Read Tunisian Arabic New Testament يُوحَنَّا الأَوِلْ 5 Bible Online

يُوحَنَّا الأَوِلْ 5 - Tunisian Arabic New Testament bible

يُوحَنَّا الأَوِلْ 5

¹أَيْ وَاحِدْ يِمِّنْ إِنُّو يَسُوعْ هُوَ المَسِيحْ رَاهُو مُولُودْ مِنْ اللهْ وِلِّي يْحِبْ البُو لاَزْمُو يْحِبْ وْلاَدُو زَادَا.

²وْهَكَّا نَعْرْفُوا الِّي أَحْنَا وْلاَدْ اللهْ إِذَا كُنَّا نْحِبُّوا اللهْ وْنَعْمْلُوا بِالوْصَايَا مْتَاعُو.

³أَحْنَا نْظَهّْرُوا مْحَبِّتْنَا لْرَبِّي وَقْتِلِّي نَعْمْلُوا الوْصَايَا مْتَاعُو. وِوْصَايَاهْ مَا هِيشْ صْعِيبَة.

⁴المُولُودْ مِنْ اللهْ يِغْلِبْ العَالَمْ. وْإِيمَانَّا هُوَ الِّي يْخَلِّينَا نِغْلْبُوا العَالَمْ.

⁵وِشْكُونُو الِّي يْنَجِّمْ يِغْلِبْ الْعَالِمْ؟ كَانْ الِّي يِمِّنْ إِنُّو يَسُوعْ هُوَ إِبْنْ اللهْ.

⁶وْيَسُوعْ المَسِيحْ هُوَ الِّي جَا بِالمَاء وِالدَّمْ، مُوشْ بِالمَاء آكَاهُو آمَا بِالمَاء وِالدَّمْ، وِالرُّوحْ هُوَ الِّي يِشْهِدْ عْلَى خَاطِرْ الرُّوحْ هُوَ الحَقْ.

⁷الِّي يِشْهْدُوا هُومَا ثْلاَثَة،

⁸الرُّوحْ وِالمَاء وِالدَّمْ، وِالثْلاَثَة هَاذُومَا مِتَّفْقِينْ.

⁹إِذَا كَانْ نِقْبْلُوا شْهَادِةْ النَّاسْ، رَاهِي شْهَادِةْ اللهْ أَعْظِمْ ابَّرْشَة عْلَى خَاطِرْهَا شْهَادِةْ اللهْ لْإِبْنُو.

¹⁰الِّي يِمِّنْ بِإِبْنْ اللهْ عَنْدُو الشّْهَادَة هَاذِي فِي قَلْبُو وِلِّي مَا يْصَدِّقْشْ اللهْ يْكَذّْبُو عْلَى خَاطْرُو مَا صَدِّقْشْ الشّْهَادَة الِّي شْهِدْ بِيهَا اللهْ لإِبْنُو.

¹¹وْهَاذِي هِيَ شْهَادِةْ اللهْ، إِنُّو اللهْ عْطَانَا حَيَاةْ أَبَدِيَّة وِالحَيَاةْ هَاذِي عْطَاهَالْنَا فِي ابْنُو.

¹²الِّي عَنْدُو إِبْنْ اللهْ عَنْدُو الحَيَاةْ وِلِّي مَا عِنْدُوشْ إِبْنْ اللهْ مَا عِنْدُوشْ الحَيَاةْ.

¹³كْتِبْتْ الحَاجَاتْ هَاذِي لِيكُمْ إِنْتُومَا الِّي تِمّْنُوا بْإِسْمْ إِبْنْ اللهْ بَاشْ تَعْرْفُوا الِّي عِنْدْكُمْ الحَيَاةْ الأَبَدِيَّة.

¹⁴وْعَنْدْنَا الثِّقَة فِي اللهْ إِنُّو إِذَا نُطْلْبُوا مِنُّو الحَاجَة الِّي تِرْضِيهْ يَعْطِيهَالْنَا.

¹⁵وْمَادَامْنَا مِتْأَكّْدِينْ إِنُّو يِسْمَعْنَا فِي أَيْ حَاجَة نُطْلْبُوهَا مِنُّو نَعْرْفُوا الِّي أَحْنَا نَاخْذُوا الحَاجَاتْ الِّي نُطْلْبُوهَا مِنُّو.

¹⁶إِذَا وَاحِدْ مِنْكُمْ شَافْ خُوهْ يَعْمِلْ فِي ذَنْبْ مَا يْهِزُّوشْ لِلمُوتْ يِلْزْمُو يْصَلِّي مِنْ أَجْلُو للهْ بَاشْ يْخَلِّيهْ حَيْ، هَاذَا إِذَا كَانْ الذَّنْبْ الِّي يَعْمِلْ فِيهْ مَا يْهِزُّوشْ لِلمُوتْ. آمَا رَاهُو ثَمَّة ذَنْبْ يْهِزْ لِلمُوتْ وْآنَا لِهْنَا مَا نُقْصُدْشْ الذَّنْبْ هَاذَا.

¹⁷كُلْ مَعْصْيَة هِيَ ذَنْبْ آمَا مُوشْ كُلْ ذَنْبْ يْهِزْ لِلمُوتْ.

¹⁸أَحْنَا نَعْرْفُوا إِنُّو المُولُودْ مِالله مَا يْعِيشِشْ فِي الذْنُوبْ، رَاهُو إِبْنْ اللهْ يِحْمِيهْ وِالشِّرِّيرْ مَا يْنَجِّمْ يَعْمِلُّو حَتَّى شَيْء.

¹⁹نَعْرْفُوا الِّي أَحْنَا وْلاَدْ اللهْ آمَا العَالَمْ الكُلُّو مْسَيْطِرْ عْلِيهْ الشِّرِّيرْ.

²⁰وْإِحْنَا نَعْرْفُوا الِّي إِبْنْ اللهْ جَا وِعْطَانَا إِنَّا نِفْهْمُوا وْنَعْرْفُوا الحَقْ وْإِحْنَا تَوَّا ثَابْتِينْ فِي اللهْ الِّي هُوَ الحَقْ عْلَى خَاطِرْنَا ثَابْتِينْ فِي ابْنُو يَسُوعْ المَسِيحْ الِّي هُوَ الإِلاَهْ الحَقْ وْهُوَ الحَيَاةْ الأَبَدِيَّة.

²¹يَا وْلاَدِي رُدُّوا بَالْكُمْ عْلَى رْوَاحْكُمْ مِالصْنَبْ.