Read Tunisian Arabic New Testament الرُّؤْيَا 18 Bible Online

الرُّؤْيَا 18 - Tunisian Arabic New Testament bible

الرُّؤْيَا 18

¹بَعْدْ هَاذَا شُفْتْ مَلاَكْ آخَرْ هَابِطْ مِالسْمَاءْ، عَنْدُو بَرْشَة سُلْطَة، وِالأَرْضْ ضْوَاتْ مِالمَجْدْ مْتَاعُو.

²وْصَاحْ بْصُوتْ عَالِي وْهُوَ يْقُولْ: طَاحِتْ! طَاحِتْ! بَابِلْ العْظِيمَة! وِالشْوَاطِنْ سِكْنِتْهَا وَلاَّتْ حَبْسْ مْتَاعْ الأَرْوَاحْ المَنْزُوسَة وِالطْيُورْ المَنْزُوسَة وِالمَكْرُوهَة!

³رَاهُمْ الشْعُوبْ الكُلْهُمْ سِكْرُوا بِشْرَابْ زْنَاهَا، وِالمُلُوكْ مْتَاعْ الأَرْضْ زْنَاوْا مْعَاهَا، وِالتُّجَّارْ مْتَاعْ الدِّنْيَا تِغْنَاوْ مِنْ شِيخَاتْهَا!

⁴وِسْمَعْتْ صُوتْ آخَرْ مِالسْمَاءْ يْقُولْ: يَا شَعْبِي أُخْرْجُوا مِنْهَا! بَاشْ مَا تْشَارْكُوشْ فِي ذْنُوبْهَا وْمَا تَهْبِطْشْ عْلِيكُمْ مْصَايِبْهَا.

⁵رَاهِي ذْنُوبْهَا تْكَدّْسِتْ لِينْ وُصْلِتْ لِلسْمَاء وِالله تْذَكِّرْ الشْرُورْ مْتَاعْهَا.

⁶خَلّْصُوهَا مَرّْتِينْ قَدْ مَا خَلّْصِتْ أَعْمْلُوا مْعَاهَا مَرّْتِينْ قَدْ مَا عَمْلِتْ وْعَبِّيوْلْهَا مَرّْتِينْ الكَاسْ الِّي عَبَّاتْ

⁷عَذّْبُوهَا وْخَلُّوهَا تْنَوِّحْ عْلَى قَدْرْ مَا تْمَجّْدِتْ وِتْنَعّْمِتْ. مَا دَامْهَا فِي قَلْبْهَا قَالِتْ نُقْعُدْ كِيفْ مَلِكَة! آنَا مَا نِيشْ مْرَا مَاتْ رَاجِلْهَا وْعُمْرِي مَانِي بَاشْ انَّوَّحْ.

⁸هَاذَاكَا عْلاَشْ فِي نْهَارْ وَاحِدْ بَاشْ تَهْبِطْ عْلِيهَا المْصَايِبْ. مُوتْ وْحُزْنْ وْجُوعْ وْبِشْ تِتْحْرَقْ بِالنَّارْ، عْلَى خَاطِرْ الِّي يُحْكُمْ عْلِيهَا هُوَ الإِلاَهْ الجَبَّارْ.

⁹وِالمُلُوكْ مْتَاعْ الأَرْضْ الِّي زْنَاوْا مْعَاهَا وِتْمَتّْعُوا بِالشِّيخَاتْ مْعَاهَا يِبْكِيوْ عْلِيهَا وِيْنَوّْحُوا عْلِيهَا كِيْشُوفُوا دُخَّانْ الحْرِيقَة مْتَاعْهَا،

¹⁰بَاشْ يَاقْفُوا بْعِيدْ خَايْفِينْ مِالعْذَابْ مْتَاعْهَا وِيْقُولُوا: يَا وِيلِكْ! يَا بَابِلْ المْدِينَة القْوِيَّة، يَا وِيلِكْ! فِي سَاعَة وَحْدَة تِحْكَمْ عْلِيكْ!

¹¹وِالتُّجَّارْ مْتَاعْ الدِّنْيَا بَاشْ يِبْكِيوْ عْلِيهَا وِيْنَوّْحُوا عْلِيهَا، عْلَى خَاطِرْ حَتَّى وَاحِدْ مَا عَادْ يِشْرِي سِلْعِتْهُمْ.

¹²سِلْعَة مْتَاعْ ذْهَبْ وْفِضَّة وْصِيغَة وِجُوهِرْ وِقْمَاشْ غَالِي وِقْمَاشْ أَحْمَرْ وِالحْرِيرْ وِالقْمَاشْ الأَحْمَرْ وْأَنْوَاعْ الشَّجَرْ الِّي رِيحْتُو طَيّْبَة وِالحَاجَاتْ الِّي مَصْنُوعَة مِالعَاجْ الكُلْهَا، وِالحَاجَاتْ المَصْنُوعَة مِاللُّوحْ الغَالِي، وِنْحَاسْ وِحْدِيدْ وِرْخَامْ

¹³وْقِرْفَة وُفَّاحْ وْعِطْرْ وْمُرْ وْلُوبَانْ وِشْرَابْ وْزِيتْ وِدْقِيقْ وْقَمْحْ وِبْقَرْ وِغْنَمْ وِحْصُنَّة وِكْوَالِيسْ وْعَبِيدْ وْنَاسْ.

¹⁴رَاحِتْ عْلِيكْ الغَلَّة الِّي تِشْتْهَاهَا الضْخَامَاتْ والوَهْرَة مَا عَادِشْ بَاشْ تَلْقَاهَا!

¹⁵التُّجَّارْ هَاذُومَا الِّي تِغْنَاوْ مِالمْدِينَة هَاذِيكَا بَاشْ يَاقْفُوا بْعِيدْ عْلِيهَا، خَايْفِينْ مِالعْذَابْ مْتَاعْهَا، يِبْكِيوْ وِيْنَوّْحُوا بْصُوتْ عَالِي

¹⁶وِيْقُولُوا: يَا وِيلِكْ! يَا المْدِينَة العْظِيمَة، يَا وِيلِكْ! القْمَاشْ الغَالِي كَانِتْ تِلْبِسْ، قْمَاشْ الأُرْجُوَانْ وِالقْمَاشْ الأَحْمَرْ، وِتْزَيِّنْ فِي رُوحْهَا بِالذْهَبْ وِالصِّيغَة وِالجُوهِرْ!

¹⁷وِالثَّرْوَة هَاذِي الكُلْهَا فِي سَاعَة مِالزْمَانْ ضَاعِتْ. وِالرُّيَّاسْ مْتَاعْ الفْلاَيِكْ وِالخَدَّامَا وِالتُّجَّارْ وِلِّي مْسَافْرِينْ فِي البْحَرْ الكُلْهُمْ بْقَاوْ بْعِيدْ

¹⁸وْصَاحُوا وْهُومَا يْشُوفُوا فِي دُخَّانْ الحْرِيقَة مْتَاعْهَا وْهُومَا يْقُولُوا: «شْنُوَّة الِّي كِيفْ المْدِينَة العْظِيمَة!»

¹⁹وِرْمَاوْ التْرَابْ عْلَى رُوسْهُمْ وِبْدَاوْا يِبْكِيوْ وِيْنَوّْحُوا وْيِحْزْنُوا وْهُومَا يْصِيحُوا: يَا وِيلِكْ! يَا وِيلِكْ! يَا المْدِينَة العْظِيمَة! امَّالِي السُّفُنْ الكُلْهُمْ تِغْنُوا مِالثَّرْوَة مْتَاعْهَا! فِي سَاعَة، ضَاعْ كُلْ مَا فِيهَا.

²⁰يَا سْمَاء أَفْرْحِي بِخْرَابْهَا! وْيَا قِدِّيسِينْ وْيَا رُسُلْ وْيَا أَنْبِيَاءْ، أَفْرْحُوا بِخْرَابْهَا! رَاهُو اللهْ حْكُمْ عْلِيهَا بِالحُكْمْ الِّي تْحِبُّوا تُحْكْمُوهْ عْلِيهَا.

²¹وْهَزْ مَلاَكْ قْوِي حَجْرَة كِيفْ حَجْرَة مْتَاعْ طَاحُونَة كْبِيرَة وِرْمَاهَا فِي البْحَرْ وْقَالْ: «كِيفْ مَا هَكَّا بَابِلْ المْدِينَة العْظِيمَة بَاشْ تِتْرْمَى بْقُوَّة، وْمَا عَادِشْ تِتْوْجِدْ بِالكُلْ.

²²وْأَصْوَاتْ الِّي يْغَنِّيوْ بِالقِيتَارَة وِالنَّايْ وِالبُوقْ مَا عَادِشْ يِتْسِمْعُوا فِيكْ بِالكُلْ. وْمَا عَادِشْ يِتْلْقَى فِيكْ صْنَايْعِي بِالكُلْ، وْمَا عَادِشْ يِتْسْمَعْ فِيكْ صُوتْ الرْحَى،

²³ضَوْ الفْنَارْ مَا عَادِشْ يِضْوِي فِيكْ بِالكُلْ وْصُوتْ العْرِيسْ وِالعْرُوسَة مَا عَادِشْ يِتْسْمَعْ فِيكْ بِالكُلْ، أَعْظِمْ نَاسْ فِي الأَرْضْ كَانُوا التُّجَّارْ مْتَاعِكْ وِالشْعُوبْ الكُلْهُمْ تْخِدْعُوا بِالسِّحْرْ مْتَاعِكْ.

²⁴وْتِلْقَى فِي مْدِينِةْ بَابِلْ الدَّمْ مْتَاعْ الأَنْبِيَاءْ وِالقِدِّيسِينْ وِلِّي تْذِبْحُوا فِي الأَرْضْ الكُلْهُمْ.»