Read Tunisian Arabic New Testament يُوحَنَّا الثَّانِيْ 1 Bible Online

يُوحَنَّا الثَّانِيْ 1 - Tunisian Arabic New Testament bible

يُوحَنَّا الثَّانِيْ 1

¹نِكْتْبِلْكُمْ آنَا الشِّيخْ لِلسَّيّْدَة كِيرِيَّة الِّي خْتَارْهَا اللهْ وْلِوْلاَدْهَا الِّي نْحِبّْهُمْ بِالحَقْ وْمُوشْ آنَا وَحْدِي نْحِبّْهُمْ آمَا كُلْ وَاحِدْ عْرَفْ الحَقْ.

²بِسْبَبْ الحَقْ الِّي ثَابِتْ فِينَا وِلِّي بَاشْ يَبْقَى مْعَانَا دِيمَا.

³وْإِنْ شَاء الله تْكُونْ عِنْدْنَا نِعْمَة وْرَحْمَة وْسَلاَمْ مِنْ عِنْدْ اللهْ الآبْ وِالرَّبْ يَسُوعْ المَسِيحْ إِبْنْ الآبْ فِي الحَقْ وِالمْحَبَّة.

⁴فْرَحْتْ بَرْشَة كِلْقِيتْ شْكُونْ مِنْ وْلاَدِكْ يْتَبَّعْ فِي الحَقْ كِيمَا وَصَّانَا الآبْ.

⁵وْتَوَّا يَا سَيّْدَة كِيرِيَّة نُطْلُبْ مِنِّكْ طَلَبْ مُوشْ وْصِيَّة جْدِيدَة آمَا هِيَ نَفْسْ الوْصِيَّة الِّي عِنْدْكُمْ مِاللُّوِّلْ وْهِيَ إِنَّا لْكُلْنَا لاَزِمْنَا نْحِبُّوا بْعَضْنَا.

⁶وْهَاذِي هِيَ المْحَبَّة هِيَ إِنَّا نْعِيشُوا كِيمَا وَصَّانَا وْهَاذِي هِيَ الوْصِيَّة كِيمَا سْمَعْتُوهَا مِاللُّوِّلْ هِيَ إِنَّا نْعِيشُوا فِي المْحَبَّة.

⁷بَرْشَة نَاسْ غَشَّاشِينْ فِي العَالَمْ يُنْكْرُوا إِنُّو يَسُوعْ المَسِيحْ جَا لِلأَرْضْ فِي جَسَدْ إِنْسَانْ وْكُلْ وَاحِدْ مِنْ هَاذُومَا هُوَ الغَشَّاشْ الِّي يْبَعِّدْ النَّاسْ عْلَى الحَقْ وْهُوَ بِيدُو المَسِيحْ الدَّجَّالْ.

⁸رُدُّوا بَالْكُمْ عْلَى رْوَاحْكُمْ بَاشْ مَا تْضَيّْعُوشْ الِّي تْعِبْنَا فِيهْ عْلَى خَاطِرْكُمْ آمَا تَاخْذُوا أَجْرْكُمْ كَامِلْ.

⁹الِّي يْزِيدْ عْلَى التَّعْلِيمْ مْتَاعْ المَسِيحْ وْمَا يِثْبِتْشْ فِيهْ رَاهُو بْعِيدْ عْلَى اللهْ آمَا الِّي يِثْبِتْ فِي التَّعْلِيمْ مْتَاعُو رَاهُو يِثْبِتْ فِي الآبْ وِالإِبْنْ مْعَ بْعَضْهُمْ.

¹⁰إِذَا جَاكُمْ وَاحِدْ بْتَعْلِيمْ غِيرْ التَّعْلِيمْ هَاذَا مَا تِقْبْلُوهِشْ فِي دْيَارْكُمْ وْمَا تِتْعَامْلُوشْ مْعَاهْ.

¹¹رَاهُو الِّي يْسَلِّمْ عْلِيهْ يِتْشَارِكْ مْعَاهْ فِي عْمَايْلُو الخَايْبَة.

¹²عِنْدِي بَرْشَة حَاجَاتْ حَبِّيتْ نِكْتِبْهَالْكُمْ آمَا مَا حَبِّيتِشْ نِكْتِبْهَا بِالحْبَارْ عْلَى الأَوْرَاقْ، عْلَى خَاطِرْنِي نِتْمَنَّى بَاشْ نْزُورْكُمْ وْوَقْتْهَا نَحْكِيوْ فِيهَا الوِجْهْ فِي الوِجْهْ بَاشْ تِكْمِلْ فَرْحِتْنَا.

¹³يْسَلْمُوا عْلِيكْ وْلاَدْ أُخْتِكْ الِّي خْتَارْهَا اللهْ.