Read Tunisian Arabic New Testament الرُّؤْيَا 10 Bible Online

الرُّؤْيَا 10 - Tunisian Arabic New Testament bible

الرُّؤْيَا 10

¹وِمْبَاعِدْ شُفْتْ مَلاَكْ آخَرْ قْوِي نَازِلْ مِالسْمَاءْ فِي سْحَابَة، وْفُوقْ رَاسُو قَوْسْ قُزَحْ، وْوِجْهُو كِيفْ الشَّمْسْ وْسَاقِيهْ كِيفْ زُوزْ عْرُصْ مْتَاعْ نَارْ،

²وْعِنْدُو كْتَابْ صْغِيرْ فِي يِدُّو مَحْلُولْ. وْحَطْ سَاقُو اليْمِينْ عْلَى البْحَرْ وْسَاقُو اليْسَارْ عْلَى البَرْ.

³وْصَاحْ بْصُوتْ عَالِي كِيفْ مَا يِزْهِرْ الصِّيدْ، وْبَعْدْ مَا صَاحْ تِسْمَعْ صُوتْ الرْعُودْ السَّبْعَة

⁴وْوَقْتِلِّي نُطْقُوا الرْعُودْ السَّبْعَة حَضِّرْتْ رُوحِي بَاشْ نِكْتِبْ يَاخِي سْمَعْتْ صُوتْ مِالسْمَاءْ يْقُلِّي: «إِخْتِمْ الشَّيْء الِّي نُطْقُوا بِيهْ الرْعُودْ السَّبْعَة وْمَا تِكْتْبُوشْ!»

⁵وِالمَلاَكْ الِّي شُفْتُو وَاقِفْ عْلَى البْحَرْ وِالبَرْ هَزْ يِدُّو لِلسْمَاء

⁶وِحْلِفْ بِالحَيْ لِلأَبَدْ، الِّي خْلَقْ السْمَاءْ وِلِّي فِيهَا، وِالأَرْضْ وِلِّي فِيهَا، وِالبْحَرْ وِلِّي فِيهْ، إِنُّو حَتَّى شَيْء مَا يِتْأَجِّلْ.

⁷آمَا كِيْجِي الوَقْتْ الِّي بَاشْ يْنَادِي فِيهْ المَلاَكْ السَّابِعْ بِالبُوقْ مْتَاعُو وْوَقْتِلِّي هُوَ يْحَضِّرْ فِي رُوحُو بَاشْ يُنْفُخْ تَمْ السِّرْ مْتَاعْ اللهْ كِيمَا بَشِّرْ بِيهْ عَبِيدُو الأَنْبِيَاءْ.

⁸وِالصُّوتْ الِّي سْمَعْتُو مِالسْمَاءْ، كَلِّمْنِي مَرَّة أُخْرَى وْقَالْ: «إِمْشِي، خُوذْ الكْتَابْ المَحْلُولْ الِّي فِي يِدْ المَلاَكْ الِّي وَاقِفْ عْلَى البْحَرْ وِالبَرْ.»

⁹إِمَّالاَ مْشِيتْ لِلمَلاَكْ وْقُتْلُو: «أَعْطِينِي الكْتَابْ الصْغِيرْ.» يَاخِي قَالِّي: «خُوذُوا وْكُولُو وْبِشْ يْكُونْ مُرْ فِي مَعْدْتِكْ آمَا فِي فُمِّكْ بَاشْ يْكُونْ حْلُو كِيفْ العْسَلْ.»

¹⁰وِخْذِيتْ الكْتَابْ الصْغِيرْ مِنْ يِدْ المَلاَكْ وِكْلِيتُو، وْكَانْ حْلُو فِي فُمِّي كِيفْ العْسَلْ، آمَا بَعْدْ مَا كْلِيتُو وَلَّى مُرْ فِي مَعْدْتِي.

¹¹وْقَالُولِي: «لاَزْمِكْ تِتْنَبَّأْ مَرَّة أُخْرَى عْلَى بَرْشَة شْعُوبْ وْأُمَمْ وْلُغَاتْ وْمُلُوكْ.»