Read Tunisian Arabic New Testament الرُّؤْيَا 21 Bible Online

الرُّؤْيَا 21 - Tunisian Arabic New Testament bible

الرُّؤْيَا 21

¹وِمْبَاعِدْ شُفْتْ سْمَاء جْدِيدَة وْأَرْضْ جْدِيدَة، عْلَى خَاطِرْ السْمَاءْ الأُولَى وِالأَرْضْ لُولَى تْنَحَّاوْ وِالبْحَرْ مَا عَادِشْ مُوجُودْ،

²وْشُفْتْ المْدِينَة المُقَدّْسَة، أُورْشَلِيمْ الجْدِيدَة، هَابْطَة مِالسْمَاءْ مِنْ عِنْدْ اللهْ، حَاضْرَة كِيفْ عْرُوسَة مْزَيّْنَة رُوحْهَا لْرَاجِلْهَا.

³وِسْمَعْتْ صُوتْ عَالِي جَايْ مِالعَرْشْ وِيْقُولْ: «هَاهِيَ دَارْ اللهْ وِالنَّاسْ وْبِشْ يُسْكُنْ مْعَاهُمْ: بَاشْ يْكُونُوا شَعْبُو وِالله بِيدُو مْعَاهُمْ وْبِشْ يْكُونْ إِلاَهْهُمْ،

⁴وْبِشْ يِمْسَحْ كُلْ دَمْعَة مِنْ عِينِيهُمْ وْمَا عَادِشْ بَاشْ يْكُونْ ثَمَّة مُوتْ وِلاَّ حُزْنْ وِلاَّ بْكَاءْ وِلاَّ وْجِيعَة عْلَى خَاطِرْ الحَاجَاتْ القْدِيمَة تْنَحَّاتْ.»

⁵وْقَالْ الِّي قَاعِدْ عْلَى العَرْشْ: «هَانِي نْرُدْ كُلْ شَيْء جْدِيدْ!» وْقَالِّي زَادَا: «إِكْتِبْ الكْلاَمْ هَاذَا عْلَى خَاطْرُو صَادِقْ وْحَقْ.»

⁶وْقَالِّي: «كُلْ شَيْء تَمْ! آنَا الأَلِفْ وِاليَاءْ، البِدَايَة وِالنِّهَايَة. بَاشْ نَعْطِي لِلعَطْشَانْ مِالعِينْ مْتَاعْ مَاء الحَيَاةْ بْلاَشْ فْلُوسْ.

⁷الِّي يِغْلِبْ بَاشْ يَاخُذْ الوَرْثَة هَاذِي، وْآنَا بَاشْ نْكُونْ إِلاَهُو وْهُوَ بَاشْ يْكُونْ إِبْنِي.

⁸آمَا الخَوَّافَا وِلِّي مَا عِنْدْهُمْشْ إِيمَانْ وِالفِسَّادْ وْقَتَّالِينْ الأَرْوَاحْ وِالفَاجْرِينْ وِالسَّحَّارِينْ وِلِّي يِعْبْدُوا فِي الصْنَبْ وِالكَذَّابِينْ الكُلْهُمْ، رَاهُو نْصِيبْهُمْ بَاشْ يْكُونْ فِي البُحَيْرَة الِّي شَاعْلَة بِالنَّارْ وِالكِبْرِيتْ. وْهَاذَا هُوَ المُوتْ الثَّانِي.»

⁹وِمْبَاعِدْ جَانِي وَاحِدْ مِالسَّبْعَة مْلاَيْكَة الِّي عِنْدْهُمْ السَّبْعَة كِيسَانْ المَلْيَانِينْ بِالسَّبْعَة مْصَايِبْ الإِخْرَانِينْ وْكَلِّمْنِي وْقَالِّي: «إِيجَا تَوْ نْوَرِّيكْ العْرُوسَة مْتَاعْ الخَرُوفْ.»

¹⁰وْهَزّْنِي لِبْعِيدْ فِي الرُّوحْ لِجْبَلْ كْبِيرْ وْعَالِي وْوَرَّانِي أُورْشَلِيمْ المْدِينَة المُقَدّْسَة هَابْطَة مِالسْمَاءْ مِنْ عِنْدْ اللهْ،

¹¹وْفِيهَا مَجْدْ اللهْ. وْكَانِتْ تِلْمَعْ كِيفْ صْيَاغَة غَالْيَة بَرْشَة تِشْبِهْ لِلعْقِيقْ الصَّافِي كِيفْ البُلاَّرْ،

¹²وْفِيهَا سُورْ كْبِيرْ وْعَالِي فِيهْ ثْنَاشِنْ بَابْ وِالبِيبَانْ فِيهُمْ ثْنَاشِنْ مَلاَكْ وْمَكْتُوبْ عْلِيهُمْ أَسَامِي الأَثْنَاشِنْ عَرْشْ مْتَاعْ بَنِي إِسْرَائِيلْ:

¹³ثْلاَثَة بِيبَانْ فِي الشَّرْقْ، وِثْلاَثَة بِيبَانْ فِي الشَّمَالْ، وِثْلاَثَة بِيبَانْ فِي الجَنُوبْ، وِثْلاَثَة بِيبَانْ فِي الغَرْبْ.

¹⁴وِالسُّورْ مْتَاعْ المْدِينَة فِيهْ ثْنَاشِنْ سَاسْ مَكْتُوبْ عْلِيهُمْ الأَثْنَاشِنْ إِسْمْ مْتَاعْ الأَثْنَاشِنْ رَسُولْ مْتَاعْ الخَرُوفْ.

¹⁵وِالمَلاَكْ الِّي يْكَلِّمْ فِيَّ عَنْدُو قَصْبَة ذْهَبْ يْقِيسْ بِيهَا فِي المْدِينَة وِالبِيبَانْ وِالسُّورْ مْتَاعْهَا.

¹⁶وِالمْدِينَة مْرَبّْعَة، طُولْهَا قَدْ عُرْضْهَا. وْقَاسْ المْدِينَة بِالقَصْبَة مْتَاعُو وِلْقَاهَا أَلْفِينْ وْأَرْبْعَة مْيَاةْ كِيلُومِتْرْ وْطُولْهَا وْعُرْضْهَا وْعِلْوْهَا قَدْ قَدْ.

¹⁷وِمْبَاعِدْ قَاسْ السُّورْ مْتَاعْهَا لْقَاهْ مْيَة وْأَرْبْعَة وْأَرْبْعِينْ ذْرَاعْ بْطُولْ ذْرَاعْ الإِنْسَانْ كِيفْ مَا قَاسُو المَلاَكْ.

¹⁸وِالسُّورْ كَانْ مِبْنِي بِاليَشْبْ، وِالمْدِينَة بِالذْهَبْ الخَالِصْ الصَّافِي كِيفْ البُلاَّرْ.

¹⁹العْرُصْ مْتَاعْ سُورْ المْدِينَة كَانِتْ مْزَيّْنَة بْأَنْوَاعْ الصْيَاغَة الكُلْهَا. لُولَى عْقِيقْ، وِالثَّانْيَة يَاقُوتْ أَزْرِقْ، وِالثَّالْثَة عْقِيقْ أَبْيِضْ، وِالرَّابْعَة زْمُرُّدْ،

²⁰وِالخَامْسَة عْقِيقْ غَامِقْ، وِالسَّادْسَة عْقِيقْ أَحْمَرْ، وِالسَّابْعَة زْبَرْجِدْ، وِالثَّامْنَة جَزْعْ، وِالتَّاسْعَة يَاقُوتْ أَصْفِرْ، وِالعَاشْرَة عْقِيقْ أَخْضَرْ، وِالحْدَاشْ فَيْرُوزْ، وِالثَّنَاشْ مَشْتْ.

²¹وِالأَثْنَاشِنْ بَابْ كَانُوا ثْنَاشِنْ جُوهْرَة، كُلْ بَابْ مَصْنُوعْ مِنْ جُوهْرَة. وِالطْرِيقْ مْتَاعْ المْدِينَة ذْهَبْ خَالِصْ صَافِي كِيفْ البُلاَّرْ الشَّفَّافْ.

²²وْمَا شُفْتِشْ هَيْكِلْ فِي المْدِينَة، عْلَى خَاطِرْ الرَّبْ الإِلاَهْ القَادِرْ عْلَى كُلْ شَيْء وِالخَرُوفْ هُومَا الهَيْكِلْ مْتَاعْهَا.

²³وِالمْدِينَة مَا هِيشْ مِحْتَاجَة لِلشَّمْسْ وِلاَّ لِلقَمْرَة بَاشْ يِضْوِيوْ عْلِيهَا، عْلَى خَاطِرْ المَجْدْ مْتَاعْ اللهْ هُوَ نُورْهَا وِالخَرُوفْ هُوَ الفْنَارْ مْتَاعْهَا.

²⁴الأُمَمْ بَاشْ يِمْشِيوْ فِي نُورْهَا، وِالمُلُوكْ مْتَاعْ الأَرْضْ بَاشْ يْجِيبُولْهَا المَجْدْ مْتَاعْهُمْ.

²⁵بِيبَانْهَا مَا تِتْسَكِّرْشْ النْهَارْ وْطُولُو وْمُوشْ بَاشْ يْكُونْ فِيهَا لِيلْ.

²⁶بَاشْ يْجِيبُولْهَا المَجْدْ وِالكَرَامَة مْتَاعْ الأُمَمْ،

²⁷وْحَتَّى شَيْء مُوشْ طَاهِرْ مَا هُو بَاشْ يُدْخْلِلْهَا، وْلاَ الِّي يْعِيشُوا فِي النْجَاسَة وِالكِذْبْ، وْمَا يُدْخْلُولْهَا كَانْ الِّي أَسَامِيهُمْ مَكْتُوبَة فِي كْتَابْ الحَيَاةْ مْتَاعْ الخَرُوفْ.