Read Tunisian Arabic New Testament يُوحَنَّا الأَوِلْ 2 Bible Online

يُوحَنَّا الأَوِلْ 2 - Tunisian Arabic New Testament bible

يُوحَنَّا الأَوِلْ 2

¹يَا وْلاَدِي رَانِي نِكْتْبِلْكُمْ فِي الحَاجَاتْ هَاذِي الكُلْ بَاشْ مَا تُغْلْطُوشْ. آمَا إِذَا كَانْ وَاحِدْ غْلُطْ رَاهُو يَسُوعْ المَسِيحْ البَارْ يِشْفَعْ فِينَا قُدَّامْ الآبْ.

²وْهُوَ الضْحِيَّة وِالكَفَّارَة عْلَى ذْنُوبْنَا وْمُوشْ ذْنُوبْنَا أَحْنَا آكَاهُو آمَا ذْنُوبْ النَّاسْ الكُلْ.

³وْهَكَّا نِتْأَكّْدُوا الِّي أَحْنَا عْرَفْنَاهْ إِذَا نْطِيعُوا الوْصَايَا مْتَاعُو.

⁴وِلِّي يْقُولْ الِّي هُوَ يَعْرْفُو وْمَا يْطِيعِشْ الوْصَايَا مْتَاعُو رَاهُو يِكْذِبْ وِالحَقْ مَا يْكُونِشْ فِيهْ.

⁵آمَا الِّي يْطِيعْ كِلْمْتُو، مْحَبِّةْ اللهْ بَاشْ تْكُونْ بِالحَقْ كَامْلَة فِيهْ. وْهَكَّا نَعْرْفُوا الِّي أَحْنَا فِيهْ.

⁶أَيْ وَاحِدْ يْقُولْ إِنُّو ثَابِتْ فِي اللهْ يِلْزْمُو يْعِيشْ كِيمَا عَاشْ المَسِيحْ.

⁷يَا حْبَابِي مَانِيشْ نِكْتْبِلْكُمْ فِي وْصِيَّة جْدِيدَة آمَا رَاهِي وْصِيَّة قْدِيمَة كَانِتْ عِنْدْكُمْ مِاللُّوِّلْ وِلِّي هِيَ الكِلْمَة الِّي سْمَعْتُوهَا مِاللُّوِّلْ بِالكُلْ.

⁸آمَا رَانِي نِكْتْبِلْكُمْ فِي وْصِيَّة جْدِيدَة وْهِيَ الحَقْ الِّي يُظْهُرْ فِي المَسِيحْ وْيُظْهُرْ فِيكُمْ عْلَى خَاطِرْ الظْلاَمْ قَاعِدْ يِتْنَحَّى وِالنُّورْ الحَقَّانِي ضْوَى.

⁹الِّي يْقُولْ إِنُّو يْعِيشْ فِي النُّورْ وْهُوَ يَكْرَهْ خُوهْ رَاهُو مَازَالْ لْتَوَّا يْعِيشْ فِي الظْلاَمْ.

¹⁰وِلِّي يْحِبْ خُوهْ هُوَ الِّي يْعِيشْ فِي النُّورْ وْحَتَّى شَيْء مَا يْعَثّْرُو.

¹¹وِلِّي يَكْرَهْ خُوهْ رَاهُو فِي الظْلاَمْ وْيِمْشِي فِي الظْلاَمْ وْمَا يَعْرِفْشْ وِينْ مَاشِي عْلَى خَاطِرْ الظْلاَمْ عْمَالُو عِينِيهْ.

¹²يَا وْلاَدِي نِكْتْبِلْكُمْ الشَّيْء هَاذَا، عْلَى خَاطِرْ فِي اسْمْ المَسِيحْ رَبِّي غْفِرِّلْنَا ذْنُوبْنَا.

¹³نِكْتِبْ لْكُلْ بُو فِيكُمْ، عْلَى خَاطِرْكُمْ تَعْرْفُوا المَسِيحْ المُوجُودْ مِاللُّوِّلْ. نِكْتْبِلْكُمْ يَا شَبَابْ، عْلَى خَاطِرْكُمْ غْلِبْتُوا الشِّرِّيرْ. نِكْتْبِلْكُمْ يَا وْلاَدِي، عْلَى خَاطِرْكُمْ عْرَفْتُوا الآبْ.

¹⁴كْتِبْتْ لْكُلْ بُو فِيكُمْ، عْلَى خَاطِرْكُمْ عْرَفْتُوا المَسِيحْ المُوجُودْ مِاللُّوِّلْ. كْتِبْتِلْكُمْ يَا شَبَابْ، عْلَى خَاطِرْكُمْ قْوِيِّينْ وْكِلْمِةْ اللهْ ثَابْتَة فِي قْلُوبْكُمْ وِغْلِبْتُوا الشِّرِّيرْ.

¹⁵مَا تْحِبُّوشْ الدِّنْيَا وِالحَاجَاتْ الِّي فِي الدِّنْيَا. الِّي يْحِبْ الدِّنْيَا مَا تْكُونِشْ مْحَبِّةْ الآبْ فِي قَلْبُو.

¹⁶الحَاجَاتْ الكُلْ الِّي فِي الدِّنْيَا هُومَا شَهْوِةْ البْدَنْ وْشَهْوِةْ العِينْ وِالفُخْرَة وِالتَّكَبُّرْ وْهُومَا مَا هُمْشْ مِالآبْ آمَا رَاهُمْ مِنْ الدِّنْيَا.

¹⁷وِالدِّنْيَا بَاشْ تَفْنَى هِيَ وِالشْهَاوِي الِّي فِيهَا، آمَا الِّي يَعْمِلْ الحَاجَاتْ الِّي تْرَضِّي رَبِّي بَاشْ يَحْيَي لِلأَبَدْ.

¹⁸يَا وْلاَدِي نْحِبّْكُمْ تَعْرْفُوا الِّي الدِّنْيَا قْرِيبْ تُوفَى. سْمَعْتُوا إِنُّو المَسِيحْ الدَّجَّالْ بَاشْ يْجِي. رَاهُمْ تَوَّا مُوجُودِينْ بَرْشَة دَجَّالِينْ. وْهَكَّا نِتْأَكّْدُوا إِنُّو الدِّنْيَا بَاشْ تُوفَى.

¹⁹الدَّجَّالِينْ هَاذُومَا خَرْجُوا مِنْ وُسْطْنَا آمَا هُومَا فِي الحْقِيقَة مَا كَانُوشْ مِنَّا وْلَوْ كَانُو مِنَّا رَاهُمْ بْقَاوْ مْعَانَا يَعْنِي خْرُوجْهُمْ مِنْ بِينَاتْنَا هُوَ دَلِيلْ إِنّْهُمْ الكُلْهُمْ مَا هُمْشْ مِنَّا.

²⁰آمَا إِنْتُومَا رَاكُمْ مَمْسُوحِينْ بْرُوحْ اللهْ القُدُّوسْ هَاذَاكَا عْلاَشْ إِنْتُومَا الكُلْكُمْ تَعْرْفُوا الحَقْ.

²¹نِكْتْبِلْكُمْ الشَّيْء هَاذَا مُوشْ عْلَى خَاطِرْكُمْ مَا تَعْرْفُوشْ الحَقْ آمَا عْلَى خَاطِرْكُمْ تَعْرْفُوا وْمِتْأَكّْدِينْ الِّي عُمْرُو الكِذْبْ مَا يْجِي مِالحَقْ.

²²شْكُونُو الكَذَّابْ؟ الكَذَّابْ هُوَ الِّي يُنْكُرْ الِّي يَسُوعْ هُوَ المَسِيحْ. وْهَاذَاكَا هُوَ المَسِيحْ الدَّجَّالْ الِّي يُنْكُرْ وِيْعَارِضْ الآبْ وِالإِبْنْ مْعَ بْعَضْهُمْ.

²³الِّي مَا يِقْبِلْشْ الإِبْنْ مَا عِنْدُوشْ عَلاَقَة مْعَ الآبْ وِلِّي يِقْبِلْ الإِبْنْ يِقْبِلْ الآبْ زَادَا.

²⁴آمَا إِنْتُومَا خَلِّيوْ الكْلاَمْ الِّي سْمَعْتُوهْ مِاللُّوِّلْ يِثْبِتْ فِيكُمْ، رَاهُو وَقْتِلِّي يِثْبِتْ فِيكُمْ الكْلاَمْ هَاذَا تْكُونُوا مِتَّحْدِينْ مْعَ الإِبْنْ وِمْعَ الآبْ.

²⁵وِالشَّيْء الِّي وْعِدْنَا بِيهْ المَسِيحْ هُوَ الحَيَاةْ الأَبَدِيَّة.

²⁶وكْتِبْتِلْكُمْ الحَاجَاتْ هَاذِي بَاشْ نَحْكِيلْكُمْ عْلَى النَّاسْ الِّي يْحِبُّوا يِخْدْعُوكُمْ.

²⁷آمَا إِنْتُومَا مَسْحَةْ الرُّوحْ القُدُسْ الِّي خْذِيتُوهاَ مِنْ عِنْدْ اللهْ ثَابْتَة فِيكُمْ هَاذَاكَا عْلاَشْ مَا حَاجِتْكُمْشْ بِشْكُونْ يْعَلِّمْكُمْ، رَاهُو رُوحْ اللهْ نَفْسُو يْعَلِّمْكُمْ كُلْ شَيْء وْرُوحْ اللهْ هُوَ حَقْ وْمُوشْ بَاطِلْ. إِمَّالاَ شِدُّوا صْحِيحْ فِي المَسِيحْ كِيفْ مَا عَلِّمْكُمْ الرُّوحْ.

²⁸يَا وْلاَدِي شِدُّوا صْحِيحْ فِي المَسِيحْ بَاشْ تْكُونْ رُوسْنَا مَرْفُوعَة قُدَّامُو وْمَا نَحْشْمُوشْ مِنُّو وَقْتِلِّي يَرْجَعْ.

²⁹وْمَا دَامْكُمْ تَعْرْفُوا الِّي المَسِيحْ بَارْ أَعْرْفُوا زَادَا الِّي كُلْ مِنْ يَعْمِلْ الخِيرْ يْوَرِّي الِّي هُوَ مُولُودْ مِنْ اللهْ.