Read Tunisian Arabic New Testament الرُّؤْيَا 1 Bible Online

الرُّؤْيَا 1 - Tunisian Arabic New Testament bible

الرُّؤْيَا 1

¹هَاذِي هِيَ الرُّؤْيَا الِّي عْطَاهَا اللهْ لْيَسُوعْ المَسِيحْ بَاشْ يْوَرِّي لِلخُدَّامْ مْتَاعُو الحَاجَاتْ الِّي لاَزِمْ تْصِيرْ عْلَى قْرِيبْ، وِكْشِفْهَا كِبْعَثْ المَلاَكْ مْتَاعُو لِلخَادِمْ مْتَاعُو يُوحَنَّا،

²الِّي شْهِدْ عْلَى كِلْمِةْ اللهْ وِشْهَادِةْ يَسُوعْ المَسِيحْ الِّي شَافْهَا الكُلْهَا.

³صَحَّة لِيهْ الِّي يَقْرَى كْلاَمْ النُّبُوءَة قُدَّامْ النَّاسْ، وْصَحَّة لِيهُمْ الِّي يِسْمْعُوهَا وِيْطِيعُوا المَكْتُوبْ فِيهَا عْلَى خَاطِرْ الوَقْتْ قْرُبْ.

⁴مِنْ يُوحَنَّا لِلكَنَايِسْ السَّبْعَة الِّي فِي مَنْطِقْةْ أَسِيَّة. النِّعْمَة وِالسَّلاَمْ عْلِيكُمْ مِنْ عِنْدْ المُوجُودْ تَوَّا وِلِّي كَانْ مُوجُودْ وِلِّي هُوَ جَايْ، وْمِالأَرْوَاحْ السَّبْعَة الِّي قُدَّامْ عَرْشُو،

⁵وْمِنْ يَسُوعْ المَسِيحْ الشَّاهِدْ الأَمِينْ أَوِّلْ مِنْ قَامْ مِنْ بِينْ المُوتَى وْمَلِكْ المُلُوكْ مْتَاعْ الأَرْضْ. الِّي حَبّْنَا وْحَرِّرْنَا مِنْ ذْنُوبْنَا بْدَمُّو،

⁶وِعْمَلْ مِنَّا مَمْلْكَة مْتَاعْ كُهَّانْ للهْ بُوهْ، المَجْدْ وِالسُّلْطَة لِيهْ لِلأَبَدْ. آمِينْ.

⁷هَاوْ جَايْ مْعَ السْحَابْ! بَاشْ تْشُوفُو كُلْ عِينْ حَتَّى الِّي ضَرْبُوهْ بِالرُّمْحْ، عْرُوشَاتْ الأَرْضْ الكُلْهَا، تْنَوِّحْ عْلِيهْ. إِي نْعَمْ، آمِينْ.

⁸يْقُولْ الرَّبْ الإِلاَهْ: «آنَا الأَلِفْ وِاليَاءْ» المُوجُودْ تَوَّا وِلِّي كَانْ مُوجُودْ وِلِّي هُوَ جَايْ القَادِرْ عْلَى كُلْ شَيْء.

⁹آنَا يُوحَنَّا، خُوكُمْ وِشْرِيكُّمْ فِي المِحْنَة وِالْمَلَكُوتْ وِالصَّبْرْ فِي يَسُوعْ، كُنْتْ فِي الجَزِيرَة الِّي إِسْمْهَا بَطْمُسْ عْلَى خَاطِرْ كِلْمِةْ اللهْ وِشْهَادِةْ يَسُوعْ،

¹⁰كُنْتْ فِي الرُّوحْ فِي يُومْ الرَّبْ، يَاخِي سْمَعْتْ صُوتْ وْرَايَا، قْوِي كِيفْ صُوتْ البُوقْ

¹¹يْقُولْ: «إِكْتِبْ الشَّيْء الِّي تْشُوفُو فِي كْتَابْ وْأَبْعْثُو لِلسَّبْعَة كَنَايِسْ هَاذُمْ: أَفَسُسْ وْسِمِيرْنَةَ وْبَرْغامُسَ وْثِيَاتِيرَا وْسَارْدِسْ وْفِيلاَدَلْفْيَةَ وْلاَوْدُكِيَّةَ.»

¹²تْلَفِّتّْ بَاشْ نْشُوفْ شْكُونْ الِّي يْكَلِّمْ فِيَّ، يَاخِي شُفْتْ سَبْعَة فْنَارَاتْ ذْهَبْ

¹³دَايْرِينْ بْوَاحِدْ يِشْبِهْ لْإِبْنْ الإِنْسَانْ، لاَبِسْ جِبَّة طْوِيلَة، وْمِتْحَزِّمْ بِحْزَامْ ذْهَبْ عْلَى سِدْرُو،

¹⁴وْشَعْرُو وْرَاسُو بْيُضْ كِيفْ الصُّوفْ الأَبْيِضْ وِلاَّ الثِّلْجْ، وْعِينِيهْ كِيفْ النَّارْ الشَّاعْلَة،

¹⁵وْرِجْلِيهْ كِيفْ النْحَاسْ الِّي مْسَخِّنْ فِي النَّارْ وْمَصْقُولْ، وْصُوتُو كِيفْ الصُّوتْ القْوِي مْتَاعْ المَاء.

¹⁶وْفِي يِدُّو اليْمِينْ سَبْعَة نْجُومْ، وْخَارِجْ مِنْ فُمُّو سِيفْ مَاضِي مِالشِّيرْتِينْ، وْوِجْهُو كِيفْ الشَّمْسْ فِي قَلْبْ السْمَاءْ.

¹⁷وْوَقْتِلِّي شُفْتُو طُحْتْ قُدَّامْ سَاقِيهْ كِيفْ المِيتْ، حَطْ عْلِيَّ يِدُّو اليْمِينْ وْقَالْ: «مَا تْخَافِشْ، آنَا الأُوِّلْ وِالإِخِّرْ،

¹⁸آنَا الحَيْ! كُنْتْ مِيتْ، وْهَانِي حَيْ لِلأَبَدْ. عِنْدِي مْفَاتِحْ المُوتْ وِالهَاوْيَة.

¹⁹إِمَّالاَ إِكْتِبْ الِّي شُفْتُو، وِلِّي تْشُوفْ فِيهْ تَوَّا، وِلِّي بَاشْ يَاقَعْ بَعْدْ الحَاجَاتْ هَاذُمْ.

²⁰آمَا كَانِكْ عْلَى السَّبْعَة نْجُومْ الِّي تْشُوفْ فِيهُمْ فِي يِدِّي اليْمِينْ وِالسَّبْعَة فْنَارَاتْ ذْهَبْ، رَاهُمْ السَّبْعَة نْجُومْ هُومَا المْلاَيْكَة مْتَاعْ السَّبْعَة كَنَايِسْ، وِالسَّبْعَة فْنَارَاتْ هُومَا السَّبْعَة كَنَايِسْ.»