Read Tunisian Arabic New Testament الرُّؤْيَا 15 Bible Online

الرُّؤْيَا 15 - Tunisian Arabic New Testament bible

الرُّؤْيَا 15

¹وِمْبَاعِدْ شُفْتْ فِي السْمَاءْ أَمَارَة كْبِيرَة وِعْجِيبَة: سَبْعَة مْلاَيْكَة جَايْبِينْ مْعَاهُمْ سَبْعَة مْصَايِبْ، وْهُومَا الإِخْرَانِينْ عْلَى خَاطِرْ بِيهُمْ هُومَا بَاشْ يْتِمْ الغَضَبْ مْتَاعْ اللهْ.

²وْشُفْتْ حَاجَة تِشْبِهْ لِبْحَرْ مِالبُلاَّرْ مْخَلِّطْ بِالنَّارْ. وِالنَّاسْ الِّي غَلْبُوا الوَحْشْ وِالتَّصْوِيرَة مْتَاعُو وِالعْدَدْ مْتَاعْ إِسْمُو وَاقْفِينْ بِجْنَبْ البْحَرْ البُلاَّرْ وْقِيتَارَاتْ مِنْ عِنْدْ اللهْ فِي يْدِيهُمْ

³وِيْغَنِّيوْ فِي النَّشِيدْ مْتَاعْ مُوسَى عَبْدْ اللهْ وْنَشِيدْ الخَرُوفْ وِيْقُولُوا: أَعْمَالِكْ عْظِيمَة وِعْجِيبَة، يَا الرَّبْ إِلاَهْنَا القَادِرْ عْلَى كُلْ شَيْء! الثْنَايَا مْتَاعِكْ مُسْتَقِيمَة وِصْحِيحَة، يَا المَلِكْ مْتَاعْ الأُمَمْ

⁴يَا رَبْ، شْكُونْ مَا يْخَافِشْ مِنِّكْ؟ شْكُونْ مَا يْمَجِّدْشْ إِسْمِكْ؟ قُدُّوسْ إِنْتِ وَحْدِكْ الأُمَمْ الكُلْهُمْ بَاشْ يْجِيوْ وْيُسْجْدُوا قُدَّامِكْ بَعْدْ مَا ظُهْرِتْ أَحْكَامِكْ.

⁵وِمْبَاعِدْ شُفْتْ الهَيْكِلْ مْتَاعْ خِيمِةْ الشّْهَادَة فِي السْمَاءْ مَحْلُولْ،

⁶وِالسَّبْعَة مْلاَيْكَة الِّي جَايْبِينْ مْعَاهُمْ السَّبْعَة مْصَايِبْ خَرْجُوا مِالهَيْكِلْ، لاَبْسِينْ قْمَاشْ قْطُنْ نْظِيفْ وْيِلْمَعْ وِحْزَامَاتْ ذْهَبْ عْلَى سْدُورَاتْهُمْ.

⁷وْوَاحِدْ مِالمَخْلُوقَاتْ الحَيَّة الأَرْبْعَة عْطَى السَّبْعَة مْلاَيْكَاتْ سَبْعَة كِيسَانْ ذْهَبْ مِلْيَانِينْ بِالغَضَبْ مْتَاعْ اللهْ الحَيْ لِلأَبَدْ.

⁸وِالهَيْكِلْ تِمْلَى بِالدُّخَّانْ مِالمَجْدْ مْتَاعْ اللهْ وْقُدْرْتُو، وْحَتَّى حَدْ مَا يْنَجِّمْ يُدْخُلْ لِلهَيْكِلْ حَتَّى لِينْ يُوفُوا السَّبْعَة مْصَايِبْ مْتَاعْ السَّبْعَة مْلاَيْكَة.