Read Tunisian Arabic New Testament يُوحَنَّا الأَوِلْ 4 Bible Online

يُوحَنَّا الأَوِلْ 4 - Tunisian Arabic New Testament bible

يُوحَنَّا الأَوِلْ 4

¹يَا حْبَابِي مَا تْصَدّْقُوشْ الأَرْوَاحْ الكُلْ آمَا تْأَكّْدُوا مِنْهَا كَانْ هِيَ مِنْ عِنْدْ رَبِّي وِلاَّ لاَ، رَاهُمْ ظُهْرُوا فِي الدِّنْيَا بَرْشَة أَنْبِيَاءْ كَذَّابِينْ.

²وْهَاوْ كِيفَاشْ تَعْرْفُوا رُوحْ اللهْ: كُلْ رُوحْ يِسْتَعْرِفْ بِلِّي يَسُوعْ المَسِيحْ جَا لِلأَرْضْ فِي جَسَدْ إِنْسَانْ هُوَ رُوحْ مِنْ عِنْدْ اللهْ.

³وْكُلْ رُوحْ مَا يِسْتَعْرِفْشْ الِّي يَسُوعْ جَا فِي جَسَدْ إِنْسَانْ مُوشْ مِنْ عِنْدْ الله آمَا رَاهُو هُوَ رُوحْ المَسِيحْ الدَّجَّالْ الِّي سْمَعْتُوا إِنُّو بَاشْ يْجِي وْهُوَ تَوَّا مُوجُودْ فِي الدِّنْيَا.

⁴يَا وْلاَدِي إِنْتُومَا مِنْ عِنْدْ اللهْ، هَاذَاكَا عْلاَشْ غْلِبْتُوا الأَنْبِيَاءْ الدَّجَّالِينْ، رَاهُو الِّي فِيكُمْ أَقْوَى مِلِّي فِي العَالَمْ.

⁵وِالأَنْبِيَاءْ الدَّجَّالِينْ يِتْكَلّْمُوا كْلاَمْ الدِّنْيَا عْلَى خَاطِرْهُمْ مِالدِّنْيَا، هَاذَاكَا عْلاَشْ النَّاسْ الِّي فِي الدِّنْيَا يِسْمْعُولْهُمْ.

⁶وْإِحْنَا مِنْ عِنْدْ اللهْ وِلِّي يَعْرِفْ اللهْ يِسْمَعْ كْلاَمْنَا وِلِّي مُوشْ مِنْ عِنْدْ اللهْ مَا يِسْمَعْشْ كْلاَمْنَا. وْهَكَّا انَّجّْمُوا نَعْرْفُوا رُوحْ الحَقْ مِنْ رُوحْ البَاطِلْ.

⁷يَا حْبَابِي خَلِّينَا نْحِبُّوا بْعَضْنَا، رَاهِي المْحَبَّة تْجِي مِنْ عِنْدْ رَبِّي وْكُلْ وَاحِدْ يْحِبْ هُوَ مُولُودْ مِنْ اللهْ وْيَعْرِفْ اللهْ.

⁸وِلِّي مَا يْحِبِّشْ مَا يَعْرِفْشْ اللهْ عْلَى خَاطِرْ اللهْ مْحَبَّة.

⁹وْهَكَّا وَرَّانَا اللهْ مْحَبّْتُو وَقْتِلِّي بْعَثْ ابْنُو الوَحِيدْ لِلدِّنْيَا بَاشْ يَعْطِينَا بِيهْ هُوَ حَيَاةْ.

¹⁰وْهَاذِي هِيَ المْحَبَّة إِنُّو مُوشْ أَحْنَا حَبِّينَا اللهْ آمَا هُوَ حَبّْنَا لُوِّلْ هَاذَاكَا عْلاَشْ بْعَثْ ابْنُو بَاشْ يْكَفِّرْ عْلَى ذْنُوبْنَا.

¹¹يَا حْبَابِي مَادَامْ اللهْ حَبّْنَا هَالمْحَبَّة العْظِيمَة لاَزِمْ أَحْنَا زَادَا نْحِبُّوا بْعَضْنَا.

¹²حَتَّى وَاحِدْ مَا شَافْ اللهْ آمَا وَقْتِلِّي نْحِبُّوا بْعَضْنَا، اللهْ يِثْبِتْ فِينَا وِتْكُونْ مْحَبّْتُو كَامْلَة فِي قْلُوبْنَا.

¹³وِلِّي يْأَكّْدِلْنَا إِنُّو أَحْنَا ثَابْتِينْ فِي اللهْ وْهُوَ ثَابِتْ فِينَا هُوَ إِنُّو عْطَانَا الرُّوحْ مْتَاعُو.

¹⁴وْإِحْنَا رِينَا وْنِشْهْدُوا إِنُّو الآبْ بْعَثْ ابْنُو بَاشْ يْكُونْ المُخَلِّصْ مْتَاعْ العَالَمْ مِالذْنُوبْ.

¹⁵كُلْ وَاحِدْ يِسْتَعْرِفْ إِنُّو يَسُوعْ هُوَ إِبْنْ اللهْ، يِثْبِتْ اللهْ فِيهْ وْهُوَ يِثْبِتْ فِي اللهْ.

¹⁶وْإِحْنَا نَعْرْفُوا وِنْصَدّْقُوا إِنُّو اللهْ يْحِبّْنَا. اللهْ مْحَبَّة وِلِّي يِثْبِتْ فِي المْحَبَّة يِثْبِتْ فِي اللهْ وِالله يِثْبِتْ فِيهْ.

¹⁷وْهَكَّا تِكْمِلْ مْحَبِّةْ اللهْ فِينَا وَقْتِلِّي تَعْطِينَا ثِقَة فِي يُومْ الحْسَابْ وْكِيفْ مَا عَاشْ المَسِيحْ فِي العَالَمْ أَحْنَا زَادَا بَاشْ نْعِيشُوا كِيفُو.

¹⁸مَا ثَمَّاشْ خُوفْ فِي المْحَبَّة آمَا المْحَبَّة الكَامْلَة تْنَحِّي أَيْ خُوفْ، رَاهُو الخُوفْ يْجِي مِنْ العِقَابْ مْتَاعْ رَبِّي وِلِّي يْخَافْ مَا تْكُونِشْ مْحَبِّةْ اللهْ كَامْلَة فِيهْ.

¹⁹وْإِحْنَا نْحِبُّوا عْلَى خَاطِرْ رَبِّي هُوَ الِّي حَبّْنَا لُوِّلْ.

²⁰إِذَا قَالْ وَاحِدْ: «آنَا نْحِبْ اللهْ» وْهُوَ يَكْرَهْ خُوهْ رَاهُو كَذَّابْ عْلَى خَاطِرْ الِّي مَا يْحِبِّشْ خُوهْ الِّي يْشُوفْ فِيهْ مَا يْنَجِّمْشْ يْحِبْ اللهْ الِّي عُمْرُو مَا شَافُو.

²¹وْهَاذِي وْصِيتُو لِينَا إِنُّو الِّي يْحِبْ اللهْ لاَزْمُو يْحِبْ خُوهْ زَادَا.