Read Tunisian Arabic New Testament الرُّؤْيَا 11 Bible Online

الرُّؤْيَا 11 - Tunisian Arabic New Testament bible

الرُّؤْيَا 11

¹وْتِعْطَاتْلِي قَصْبَة كِيفْ العْصَا وِتْقَالِّي: «قُومْ! قِيسْ الهَيْكِلْ مْتَاعْ اللهْ وِالمَذْبَحْ وْإِحْسِبْ الِّي سَاجْدِينْ الغَادِي.

²آمَا السَّاحَة البَرَّانِيَّة مْتَاعْ الهَيْكِلْ خَلِّيهَا مَا تْقِيسْهَاشْ عْلَى خَاطِرْهَا تِعْطَاتْ لِلأُمَمْ الِّي مَا يِمّْنُوشْ بْرَبِّي وْبِشْ يْعَفّْسُوا المْدِينَة المُقَدّْسَة لْمُدِّةْ ثْنِينْ وْأَرْبْعِينْ شْهَرْ.

³وْبِشْ نَعْطِي السُّلْطَة لِلزُّوزْ شْهُودْ مْتَاعِي بَاشْ يِتْنَبّْأُوا أَلْفْ وْمِيتِينْ وْسِتِّينْ يُومْ وْهُومَا لاَبْسِينْ الشْكَايِرْ.»

⁴وْهَاذُومَا هُومَا الزُّوزْ زِيتُونَاتْ وِالزُّوزْ مْنَارَاتْ الوَاقْفِينْ قُدَّامْ الرَّبْ مْتَاعْ الأَرْضْ.

⁵إِذَا كَانْ وَاحِدْ حَاوِلْ بَاشْ يْضُرّْهُمْ، تُخْرُجْ نَارْ مِنْ افَّامْهُمْ وْتَاكُلْ الأَعْدَاءْ مْتَاعْهُمْ. إِذَا كَانْ أَيْ وَاحِدْ يْحِبْ يْضُرّْهُمْ رَاهُو يِلْزْمُو يِتْقْتَلْ هَكَّا.

⁶وْعَنْدْهُمْ سُلْطَة بَاشْ يْسَكّْرُوا السْمَاءْ، بَاشْ المْطَرْ مَا تْصُبِّشْ فِي النْهَارَاتْ الِّي يِتْنَبّْأُوا فِيهُمْ، وْعَنْدْهُمْ سُلْطَة عْلَى المَاء بَاشْ يْرُدُّوهْ دَمْ وْبَاشْ يْهَبّْطُوا المْصَايِبْ الكُلْهَا عْلَى الأَرْضْ وَقْتِلِّي يْحِبُّوا.

⁷وْوَقْتِلِّي يْكَمّْلُوا الشّْهَادَة مْتَاعْهُمْ يْجِي الوَحْشْ الِّي خَارِجْ مِالهَاوْيَة وْيِتْعَارِكْ مْعَاهُمْ وْيِغْلِبْهُمْ وْيُقْتُلْهُمْ.

⁸وْتَبْقَى بْدُونَاتْهُمْ فِي السَّاحَة مْتَاعْ المْدِينَة العْظِيمَة وِينْ رَبّْهُمْ مَاتْ مَصْلُوبْ وْهِيَ فِي اللُّغَة مْتَاعْ الرُّوحْ تِتْسَمَّى سَدُومْ وِلاَّ مَصْرْ.

⁹وِالنَّاسْ مِنْ كُلْ شَعْبْ وْعَرْشْ وْلُغَة وْأُمَّة يُخْزْرُوا لِبْدُونَاتْهُمْ لْمُدِّةْ ثْلاَثَة أَيَّامْ وْنُصْفْ، وْمَا خَلاَّوْشْ حَتَّى وَاحِدْ يْحُطّْهُمْ فِي قْبَرْ.

¹⁰وِالنَّاسْ الِّي فِي الدِّنْيَا بَاشْ يِشْمْتُوا فِيهُمْ وْيَفْرْحُوا وْيَعْطِيوْ هْدَايَا لِبْعَضْهُمْ عْلَى خَاطِرْ الزُّوزْ أَنْبِيَاءْ هَاذُومَا عَذّْبُوا النَّاسْ الِّي فِي الدِّنْيَا بَرْشَة.

¹¹وْبَعْدْ ثْلاَثَة أَيَّامْ وْنُصْفْ دْخَلْ فِيهُمْ رُوحْ حَيَاةْ مِنْ عِنْدْ اللهْ وْوُقْفُوا عْلَى سَاقِيهُمْ. وِالنَّاسْ الِّي يُخْزْرُولْهُمْ خَافُوا بَرْشَة،

¹²وْسَمْعُوا صُوتْ عَالِي مِالسْمَاءْ يْقُولِلْهُمْ: «أَطْلْعُوا لِهْنَا» وْطَلْعُوا لِلسْمَاء فِي سْحَابَة وْأَعْدَاءْهُمْ يُخْزْرُولْهُمْ.

¹³وْفِي الوَقْتْ هَاذَاكَا وْقَعْ زِلْزَالْ كْبِيرْ وْطَاحْ عْشُرْ المْدِينَة وْسَبْعَة آلاَفْ بَشَرْ قْتَلْهُمْ الزِّلْزَالْ، وِالبْقِيَّة تْرِعْبُوا وْمَجّْدُوا إِلاَهْ السْمَاءْ.

¹⁴الوِيلْ الثَّانِي فَاتْ، وْهَاوْ الوِيلْ الثَّالِثْ جَايْ عْلَى قْرِيبْ.

¹⁵وْنَادَى المَلاَكْ السَّابِعْ فِي البُوقْ مْتَاعُو، وْكَانِتْ ثَمَّة أَصْوَاتْ عَالْيَة فِي السْمَاءْ تْقُولْ: مَمَالِكْ الْعَالَمْ وَلاَّتْ مْتَاعْ رَبّْنَا وِمْتَاعْ مَسِيحُو، وْهُوَ بَاشْ يِمْلِكْ لِلأَبَدْ.

¹⁶وْرُكْعُوا الأَرْبْعَة وْعِشْرِينْ شِيخْ الِّي قَاعْدِينْ قُدَّامْ اللهْ عْلَى عْرُوشَاتْهُمْ وْهَبْطُوا عْلَى وْجُوهْهُمْ وْسِجْدُوا للهْ

¹⁷وْهُومَا يْقُولُوا: نُشْكْرُوكْ يَا الرَّبْ الإِلاَهْ القَادِرْ عْلَى كُلْ شَيْء الِّي مُوجُودْ تَوَّا وِلِّي كُنْتْ مُوجُودْ قْبَلْ واللّي جَايْ رَاكْ ظَهِّرْتْ قُدْرْتِكْ العْظِيمَة وِبْدِيتْ تِمْلِكْ.

¹⁸الشْعُوبْ تْغَشَشُوا وِالغَضَبْ مْتَاعِكْ جَا وِالوَقْتْ الِّي تُحْكُمْ فِيهْ عْلَى المُوتَى جَا وِتْجَازِي الخُدَّامْ مْتَاعِكْ وْأَنْبِيَاءِكْ وِالقِدِّيسِينْ مْتَاعِكْ وِالكْبَارْ وِالصْغَارْ الِّي يْخَافُوا إِسْمِكْ، وِادَّمِّرْ الِّي يْدَمّْرُوا فِي الأَرْضْ.

¹⁹وِمْبَاعِدْ تْحَلْ الهَيْكِلْ مْتَاعْ اللهْ فِي السْمَاءْ، وِظْهُرْ تَابُوتْ العَهْدْ فِي الهَيْكِلْ، وْجَاتْ بْرُوقْ وْأَصْوَاتْ وِرْعُودْ وِزْلاَزِلْ، وْبَرْشَة تَبْرُورِي.