Read Tunisian Arabic New Testament الرُّؤْيَا 14 Bible Online

الرُّؤْيَا 14 - Tunisian Arabic New Testament bible

الرُّؤْيَا 14

¹وِمْبَاعِدْ خْزَرْتْ وْشُفْتْ خَرُوفْ وَاقِفْ فُوقْ جْبَلْ صِهْيُونْ وِمْعَاهْ مْيَة وْأَرْبْعَة وْأَرْبْعِينْ أَلْفْ إِسْمُو وْإِسْمْ بُوهْ مَكْتُوبْ عْلَى جْبِينْهُمْ،

²وِسْمَعْتْ مِالسْمَاءْ صُوتْ كِيفْ الصُّوتْ القْوِي مْتَاعْ المَاء وْكِيفْ صُوتْ الرَّعْدْ القْوِي، وِالصُّوتْ الِّي سْمَعْتُو كَإِنُّو صُوتْ مْتَاعْ نَاسْ يِعْزْفُوا فِي القِيتَارَة

³وْهُومَا يْغَنِّيوْ فِي غْنَايَة جْدِيدَة قُدَّامْ العَرْشْ وْقُدَّامْ المَخْلُوقَاتْ الحَيَّة الأَرْبْعَة وْقُدَّامْ الشْيُوخْ، وْحَتَّى حَدْ مَا يْنَجِّمْ يِتْعَلِّمْ الغْنَايَة هَاذِيكَا كَانْ المْيَا وِالأَرْبْعَة وْأَرْبْعِينْ أَلْفْ الِّي تِفْدَاوْ مِالأَرْضْ.

⁴هَاذُومَا هُومَا الِّي مَا تْنَجّْسُوشْ بِالنْسَاء وْطَاهْرِينْ، هَاذُومَا هُومَا الِّي يْتَبّْعُوا الخَرُوفْ وِينْ يِمْشِي، هَاذُومَا تِفْدَاوْ مِنْ بِينْ البَشَرْ كِيفْ أُوِّلْ الصَّابَة الِّي يِتْعْطَى للهْ وْلِلخَرُوفْ.

⁵وْفُمّْهُمْ مَا نْطَقْشْ بِالكِذْبْ، وْرَاهُمْ مَا عْلِيهُمْشْ لُومْ.

⁶وْشُفْتْ مَلاَكْ آخَرْ طَايِرْ فِي قَلْبْ السْمَاءْ، عَنْدُو بْشَارَة دَايْمَة لِلأَبَدْ يْبَشِّرْ بِيهَا فِلِّي سَاكْنِينْ فِي الأَرْضْ مِنْ كُلْ أُمَّة وْعَرْشْ وْلُغَة وْشَعْبْ.

⁷وْقَالْ بْصُوتْ عَالِي: «خَافُوا اللهْ وْمَجّْدُوهْ! رَاهِي جَاتْ السَّاعَة الِّي بَاشْ يْحَاسِبْ فِيهَا النَّاسْ، وْأُسْجْدُوا لِلِّي خْلَقْ السْمَاءْ وِالأَرْضْ وِالبْحَرْ وِالعْيُونْ مْتَاعْ المَاء!»

⁸وْتَبّْعُو مَلاَكْ ثَانِي وْقَالْ: «طَاحِتْ، طَاحِتْ بَابِلْ العْظِيمَة الِّي شَرّْبِتْ الشْعُوبْ الكُلْهُمْ مِنْ شْرَابْ الزْنَى مْتَاعْهَا!»

⁹وْتَبَّعْهُمْ مَلاَكْ ثَالِثْ يْقُولْ بْصُوتْ عَالِي: «الِّي يُسْجُدْ لِلوَحْشْ وِالتَّصْوِيرَة مْتَاعُو وْيِتْقَمِّرْ مِنْ جِبْهْتُو وْمِنْ يِدُّو،

¹⁰هُوَ زَادَا بَاشْ يُشْرُبْ مِالشْرَابْ مْتَاعْ غَضَبْ اللهْ الِّي تْصَبْ صَافِي فِي كَاسْ الغَضَبْ المَلْيَانْ، وْبِشْ يِتْعَذِّبْ بِالنَّارْ وِالكِبْرِيتْ قُدَّامْ المْلاَيْكَة المُقَدّْسِينْ وْقُدَّامْ الخَرُوفْ،

¹¹وِالدُّخَّانْ مْتَاعْ عْذَابْهُمْ يَطْلِعْ لِلأَبَدْ. لاَ يِرْتَاحُوا لاَ لِيلْ وْلاَ نْهَارْ هَاكَا الِّي يِعْبْدُوا فِي الوَحْشْ وْفِي التَّصْوِيرَة مْتَاعُو وْكُلْ وَاحِدْ يِتْقَمِّرْ بْإِسْمْ الوَحْشْ.

¹²هْنَا يُظْهُرْ الصَّبْرْ مْتَاعْ القِدِّيسِينْ الِّي يْحَافْظُوا عْلَى الوْصَايَا مْتَاعْ اللهْ وِالإِيمَانْ بْيَسُوعْ.»

¹³وِمْبَاعِدْ سْمَعْتْ صُوتْ مِالسْمَاءْ يْقُولْ: «إِكْتِبْ الشَّيْء هَاذَا: صَحَّة لِيهُمْ الِّي يْمُوتُوا فِي الرَّبْ!» يْجَاوِبْ الرُّوحْ: «إِي نْعَمْ، بَاشْ يِرْتَاحُوا مِنْ تْعَبْهُمْ وْأَعْمَالْهُمْ اتَّبِّعْهُمْ.»

¹⁴وِمْبَاعِدْ خْزَرْتْ يَاخِي شُفْتْ سْحَابَة بِيضَة وْوَاحِدْ كِيفْ إِبْنْ الإِنْسَانْ قَاعِدْ عْلَى السْحَابَة وْفُوقْ رَاسُو تَاجْ ذْهَبْ وْفِي يِدُّو مِنْجِلْ مَاضِي.

¹⁵وِخْرَجْ مَلاَكْ آخَرْ مِالهَيْكِلْ يْنَادِي بْصُوتْ عَالِي فِلِّي كَانْ قَاعِدْ فُوقْ السْحَابَة: «هِزْ المِنْجِلْ مْتَاعِكْ وْأَحْصِدْ رَاهُو وَقْتْ الحْصَادْ جَا! رَاهِي الصَّابَة مْتَاعْ الأَرْضْ حَاضْرَة!»

¹⁶وِرْمَى الِّي قَاعِدْ فُوقْ السْحَابَة المِنْجِلْ مْتَاعُو عْلَى الأَرْضْ، وِالأَرْضْ تْحَصْدِتْ.

¹⁷وِخْرَجْ مَلاَكْ آخَرْ مِالهَيْكِلْ الِّي فِي السْمَاءْ وْهُوَ زَادَا عَنْدُو مِنْجِلْ مَاضِي.

¹⁸وِمْبَاعِدْ جَا مَلاَكْ آخَرْ مِالمَذْبَحْ عَنْدُو سُلْطَة عْلَى النَّارْ، وْنَادَى الِّي عَنْدُو المِنْجِلْ المَاضِي بْصُوتْ عَالِي وْقَالْ: «هِزْ المِنْجِلْ مْتَاعِكْ وْلِمْ عْنَاقِيدْ العْنِبْ مْتَاعْ الأَرْضْ رَاهُو عْنِبْهَا طَابْ.»

¹⁹يَاخِي رْمَى المَلاَكْ المِنْجِلْ مْتَاعُو عْلَى الأَرْضْ وْلَمْ العْنِبْ مْتَاعْ الأَرْضْ وِرْمَاهْ فِي المَعْصْرَة الكْبِيرَة مْتَاعْ غَضَبْ اللهْ.

²⁰وِالمَعْصْرَة تْعَفّْسِتْ لْبَرَّا مِالمْدِينَة وِجْرَى مِنْهَا الدَّمْ فِي عِلْوْ اللْجَامْ مْتَاعْ الحْصُنَّة عْلَى طُولْ مِيتِينْ وْسِتَّة وْتِسْعِينْ كِيلُومِتْرْ.