Read Tunisian Arabic New Testament الرُّؤْيَا 16 Bible Online

الرُّؤْيَا 16 - Tunisian Arabic New Testament bible

الرُّؤْيَا 16

¹وِمْبَاعِدْ سْمَعْتْ صُوتْ عَالِي جَايْ مِالهَيْكِلْ يْقُولْ لِلمْلاَيْكَة السَّبْعَة: «إِمْشِيوْ وْصُبُّوا السَّبْعَة كِيسَانْ مْتَاعْ غَضَبْ اللهْ عْلَى الأَرْضْ.»

²مْشَى المَلاَكْ الأُوِّلْ وْصَبْ الكَاسْ مْتَاعُو عْلَى الأَرْضْ، وْدِمَّالْ خَايِبْ وْيُوجَعْ بَرْشَة وَلَّى فِي النَّاسْ الِّي فِيهُمْ الأَمَارَة مْتَاعْ الوَحْشْ وِلِّي سِجْدُوا لِلتَّصْوِيرَة مْتَاعُو.

³وْصَبْ المَلاَكْ الثَّانِي الكَاسْ مْتَاعُو فِي البْحَرْ حَتَّى وَلَّى كِيفْ الدَّمْ مْتَاعْ المِيتْ، وْمَاتِتْ المَخْلُوقَاتْ الحَيَّة الِّي فِي البْحَرْ الكُلْهَا.

⁴وِالمَلاَكْ الثَّالِثْ صَبْ الكَاسْ مْتَاعُو فِي الوِدْيَانْ وِالعْيُونْ مْتَاعْ المَاء حَتَّاكِشْ وَلاَّوْ دَمْ.

⁵وِسْمَعْتْ المَلاَكْ مْتَاعْ المَاء يْقُولْ: إِنْتِ عَادِلْ كِتُحْكُمْ إِنْتِ القُدُّوسْ، المُوجُودْ تَوَّا وِلِّي كُنْتْ مُوجُودْ.

⁶دَمْ المُؤْمْنِينْ وِالأَنْبِيَاءْ سَيّْحُوهْ وْإِنْتِ عْطِيتْهُمْ دَمْ بَاشْ يُشْرْبُوهْ، وْهُومَا نَالُوا الشَّيْء الِّي يِسْتْحَقُّوهْ!

⁷وِسْمَعْتْ صُوتْ مِنْ المَذْبِحْ يْقُولْ: إِي نْعَمْ، يَا الرَّبْ الإِلاَهْ القَادِرْ عْلَى كُلْ شَيْء! الأَحْكَامْ مْتَاعِكْ عَدْلْ وْحَقْ.

⁸وْصَبْ المَلاَكْ الرَّابِعْ الكَاسْ مْتَاعُو عْلَى الشَّمْسْ وْتِعْطَاتِلْهَا السُّلْطَة بَاشْ تَحْرِقْ النَّاسْ بِالنَّارْ،

⁹وِتْحَرْقُوا النَّاسْ بِالسْخَانَة القْوِيَّة وْكُفْرُوا بْإِسْمْ اللهْ الِّي عَنْدُو سُلْطَة عْلَى المْصَايِبْ هَاذِي، وْمَا تَابُوشْ بَاشْ يْمَجّْدُوا اللهْ.

¹⁰وْصَبْ المَلاَكْ الخَامِسْ الكَاسْ مْتَاعُو عْلَى العَرْشْ مْتَاعْ الوَحْشْ، وِالمَمْلْكَة مْتَاعُو ظْلاَمِتْ وِالنَّاسْ عَظُّوا عْلَى لْسَانَاتْهُمْ مِالوْجِيعَة،

¹¹وْكُفْرُوا بْإِلاَهْ السْمَاءْ مِالوْجِيعَة وِالدِّمَّالْ مْتَاعْهُمْ، وْمَا تَابُوشْ عْلَى عْمَايِلْهُمْ.

¹²المَلاَكْ السَّادِسْ صَبْ الكَاسْ مْتَاعُو عْلَى وَادْ الفُرَاتْ الكْبِيرْ، وِالمَاء مْتَاعُو نْشِحْ بَاشْ يِتْحَلْ طْرِيقْ لِلمُلُوكْ مْنِينْ تُشْرُقْ الشَّمْسْ.

¹³وْشُفْتْ ثْلاَثَة أَرْوَاحْ مَنْزُوسَة خَارْجِينْ مِنْ فُمْ التِّنِّينْ وْمِنْ فُمْ الوَحْشْ وْمِنْ فُمْ النَّبِي الكَذَّابْ يِشْبْهُوا لِلجْرَانْ،

¹⁴وْهُومَا رْوَاحْ مْتَاعْ شْوَاطِنْ يَعْمْلُوا فِي المُعْجْزَاتْ وْيِمْشِيوْ لِلمُلُوكْ مْتَاعْ الدِّنْيَا الكُلْهَا بَاشْ يْلِمُّوهُمْ لِلحَرْبْ الِّي بَاشْ تَاقَعْ فِي اليُومْ العْظِيمْ مْتَاعْ اللهْ القَادِرْ عْلَى كُلْ شَيْء.

¹⁵هَانِي جَايْ كِيفْ السَّارِقْ! صَحَّة لِيهْ الِّي يَسْهِرْ وِيْعِسْ عْلَى دَبْشُو بَاشْ مَا يِمْشِيشْ عِرْيَانْ وِالنَّاسْ يْشُوفُولُو عْيُوبُو.

¹⁶وِالأَرْوَاحْ الثْلاَثَة لَمُّوا المُلُوكْ فِي بْلاَصَة تِتْسَمَّى بِالعِبْرِيَّة هَرْمَجَدُّونْ.

¹⁷وْصَبْ المَلاَكْ السَّابِعْ الكَاسْ مْتَاعُو فِي الهْوَاء وْجَا صُوتْ عَالِي مِالعَرْشْ فِي الهَيْكِلْ يْقُولْ: «الشَّيْء تَمْ!»

¹⁸وْوُقْعُتْ بْرُوقْ وْأَصْوَاتْ وِرْعُودْ، وْزِلْزَالْ مَا وْقَعْشْ كِيفُو مِلِّي تُوجِدْ الإِنْسَانْ فِي الأَرْضْ وْهُوَ زِلْزَالْ قْوِي وِكْبِيرْ.

¹⁹وِتْقِسْمِتْ المْدِينَة العْظِيمَة لِثْلاَثَة طْرُوفْ وْطَاحِتْ المُدُنْ مْتَاعْ الشْعُوبْ. وِتْذَكِّرْ اللهْ بَابِلْ العْظِيمَة بَاشْ يْخَلِّيهَا تُشْرُبْ كَاسْ الغَضَبْ مْتَاعُو.

²⁰وِالجُزُرْ الكُلْهَا هَرْبِتْ وِالجْبَالْ تْخَبَّاتْ،

²¹وِهْبَطْ عْلَى العْبَادْ تَبْرُورِي كْبِيرْ مِالسْمَاءْ يُوزِنْ قْرَابِةْ أَرْبْعِينْ كِيلُو، حَتَّى لِينْ النَّاسْ كُفْرُوا بْرَبِّي بِسْبَبْ مْصِيبِةْ التَّبْرُورِي. عْلَى خَاطِرْ مْصِيبِةْ التَّبْرُورِي كَانِتْ كْبِيرَة بَرْشَة.