Read Tunisian Arabic New Testament الرُّؤْيَا 13 Bible Online

الرُّؤْيَا 13 - Tunisian Arabic New Testament bible

الرُّؤْيَا 13

¹وِمْبَاعِدْ شُفْتْ وَحْشْ خَارِجْ مِالبْحَرْ، وْعِنْدُو عَشْرَة قْرُونْ وْسَبْعَة رُوسْ وِالقْرُونْ فُوقْهُمْ عَشْرَة تِيجَانْ وِالرُّوسْ فُوقْهُمْ أَسَامِي مْتَاعْ كُفْرْ.

²وِالوَحْشْ الِّي شُفْتُو كَانْ كِيفْ النِّمْرْ، وْعِنْدُو سَاقِينْ كِيفْ سَاقِينْ الدِّبْ وْفُمْ كِيفْ فُمْ الصِّيدْ. وِالتِّنِّينْ عْطَاهْ القُوَّة مْتَاعُو وِالعَرْشْ مْتَاعُو وْسُلْطَة كْبِيرَة.

³وِظْهُرْ وَاحِدْ مِالرُّوسْ مْتَاعُو كَإِنُّو مَجْرُوحْ جُرْحْ مْتَاعْ مُوتْ آمَا تِشْفَى مِنْ جُرْحُو، وِالأَرْضْ الكُلْهَا تْعَجّْبِتْ وِمْشَاوْ يْتَبّْعُوا فِي الوَحْشْ.

⁴وِالنَّاسْ سِجْدُوا لِلتِّنِّينْ عْلَى خَاطْرُو عْطَى السُّلْطَة مْتَاعُو لِلوَحْشْ، وْسِجْدُوا لِلوَحْشْ وْقَالُوا: «شْكُونُو الِّي كِيفْ الوَحْشْ؟ وِشْكُونُو الِّي يْنَجِّمْ يْحَارْبُو؟»

⁵وْتِعْطَى لِلوَحْشْ فُمْ يَنْطِقْ بِكْلاَمْ مْتَاعْ تَكَبُّرْ وْكُفْرْ، وْتِعْطَاتْلُو سُلْطَة بَاشْ يُحْكُمْ ثْنِينْ وْأَرْبْعِينْ شْهَرْ.

⁶حَلْ فُمُّو وِكْفَرْ بْرَبِّي، كْفَرْ بْإِسْمُو وْبِيتُو وْبِلِّي سَاكْنِينْ فِي السْمَاءْ.

⁷وْتِعْطَالُو إِنُّو يْحَارِبْ القِدِّيسِينْ وْيِغْلِبْهُمْ، وْتِعْطَاتْلُو السُّلْطَة عْلَى كُلْ عَرْشْ وْشَعْبْ وْلُغَة وْأُمَّة،

⁸وْيِسْجْدُولُو الِّي سَاكْنِينْ فِي الأَرْضْ الكُلْهُمْ، كُلْ وَاحِدْ إِسْمُو مَا تِكْتِبْشْ فِي كْتَابْ الحَيَاةْ مْتَاعْ الخَرُوفْ الِّي تِذْبَحْ قْبَلْ مَا تِتْخْلَقْ الدِّنْيَا.

⁹الِّي عَنْدُو وِذْنِينْ وِيْحِبْ يِسْمَعْ، خَلِّيهْ يِسْمَعْ!

¹⁰إِذَا كَانْ وَاحِدْ يْهِزْ رُوحُو للحَبْسْ، رَاهُو بَاشْ يُدْخُلْ الحَبْسْ، وِلِّي يُقْتُلْ بِالسِّيفْ، رَاهُو بَاشْ يْمُوتْ بالسّيفْ. هْنَا يُظْهُرْ الصَّبْرْ وِالإِيمَانْ مْتَاعْ القِدِّيسِينْ.

¹¹وِمْبَاعِدْ شُفْتْ وَحْشْ آخَرْ طَالِعْ مِالأَرْضْ، وْعِنْدُو زُوزْ قْرُونْ كِيفْ قْرُونْ الخَرُوفْ، آمَا يِتْكَلِّمْ كِيفْ التِّنِّينْ.

¹²وِاسْتَعْمِلْ السُّلْطَة الكُلْهَا مْتَاعْ الوَحْشْ الأُوِّلْ قُدَّامُو، وْخَلَّى الأَرْضْ وِلِّي سَاكْنِينْ فِيهَا يِسْجْدُوا لِلوَحْشْ الأُوِّلْ الِّي تِشْفَى مِالجُرْحْ الِّي يُقْتُلْ،

¹³وِعْمَلْ مُعْجْزَاتْ كْبِيرَة وْخَلَّى حَتَّى النَّارْ تِنْزِلْ مِالسْمَاءْ عْلَى الأَرْضْ قُدَّامْ عِينِينْ النَّاسْ،

¹⁴وْخْدَعْ الِّي سَاكْنِينْ فِي الأَرْضْ بِالمُعْجْزَاتْ الِّي تِعْطَاوْلُو بَاشْ يَعْمِلْهُمْ قُدَّامْ الوَحْشْ. وِأْمَرْهُمْ الِّي سَاكْنِينْ فِي الأَرْضْ بَاشْ يَعْمْلُوا تَصْوِيرَة لِلوَحْشْ الِّي جَرْحُو السِّيفْ آمَا رْجَعْ حَيْ

¹⁵وْتِعْطَالُو انُّو يَعْطِي رُوحْ لِلتَّصْوِيرَة مْتَاعْ الوَحْشْ حَتَّى لِينْ هِيَ بِيدْهَا وَلاَّتْ تِتتْكَلِّمْ، وِيْخَلِّي الِّي مَا سِجْدُوشْ لِلتَّصْوِيرَة مْتَاعْ الوَحْشْ يِتْقَتْلُوا،

¹⁶وِيْخَلِّي النَّاسْ الكُلْهُمْ، صْغَارْ وِكْبَارْ، غُنْيَا وْفُقَرَاءْ، عَبِيدْ وْأَحْرَارْ، بَاشْ يْحُطُّوا أَمَارَة عْلَى يِدّْهُمْ اليْمِينْ وِلاَّ عْلَى جْبِينْهُمْ،

¹⁷بَاشْ حَتَّى وَاحِدْ لاَ يْنَجِّمْ يْبِيعْ وِلاَّ يِشْرِي إِلاَّ إِذَا كَانْ عَنْدُو الأَمَارَة، الِّي هِيَ إِسْمْ الوَحْشْ وِلاَّ العْدَدْ مْتَاعْ إِسْمُو.

¹⁸وِالشَّيْء هَاذَا لاَزْمُو حِكْمَة: وِلِّي هُوَ ذْكِي تَوْ يْطَلِّعْ العْدَدْ مْتَاعْ إِسْمْ الوَحْشْ. عْلَى خَاطْرُو عْدَدْ مْتَاعْ إِنْسَانْ. رَاهُو سِتَّة مْيَة وْسِتَّة وْسِتِّينْ.