Read Tunisian Arabic New Testament الرُّؤْيَا 17 Bible Online

الرُّؤْيَا 17 - Tunisian Arabic New Testament bible

الرُّؤْيَا 17

¹وِمْبَاعِدْ جَانِي وَاحِدْ مِالسَّبْعَة مْلاَيْكَة الِّي عِنْدْهُمْ السَّبْعَة كِيسَانْ وْقَلِّي: «إِيجَا خَلِّينِي نْوَرِّيكْ العِقَابْ مْتَاعْ الزَّانْيَة الكْبِيرَة القَاعْدَة عْلَى بَرْشَة مَاء.

²الِّي زْنَاوْا مْعَاهَا المُلُوكْ مْتَاعْ الدِّنْيَا، وْسِكْرُوا النَّاسْ الِّي فِي الدِّنْيَا بِشْرَابْ الزْنَى مْتَاعْهَا.»

³وْهَزّْنِي فِي الرُّوحْ بْعِيدْ فِي الصَّحْرَاء، وْشُفْتْ مْرَا قَاعْدَة عْلَى وَحْشْ أَحْمَرْ مِلْيَانْ بِالأَسَامِي مْتَاعْ الكُفْرْ وْعِنْدُو سَبْعَة رُوسْ وْعَشْرَة قْرُونْ.

⁴وِالمْرَا كَانِتْ لاَبْسَة الأُرْجُوَانْ الأَحْمَرْ وِالقْمَاشْ الأَحْمَرْ وِمْغَطّْيَة بِالذْهَبْ وِالصِّيغَة وِالدْيَامُنْتْ، هَازَّة فِي يِدّْهَا كَاسْ ذْهَبْ مَلْيَانْ بِالفْسَادْ وِالنْجَاسَة مْتَاعْ زْنَاهَا،

⁵وْإِسْمْهَا مَكْتُوبْ عْلَى جْبِينْهَا: «بَابِلْ العْظِيمَة، أُمْ النْسَاء الِّي يَزْنَاوْا وِالنْجَاسَة الِّي فِي الأَرْضْ.»

⁶وْشُفْتْ المْرَا سُكْرَانَة بِالدَّمْ مْتَاعْ القِدِّيسِينْ وْدَمْ الشُّهَدَاءْ مْتَاعْ يَسُوعْ. كِشُفْتْهَا تْعَجِّبْتْ بَرْشَة.

⁷يَاخِي قَلِّي المَلاَكْ: «عْلاَشْ مِتْعَجِّبْ؟ تَوْ نْقُلِّكْ عْلَى السِّرْ الغَامِضْ مْتَاعْ المْرَا وِمْتَاعْ الوَحْشْ الِّي هَازْهَا وِلِّي عَنْدُو سَبْعَة رُوسْ وْعَشْرَة قْرُونْ.

⁸وِالوَحْشْ الِّي شُفْتُو رَاهُو كَانْ قْبَلْ آمَا تَوَّا مَا عَادِشْ مُوجُودْ. بَعْدْ شْوَيَّة بَاشْ يَطْلِعْ مِالهَاوْيَة وْيِمْشِي لِلهْلاَكْ. وِالنَّاسْ الِّي سَاكْنِينْ فِي الأَرْضْ، الِّي هُومَا أَسَامِيهُمْ مَا هِيشْ مَكْتُوبَة فِي كْتَابْ الحَيَاةْ مِلِّي تْخَلْقِتْ الدِّنْيَا بَاشْ يتْعَجّْبُوا كِيْشُوفُوا الوَحْشْ، عْلَى خَاطْرُو كَانْ قْبَلْ وْتَوَّا مَا عَادِشْ مُوجُودْ وْبِشْ يَرْجَعْ.

⁹وِهْنَا لاَزِمْ العْقَلْ مْتَاعْ البَشَرْ تْكُونْ عَنْدُو حِكْمَة: السَّبْعَة رُوسْ هُومَا السَّبْعَة جْبَالْ الِّي قَاعْدَة عْلِيهُمْ المْرَا. وْهُومَا زَادَا سَبْعَة مُلُوكْ،

¹⁰خَمْسَة مِنْهُمْ طَاحُوا، وْوَاحِدْ مَازَالْ مُوجُودْ، وِالآخَرْ مَازَالْ مَا جَاشْ. وْكِيْجِي يِلْزْمُو يَبْقَى شْوَيَّة وَقْتْ آكَاهُو.

¹¹آمَا الوَحْشْ الِّي كَانْ قْبَلْ وْمَا عَادِشْ مُوجُودْ، رَاهُو مَلِكْ ثَامِنْ آمَا تَابِعْ لِلسَّبْعَة مُلُوكْ، وْمَاشِي لِلهْلاَكْ.

¹²وِالعَشْرَة قْرُونْ الِّي شُفْتْهُمْ هُومَا عَشْرَة مُلُوكْ مَازَالُوا مَا بْدَاوْاشْ يِمْلْكُوا، آمَا بَاشْ تْوَلِّي عِنْدْهُمْ سُلْطَة مْعَ الوَحْشْ سَاعَة وَحْدَة.

¹³هَاذُومَا تْفَاهْمُوا بَاشْ يَعْطِيوْ القُوَّة وِالسُّلْطَة مْتَاعْهُمْ لِلوَحْشْ.

¹⁴بَاشْ يْحَارْبُوا الخَرُوفْ، وِالخَرُوفْ بَاشْ يِغْلِبْهُمْ هُوَ وِلِّي مْعَاهْ الِّي دْعَاهُمْ وِلِّي خْتَارْهُمْ وِلِّي هُومَا أُمَنَاءْ عْلَى خَاطْرُو هُوَ رَبْ الأَرْبَابْ وْمَلِكْ المُلُوكْ.»

¹⁵وْقَلِّي المَلاَكْ: «المَاء الِّي شُفْتُو وِينْ قَاعْدَة المْرَا الزَّانْيَة هِيَ شْعُوبْ وِجْمُوعْ وْأُمَمْ وْلُغَاتْ.

¹⁶وِالعَشْرَة قْرُونْ الِّي شُفْتْهُمْ وِالوَحْشْ بَاشْ يَكْرْهُوا المْرَا الزَّانْيَة، بَاشْ يْحُطُّوهَا وَحَّدْهَا وِيْعَرُّوهَا وْيَاكْلُولْهَا لْحَمْهَا وْيَحْرْقُوهَا بِالنَّارْ.

¹⁷وِالله حَطْ فِي قْلُوبْهُمْ بَاشْ يَعْمْلُوا الشَّيْء الِّي يْحِبْ عْلِيهْ وْبَاشْ يْكُونُوا رَايْ وَاحِدْ وْيَعْطِيوْ المُلْكْ مْتَاعْهُمْ الِّي يُحْكْمُوا بِيهَا لِلوَحْشْ حَتَّى لِينْ يْتِمْ كْلاَمْ اللهْ.

¹⁸وِالمْرَا هَاذِيكَا الِّي شُفْتْهَا هِيَ المْدِينَة العْظِيمَة الِّي تُحْكُمْ فِي المُلُوكْ مْتَاعْ الأَرْضْ.»