّي بَاشْ يْجِي فِيهْ يُومْ الرَّبْ. اليُومْ الِّي بَاشْ يْخَلِّي السْمَاوَاتْ يِتْحَرْقُوا وِالحَاجَاتْ الِّي تْعَمْلِتْ مِنْهُمْ الدِّنْيَا بَاشْ يْذُوبُوا.

¹³لَكِنْ أَحْنَا نِسْتَنَّاوْ كِيفْ مَا وْعِدْنَا فِي سْمَاوَاتْ جْدُدْ وْأَرْضْ جْدِيدَة يُسْكُنْ فِيهَا البِرْ.

¹⁴آمَا يَا حْبَابِي أَعْمْلُوا الِّي تَقْدْرُوا عْلِيهْ، مَا دَامْكُمْ تِسْتَنَّاوْ فِي الحَاجَاتْ هَاذُومَا، بَاشْ اللهْ مَا يَلْقَى فِيكُمْ حَتَّى عِيبْ وْمَا عْلِيكُمْشْ لُومْ وْيَلْقَاكُمْ سَالْمِينْ.

¹⁵وْإِحْسْبُوا وِسْعْ البَالْ مْتَاعْ رَبّْنَا فُرْصَة بَاشْ تُخْلْصُوا، كِيفْ مَا كْتِبِّلْكُمْ خُونَا بُولُسْ الِّي نْحِبُّوهْ، عْلَى قَدْرْ الحِكْمَة الِّي تِعْطَاتْلُو،

¹⁶وِحْكَى عْلَى الحَاجَاتْ هَاذُومَا فِي الرَّسَايِلْ مْتَاعُو الكُلْهُمْ. ثَمَّة حَاجَاتْ مِنْهُمْ صْعِيبْ بَاشْ يِتْفِهْمُوا وِلِّي الجُهَّالْ وِلِّي مَا هُمْشْ ثَابْتِينْ يْحَرّْفُوا المَعْنَى مْتَاعْهُمْ كِيفْ مَا يَعْمْلُوا لِلكْتُبْ المُقَدّْسَة الأُخْرِينْ بَاشْ يِتْهِلْكُوا بِيهُمْ.

¹⁷إِمَّالاَ، إِنْتُومَا يَا حْبَابِي، مَادَامْكُمْ تَعْرْفُوا الشَّيْء هَاذَا مِالأُوِّلْ، رُدُّوا بَالْكُمْ لاَ تْضِيعُوا بِالأَغْلَاطْ مْتَاعْ نَاسْ مِتْسَيّْبِينْ وْمَا عَادِشْ تْوَلِّيوْا ثَابْتِينْ.

¹⁸آمَا إِكْبْرُوا فِي النِّعْمَة وِالمَعْرْفَة مْتَاعْ رَبّْنَا وِالمُخَلِّصْ مْتَاعْنَا يَسُوعْ المَسِيحْ، المَجْدْ لِيهْ اليُومْ وْحَتَّى لِلأَبَدْ. آمِينْ.