Read Tunisian Arabic New Testament الرُّؤْيَا 2 Bible Online

الرُّؤْيَا 2 - Tunisian Arabic New Testament bible

الرُّؤْيَا 2

¹«إِكْتِبْ لْمَلاَكْ الكَنِيسَة مْتَاعْ أَفَسُسْ: "هَاذَا آشْ يْقُولْ الِّي شَادْ فِي يِدُّو اليْمِينْ السَّبْعَة نْجُومْ وْيِمْشِي مَا بِينَاتْ السَّبْعَة فْنَارَاتْ ذْهَبْ:

²آنَا نَعْرِفْ أَعْمَالِكْ وْتَعْبِكْ وْصَبْرِكْ، وْنَعْرِفْ الِّي إِنْتِ مَا تِتْحَمِّلْشْ النَّاسْ الِّي يَعْمْلُوا فِي الشَّرْ، وْجَرِّبْتْ الِّي يْسَمِّيوْا فِي رْوَاحْهُمْ رُسُلْ وْهُومَا مَا هُمْشْ رُسُلْ، وْفِقْتْ بِيهُمْ الِّي هُومَا يِكْذْبُوا.

³إِنْتِ صْبَرْتْ بَرْشَة، جَاهِدْتْ عْلَى خَاطِرْ إِسْمِي وْمَا سَلِّمْتِشْ

⁴آمَا نْلُومِكْ الِّي مَا عَادِشْ تْحِبْ كِيفْ مَا كُنْتْ تْحِبْ فِي الأُوِّلْ.

⁵اذَّكِّرْ وِينْ طُحْتْ وْتُوبْ وْأَرْجِعْ لْأَعْمَالِكْ الِّي كُنْتْ تَعْمِلْ فِيهُمْ فِي الأُوِّلْ، مَا كَانِشْ رَانِي نْجِيكْ وِنْقَلِّعْ المْنَارَة مْتَاعِكْ مِنْ بْلاَصِتْهَا، إذَا كَانْ مَا تْتُوبِشْ.

⁶آمَا الحَاجَة البَاهْيَة الِّي عْمَلْتْهَا هِيَ انِّكْ تَكْرَهْ العْمَايِلْ مْتَاعْ النِّقُولاَوِيِّينْ كِيفْ مَا آنَا نَكْرِهْهَا.

⁷الِّي عَنْدُو وِذْنِينْ خَلِّيهْ يِسْمَعْ، آشْ يْقُولْ الرُّوحْ لِلكَنَايِسْ: الِّي يِغْلِبْ بَاشْ نْخَلِّيهْ يَاكُلْ مِنْ شَجْرِةْ الحَيَاةْ الِّي فِي جَنِّةْ اللهْ."»

⁸«وْإِكْتِبْ لِلمَلاَكْ مْتَاعْ كَنِيسِةْ سْمِيرْنَة: "هَاذَا الِّي يْقُولُو الأُوِّلْ وِالإِخِّرْ، الِّي مَاتْ وِرْجَعْ لِلحَيَاةْ:

⁹آنَا نَعْرِفْ المِحْنَة وِالفَقْرْ مْتَاعِكْ، رَغْمِلِّي إِنْتِ غْنِي. وْنَعْرِفْ الشَّيْء الِّي يِتْبَلُّوا بِيهْ عْلِيكْ الِّي يِنْدْعَاوْ الِّي هُومَا يْهُودْ وْهُومَا مَا هُمْشْ يْهُودْ، آمَا رَاهُمْ مَجْمَعْ الشِّيطَانْ.

¹⁰مَا تْخَافِشْ مِالعْذَابْ الِّي جَايِكْ، إِسْمَعْ! رَاهُو بْلِيسْ بَاشْ يْحُطْ جْمَاعَة مِنْكُمْ فِي الحَبْسْ بَاشْ يْجَرَّبْكُمْ، وْبِشْ تِتْعَذّْبُوا عَشْرَة أَيَّامْ. كُونْ أَمِينْ حَتَّى لِلمُوتْ، وْآنَا نَعْطِيكْ تَاجْ الحَيَاةْ.

¹¹الِّي عَنْدُو وِذْنِينْ، خَلِّيهْ يِسْمَعْ آشْ يْقُولْ الرُّوحْ لِلكَنَايِسْ، الِّي يِغْلِبْ مَا يْضُرُّوشْ المُوتْ الثَّانِي."»

¹²«وْإِكْتِبْ لِلمَلاَكْ مْتَاعْ كَنِيسِةْ بَرْغَامُسْ: "هَاذَا هُوَ الشَّيْء الِّي يْقُولُو مُولَى السِّيفْ المَاضِي مِالشِّيرْتِينْ:

¹³آنَا نَعْرِفْ وِينْ تُسْكُنْ. وِينْ العَرْشْ مْتَاعْ الشِّيطَانْ. شَدِّيتْ صْحِيحْ فِي إِسْمِي وْمَا نْكَرْتِشْ إِيمَانِكْ بِيَّ حَتَّى فِي النْهَارَاتْ الِّي تِقْتَلْ فِيهُمْ الشَّاهِدْ الأَمِينْ مْتَاعِي أَنْتِيبَاسْ مَا بِينَاتْكُمْ وِينْ يُسْكُنْ الشِّيطَانْ.

¹⁴آمَا رَانِي نْلُومِكْ عْلَى خَاطْرِكْ عِنْدِكْ شْكُونْ يْتَبّْعُوا فِي التَّعْلِيمْ مْتَاعْ بَلْعَامْ الِّي عَلِّمْ بَالاَقْ كِيفَاشْ يْخَلِّي بَنِي إِسْرَائِيلْ يُحْصْلُوا كِيَاكْلُوا مِالمَاكْلَة الِّي يْقَدّْمُوا فِيهَا لِلصْنَبْ وْيَزْنُوا،

¹⁵وْإِنْتِ زَادَا عِنْدِكْ شْكُونْ يْتَبّْعُوا فِي التَّعْلِيمْ مْتَاعْ النِّقُولاَوِيِّينْ.

¹⁶إِمَّالاَ تُوبْ وِلاَّ رَانِي نْجِيكْ فِيسَعْ بَاشْ نْحَارِبْهُمْ بِالسِّيفْ الِّي فِي فُمِّي.

¹⁷الِّي عَنْدُو وِذْنِينْ، خَلِّيهْ يِسْمَعْ آشْ يْقُولْ الرُّوحْ لِلكَنَايِسْ الِّي يِغْلِبْ بَاشْ نَعْطِيهْ شْوَيَّة مِالمَنْ المْخُبِّي وْبِشْ نَعْطِيهْ حَجْرَة بِيضَة مَنْقُوشْ فِيهَا إِسْمْ جْدِيدْ مَا يَعْرْفُو كَانْ الِّي تِعْطَالُو."»

¹⁸«وْإِكْتِبْ لِلمَلاَكْ مْتَاعْ كَنِيسِةْ ثِيَاتِيرَا: "هَاذَا آشْ يْقُولْ إِبْنْ اللهْ الِّي عِينِيهْ كِيفْ النَّارْ الشَّاعْلَة وْسَاقِيهْ كِيفْ النْحَاسْ المِرْحِي:

¹⁹آنَا نَعْرِفْ أَعْمَالِكْ وِمْحَبّْتِكْ وْإِيمَانِكْ وْخِدْمْتِكْ وْصَبْرِكْ، وْإِنُّو أَعْمَالِكْ الإِخّْرَة أَكْثِرْ مِنْ أَعْمَالِكْ الأُولاَنِيَّة.

²⁰آمَا نْلُومِكْ عْلَى خَاطْرِكْ تْخَلِّي فِي المْرَا إِيزَابِيلْ الِّي تِدَّعِي الِّي هِيَ نَبِيَّة تْعَلِّمْ فِي الخُدَّامْ مْتَاعِي وِتْغُرْ فِيهُمْ بَاشْ يَزْنُوا وْيَاكْلُوا مِالمَاكْلَة المْقَدْمَة لِلصْنَبْ.

²¹وِعْطِيتْهَا مُدَّة بَاشْ اتُّوبْ آمَا هِيَ مَا تْحِبِّشْ اتُّوبْ عْلَى الزْنَى مْتَاعْهَا.

²²هَاذَاكَا عْلاَشْ بَاشْ نْرَقِّدْهَا مْرِيضَة فِي الفَرْشْ، وْنَرْمِي الِّي يَزْنُوا مْعَاهَا فِي مِحْنَة كْبِيرَة، إِذَا كَانْ مَا يْتُوبُوشْ عْلَى عْمَايِلْهُمْ.

²³وْنُقْتُلْ وْلاَدْهَا، وِالكَنَايِسْ الكُلْهَا بَاشْ تَعْرِفْ الِّي آنَا هُوَ الِّي نَعْرِفْ الأَفْكَارْ وِالقْلُوبْ وْنَعْطِي لْكُلْ وَاحِدْ فِيكُمْ عْلَى قَدْ فِعْلُو.

²⁴آمَا آنَا نْقُولِلْكُمْ إِنْتُومَا البْقِيَّة الِّي فِي ثِيَاتِيرَا، إِنْتُومَا الِّي مَا تَبَّعْتُوشْ التَّعْلِيمْ هَاذَا وْمَا عْرَفْتُوشْ الشَّيْء الِّي يْسَمِّيوْهْ حْقِيقِةْ الشِّيطَانْ، رَانِي نْقُلْكُمْ، مَا نْحُطُّشْ عْلِيكُمْ حَتَّى حْمِلْ آخَرْ ثْقِيلْ.

²⁵آمَا إِسْتَحْفْظُوا عْلَى الشَّيْء الِّي عِنْدْكُمْ حَتَّى لِينْ نْجِي.

²⁶الِّي يِغْلِبْ وْيَعْمِلْ الأَعْمَالْ مْتَاعِي حَتَّى لِلإِخْرْ، نَعْطِيهْ سُلْطَة عْلَى الشْعُوبْ،

²⁷يْسُوقْهُمْ بِعْصَا مِنْ حْدِيدْ وْيِتْكَسّْرُوا كِيفْ الفُخَّارْ.

²⁸كِيفْ مَا خْذِيتْ مِنْ عِنْدْ بَابَا، وْنَعْطِيهْ نِجْمِةْ الصْبَاحْ.

²⁹الِّي عَنْدُو وِذْنِينْ، خَلِّيهْ يِسْمَعْ آشْ يْقُولْ الرُّوحْ لِلكَنَايِسْ."»