Read Tunisian Arabic New Testament يَهُوذَا 1 Bible Online

يَهُوذَا 1 - Tunisian Arabic New Testament bible

يَهُوذَا 1

¹مِنْ يَهُوذَا، الخَادِمْ مْتَاعْ يَسُوعْ المَسِيحْ، وْ خُو يَعْقُوبْ، لِلِّي دْعَاهُمْ اللهْ الآبْ وْحَبّْهُمْ وِحْفَظْهُمْ لْيَسُوعْ المَسِيحْ.

²بَرْشَة رَحْمَة وْسَلاَمْ وِمْحَبَّة لِيكُمْ.

³يَا حْبَابِي، آنَا مُشْتَاقْ بَرْشَة بَاشْ نِكْتْبِلْكُمْ عْلَى الخَلاَصْ الِّي عِنْدْنَا الكُلْنَا، حَسِّيتْ الِّي يِلْزِمْنِي نْأكِّدْ عْلِيكُمْ إِنّْكُمْ تْجَاهْدُوا عْلَى خَاطِرْ الإِيمَانْ الِّي تِعْطَى لِلقِدِّيسِينْ بِالكَامِلْ فَرْدْ مَرَّة.

⁴رَاهُمْ ثَمَّة نَاسْ دَخْلُوا مَا بِينَاتْكُمْ فِي السِّرْ وْهُومَا تْقَدّْرِلْهُمْ مِنْ قْبَلْ بَاشْ يِتْحْكَمْ عْلِيهُمْ، نَاسْ فَاسْدِينْ يِسْتْغَلُّوا فِي نِعْمِةْ اللهْ بَاشْ يَعْمْلُوا الحَاجَاتْ الخَايْبَة الكُلْهَا وْيُنْكْرُوا سِيدْنَا وْرَبْنَا الِّي مَا عِنْدْنَاشْ غِيرُو يَسُوعْ المَسِيحْ.

⁵تَوَّا نْحِبْ نْذَكِّرْكُمْ، رَغْمِلِّي إِنْتُومَا تَعْرْفُوا الشَّيْء هَاذَا بِالقْدَا إِنُّو الرَّبْ بَعْدْ مَا مَنَّعْ شَعْبْ إِسْرَائِيلْ مِنْ أَرْضْ مَصْرْ، هْلِكْ الِّي مَا امّْنُوشْ مِنْهُمْ،

⁶وِالمْلاَيْكَة الِّي مَا حَافْظُوشْ عْلَى بْلاَصِتْهُمْ العَالْيَة وْخَرْجُوا مِالبْلاَصَة الِّي يُسْكْنُوا فِيهَا، رْبَطْهُمْ لِلأَبَدْ بِسْلاَسِلْ فِي قَلْبْ الظْلاَمْ حَتَّى لِينْ يْجِي الحُكْمْ مْتَاعْ اليُومْ العْظِيمْ

⁷بِالضَّبْطْ كِيفْ سَدُومْ وْعَمُورَة وِالمُدُنْ الِّي دَايْرِينْ بِيهُمْ الِّي كَانُوا يَزْنَاوْا كِيفْهُمْ بِالضَّبْطْ وْكَثّْرُوا مِالشْهَاوِي مْتَاعْ الزْنَى الِّي مَا هِيشْ مَعْقُولَة، كَانُوا مِثَالْ كِتْعَاقْبُوا بِالنَّارْ الِّي شَاعْلَة لِلأَبَدْ.

⁸وْكِيفْ هَكَّا النَّاسْ هَاذُومَا الِّي يْنَجّْسُوا فِي بْدُونَاتْهُمْ بِالأَحْلاَمْ مْتَاعْهُمْ وْمَا يَعْمْلُوشْ قِيمَة لِلسُّلْطَة وِيْهِينُوا المَخْلُوقَاتْ المَجِيدَة،

⁹وْحَتَّى مِيكَائِيلْ رَئِيسْ المْلاَيْكَة كِتْعَارِكْ مْعَ بْلِيسْ عْلَى الجُثَّة مْتَاعْ مُوسَى مَا حَاوِلْشْ يْعَايْرُو وْيُحْكُمْ عْلِيهْ آمَا قَالُّو: «رَبِّي يْحَاسْبِكْ!»

¹⁰النَّاسْ هَاذُومَا يْهِينُوا فِي حَاجَاتْ مَا يَعْرْفُوهَاشْ، آمَا الحَاجَاتْ الِّي يِفْهْمُوهَا بِطْبِيعِتْهُمْ رَاهُمْ يْفَسّْدُوا رْوَاحْهُمْ بِيهَا كِيفْ الحَيَوَانَاتْ الِّي مَا تْفَكِّرْشْ.

¹¹يَا وِيلْهُمْ! رَاهُمْ يِمْشِيوْ فِي طْرِيقْ قَايِينْ وسَلْمُوا رْوَاحْهُمْ لِلضْلاَلْ كِيفْ بَلْعَامْ طَامْعِينْ فِي الفْلُوسْ وِتْهِلْكُوا بِالمَعْصْيَة كِيفْ مَا تِهْلِكْ قُورَحْ.

¹²هُومَا بْقُعْ مْتَاعْ وْسَخْ فِي الأَعْيَادْ مْتَاعْ المْحَبَّة، يِتْمَتّْعُوا مْعَ بْعَضْهُمْ مِنْ غِيرْ مَا يْخَافُوا، وِيْشْيّْخُوا فِي رْوَاحْهُمْ، سْحُبْ مَا فِيهَاشْ مْطَرْ هَازْهَا الرِّيحْ. شَجَرْ فِي آخِرْ الخْرِيفْ مَا يْجِيبِشْ الغَلَّة، مَاتْ مَرّْتِينْ وِتْقَلَّعْ بْعْرُوقُو.

¹³مُوجْ هَايِجْ مْتَاعْ البْحَرْ، عَامْلِينْ كْشَاكِشْ العَارْ مْتَاعْهُمْ. نْجُومْ ضَايْعَة بَاشْ تَبْقَى فِي قَلْبْ الظْلاَمْ لِلأَبَدْ.

¹⁴وِعْلَى النَّاسْ هَاذُومَا زَادَا تْنَبَّأ أَخْنُوخْ مِالجِيلْ السَّابِعْ بَعْدْ آدَمْ وْقَالْ: «شُوفُوا! هَاوْ الرَّبْ جَا مْعَ الآلاَفْ مِالمْلاَيْكَة القِدِّيسِينْ مْتَاعُو

¹⁵بَاشْ يُحْكُمْ عْلَى النَّاسْ وِيْوَرِّي للفُسَّادْ العْمَايِلْ الفَاسْدَة الِّي عَمْلُوهَا الكُلْهَا وِالحَاجَاتْ الخَايْبَة الِّي المِذْنْبِينْ الفَاسْدِينْ قَالُوهَا عْلِيهْ.»

¹⁶رَاهُمْ يِتْشَكَّاوْ وِيْلُومُوا فِي النَّاسْ وِيْتَبّْعُوا فِي الشْهَاوِي مْتَاعْهُمْ وْيَحْكِيوْ فِي حَاجَاتْ كْبِيرَة بَاشْ يِعْجْبُوا النَّاسْ وْيَقْضِيوْ مْصَالِحْهُمْ.

¹⁷آمَا يِلْزِمْكُمْ تِتْذَكّْرُوا، يَا حْبَابِي، الشَّيْء الِّي سِبْقُوا وْخَبّْرُوا بِيهْ الرُّسُلْ مْتَاعْ رَبّْنَا يَسُوعْ المَسِيحْ،

¹⁸رَاهُمْ قَالُولْكُمْ: «فِي آخِرْ الزْمَانْ بَاشْ يْكُونُوا ثَمَّة نَاسْ يِتْمَسْخْرُوا بَرْشَة وِيْتَبّْعُوا فِي شْهَاوِيهُمْ الفَاسْدَة.»

¹⁹هُومَا الِّي يْفَرّْقُوا مَا بِينْ النَّاسْ، يِجْرِيوْ وْرَاء شْهَاوِي البْدَنْ وْمَا عِنْدْهُمْشْ الرُّوحْ.

²⁰آمَا إِنْتُومَا يَا حْبَابِي، إِبْنِيوْ رْوَاحْكُمْ عْلَى أَقْدِسْ إِيمَانْ عِنْدْكُمْ، وْإِنْتُومَا تْصَلِّيوْ بِالرُّوحْ القُدُسْ

²¹ابْقَاوْ دِيمَا فِي المْحَبَّة مْتَاعْ اللهْ وْإِنْتُومَا تِسْتَنَّاوْ فِي رَحْمِةْ رَبّْنَا يَسُوعْ المَسِيحْ الِّي تَعْطِيكُمْ حَيَاةْ أَبَدِيَّة.

²²ارْحْمُوا الِّي عِنْدْهُمْ شَكْ

²³وْخَلّْصُوا نَاسْ أُخْرِينْ، كِتَخْطْفُوهُمْ مِالنَّارْ وْإِنْتُومَا خَايْفِينْ، آمَا أَكْرْهُوا حَتَّى اللِّبْسَة الِّي نَجّْسُوهَا بِبْدُونَاتْهُمْ.

²⁴للهْ القَادِرْ بَاشْ يَحْفِظْكُمْ مِالطْيَاحْ، وِيْجِيبْكُمْ وِانْتُومَا مَا عْلِيكُمْشْ لُومْ لِلمَحْضِرْ مْتَاعْ المَجْدْ مْتَاعُو وْإِنْتُومَا فَرْحَانِينْ،

²⁵المَجْدْ وِالقُدْرَة وِالسْيَادَة وِالسُّلْطَة للهْ الوَاحِدْ الِّي هُوَ مُخَلِّصْنَا عْلَى طْرِيقْ رَبّْنَا يَسُوعْ المَسِيحْ، مِنْ أَوِّلْ الزْمَانْ وْتَوَّا وْلِلأَبَدْ. آمِينْ.