Read Tunisian Arabic New Testament الرُّؤْيَا 22 Bible Online

الرُّؤْيَا 22 - Tunisian Arabic New Testament bible

الرُّؤْيَا 22

¹وِمْبَاعِدْ وَرَّانِي المَلاَكْ النَّهْرْ مْتَاعْ مَاء الحَيَاةْ، صَافِي وْيِلْمَعْ خَارِجْ مِالعَرْشْ مْتَاعْ اللهْ وِالخَرُوفْ

²وْيِجْرِي فِي وُسْطْ الطْرِيقْ الِّي فِي المْدِينَة، وْشُجْرِةْ الحَيَاةْ نَابْتَة بْجَنْبُو عْلَى الشِّيرْتِينْ مْتَاعْ النَّهْرْ وِتْجِيبْ فِي ثْنَاشِنْ غَلَّةْ، غَلَّة فِي كُلْ شْهَرْ، وْتِشْفِي الأُمَمْ بِالوْرَقْ مْتَاعْهَا.

³مِاليُومْ حَتَّى حَاجَة مَا عَادِتْ تِتْلْعَنْ. وِالعَرْشْ مْتَاعْ اللهْ وِالخَرُوفْ بَاشْ يْكُونُوا فِي المْدِينَة، وِالخُدَّامْ مْتَاعُو بَاشْ يُسْجْدُولُو

⁴وْبِشْ يْشُوفُوا وِجْهُو وْإِسْمُو بَاشْ يْكُونْ عْلَى جْبِينْهُمْ.

⁵وْمَا عَادِشْ بَاشْ يْكُونْ ثَمَّة لِيلْ، وْمَا هُمْشْ بَاشْ يْكُونُوا مِحْتَاجِينْ لْضَوْ الفْنَارَاتْ وِلاَّ الشَّمْسْ، عْلَى خَاطِرْ الرَّبْ الإِلاَهْ بَاشْ يْكُونْ النُّورْ مْتَاعْهُمْ وْهُومَا بَاشْ يِمْلْكُوا لِلأَبَدْ.

⁶وْقَالِّي المَلاَكْ: «الكْلاَمْ هَاذَا صْحِيحْ وْحَقْ وِالرَّبْ إِلاَهْ أَرْوَاحْ الأَنْبِيَاءْ بْعَثْ المَلاَكْ مْتَاعُو بَاشْ يْوَرِّي الخُدَّامْ مْتَاعُو الشَّيْء الِّي لاَزِمْ يَاقَعْ عْلَى قْرِيبْ.

⁷هَانِي جَايْ فِيسَعْ، صَحَّة لِيهْ الِّي يَعْمِلْ بِالكْلاَمْ مْتَاعْ النُّبُوَّة الِّي فِي الكْتَابْ هَاذَا.»

⁸وْآنَا يُوحَنَّا بِيدِي الِّي شُفْتْ وِسْمَعْتْ الحَاجَاتْ هَاذُمْ. كِسْمَعْتْهُمْ وْشُفْتْهُمْ، طُحْتْ قُدَّامْ سَاقِينْ المَلاَكْ الِّي وَرَّاهُمْلِي بَاشْ نِسْجِدْلُو،

⁹يَاخِي قَالِّي: «رُدْ بَالِكْ، مَا يِلْزْمِكْشْ تَعْمِلْ الشَّيْء هَاذَا! آنَا خَادِمْ كِيفِكْ وْكِيفْ خْوَاتِكْ الأَنْبِيَاءْ وْكِيفْ الِّي يَعْمْلُوا بِالكْلاَمْ الِّي فِي الكْتَابْ هَاذَا. أُسْجُدْ للهْ.»

¹⁰وْقَالِّي: «مَا تِخْتِمْشْ كْلاَمْ النُّبُوَّة مْتَاعْ الكْتَابْ هَاذَا. رَاهُو الوَقْتْ قْرُبْ.

¹¹خَلِّي الِّي يَعْمِلْ فِي الشَّرْ يْكَمِّلْ يَعْمِلْ الشَّرْ، وِالمَنْجُوسْ يَبْقَى مَنْجُوسْ، وِالبَارْ يَبْقَى بَارْ، وِالقِدِّيسْ يَبْقَى قِدِّيسْ.»

¹²«هَانِي جَايْ فِيسَعْ وْهَازْ الثْوَابْ مْتَاعِي بَاشْ نْجَازِي كُلْ وَاحِدْ عْلَى قَدْ أَعْمَالُو.

¹³آنَا الأَلِفْ وِاليَاءْ، البْدَايَة وِالنْهَايَة، والأُوِّلْ وِالإِخِّرْ.»

¹⁴صَحَّة لِيهُمْ الِّي يَغْسْلُوا الجْبَايِبْ مْتَاعْهُمْ بَاشْ يْكُونْ عِنْدْهُمْ حَقْ فِي شَجْرِةْ الحَيَاةْ، وْبَاشْ يُدْخْلُوا المْدِينَة مِنْ بِيبَانْهَا.

¹⁵وِلِّي البَرَّة مِالمْدِينَة، هُومَا الكْلاَبْ وِالسَّحَّارِينْ وِالفُجَّارْ وْقَتَّالِينْ الأَرْوَاحْ وِلِّي يِعْبْدُوا فِي الصْنَبْ وْكُلْ وَاحِدْ يِكْذِبْ وِيْحِبْ الكِذْبْ.

¹⁶«آنَا يَسُوعْ بْعَثْتْلِكْ المَلاَكْ مْتَاعِي بَاشْ يْهِزّْلِكْ الشّْهَادَة هَاذِي لِلكَنَايِسْ. آنَا الأَصْلْ وِالذُّرِّيَّة مْتَاعْ دَاوُدْ. نِجْمِةْ الصْبَاحْ الِّي تِضْوِي.»

¹⁷الرُّوحْ وِالعْرُوسَة يْقُولُوا: «إِيجَا!» وِلِّي يِسْمَعْ خَلِّيهْ يْقُولْ: «إِيجَا!» وِلِّي هُوَ عَطْشَانْ خَلِّيهْ يْجِي، وِلِّي يْحِبْ خَلِّيهْ يَاخُذْ مَاء الحَيَاةْ بْلاَشْ.

¹⁸وْآنَا انَّبَّهْ عْلَى كُلْ مِنْ يِسْمَعْ كْلاَمْ النُّبُوَّة مْتَاعْ الكْتَابْ هَاذَا، إِذَا كَانْ أَيْ وَاحِدْ يْزِيدْ عْلِيهْ حَاجَة، رَاهُو اللهْ بَاشْ يْزِيدُو المْصَايِبْ الِّي حْكَى عْلِيهُمْ الكْتَابْ هَاذَا.

¹⁹وْإِذَا كَانْ أَيْ وَاحِدْ يْنَقِّصْ مِنْ كْلاَمْ الكْتَابْ مْتَاعْ النُّبُوَّة هَاذِي، رَاهُو اللهْ بَاشْ يْنَقِّصْلُو بَايُو مِنْ شَجْرِةْ الحَيَاةْ وْمِالمْدِينَة المُقَدّْسَة، الِّي تِكْتِبْ عْلِيهُمْ فِي الكْتَابْ هَاذَا.

²⁰يْقُولْ الِّي هُوَ شَاهِدْ عْلَى الحَاجَاتْ هَاذُومَا: «أَكِيدْ آنَا جَايْ فِيسَعْ!» آمِينْ. إِيجَا، يَا الرَّبْ يَسُوعْ.

²¹نِعْمِةْ الرَّبْ يَسُوعْ مْعَاكُمْ الكُلْكُمْ.