Read Tunisian Arabic New Testament الرُّؤْيَا 3 Bible Online

الرُّؤْيَا 3 - Tunisian Arabic New Testament bible

الرُّؤْيَا 3

¹«وْإِكْتِبْ لِلمَلاَكْ مْتَاعْ كَنِيسِةْ سَارْدِسْ: "هَاذَا آشْ يْقُولْ الِّي عَنْدُو السَّبْعَة أَرْوَاحْ مْتَاعْ اللهْ وِالسَّبْعَة نْجُومْ: آنَا نَعْرِفْ أَعْمَالِكْ. إِنْتِ مِتْسَمِّي حَيْ آمَا رَاكْ مِيتْ.

²رُدْ بَالِكْ وْقَوِّي الِّي بْقَالِكْ حَيْ وْهُوَ قَاعِدْ يْمُوتْ. رَانِي مَا نِيشْ نْشُوفْ فِي أَعْمَالِكْ كَامْلَة قُدَّامْ رَبِّي.

³إِمَّالاَ اتْذَكِّرْ كِيفَاشْ خْذِيتْ وِسْمِعْتْ، إِسْتَحْفِظْ عْلِيهْ وْتُوبْ. إِذَا كَانْ مَا تَسْهِرْشْ رَانِي نْجِيكْ كِيفْ السَّارِقْ، نْجِيكْ عْلَى غَفْلَة.

⁴آمَا مَا زَالُوا عِنْدِكْ شْوَيَّة نَاسْ فِي سَارْدِسْ مَا نَجّْسُوشْ لِبْسِتْهُمْ، وْبِشْ يِمْشِيوْ مْعَايَا فِي لِبْسَة بِيضَة عْلَى خَاطِرْهُمْ يِسْتَاهْلُوا.

⁵الِّي يِغْلِبْ يِلْبِسْ كِيفْهُمْ لِبْسَة بِيضَة، وْمَا انَّحِّيلُوشْ إِسْمُو مِنْ كْتَابْ الحَيَاةْ، رَانِي بَاشْ نِعْتَرِفْ بْإِسْمُو قُدَّامْ بَابَا وْقُدَّامْ المْلاَيْكَة مْتَاعُو.

⁶الِّي عَنْدُو وِذْنِينْ، خَلِّيهْ يِسْمَعْ آشْ يْقُولْ الرُّوحْ لِلكَنَايِسْ."»

⁷«وْإِكْتِبْ لِلمَلاَكْ مْتَاعْ كَنِيسِةْ فِيلاَدَلْفْيَة: "هَاذَا آشْ يْقُولْ القُدُّوسْ الحَقْ الِّي عَنْدُو مِفْتَاحْ دَاوُدْ، إِذَا كَانْ حَلْ حَتَّى وَاحِدْ مَا يْسَكِّرْ، وْإِذَا كَانْ سَكِّرْ حَتَّى وَاحِدْ مَا يْحِلْ:

⁸آنَا نَعْرِفْ أَعْمَالِكْ. هَانِي حَطِّيتْ قُدَّامِكْ بَابْ مَحْلُولْ حَتَّى حَدْ مَا يْنَجِّمْ يْسَكّْرُو، مَازَالِتْ عِنْدِكْ شْوَيَّة قُوَّة وْحَافِظْتْ عْلَى كِلْمْتِي وْمَا نْكَرْتِشْ إِسْمِي

⁹آهُومَا الِّي مِنْ مَجْمَعْ الشِّيطَانْ، الِّي يِنْدْعَاوْ الِّي هُومَا يْهُودْ. آمَا هُومَا يِكْذْبُوا وْمَا هُمْشْ يْهُودْ، بَاشْ نْخَلِّيهُمْ يْجِيوْ وْيُسْجْدُوا قُدَّامْ سَاقِيكْ وْيَعْرْفُوا الِّي آنَا حَبِّيتِكْ.

¹⁰وِعْلَى خَاطْرِكْ حْفَظْتْ كِلْمْتِي الِّي تْخَلِّيكْ تِثْبِتْ، رَانِي بَاشْ نِحْمِيكْ مِنْ سَاعِةْ المِحْنَة الِّي بَاشْ تْجِي عْلَى الدِّنْيَا الكُلْهَا بَاشْ تْجَرِّبْ النَّاسْ الِّي فِي الدِّنْيَا الكُلْهُمْ.

¹¹رَانِي جَايْ عْلَى قْرِيبْ، إِسْتَحْفِظْ عْلَى الشَّيْء الِّي عِنْدِكْ بَاشْ حَتَّى وَاحِدْ مَا يْفُكّْلِكْ التَّاجْ مْتَاعِكْ.

¹²الِّي يِغْلِبْ بَاشْ نْرُدُّو عَرْصَة فِي الهَيْكِلْ مْتَاعْ إِلاَهِي، وْعُمْرُو مَا يُخْرُجْ مِنُّو. وْنِكْتِبْ عْلِيهْ إِسْمْ إِلاَهِي وْإِسْمْ المْدِينَة مْتَاعْ إِلاَهِي أُورْشَلِيمْ الجْدِيدَة الِّي تِنْزِلْ مِالسْمَاءْ مِنْ عِنْدْ إِلاَهِي وْنِكْتِبْ عْلِيهْ إِسْمِي الجْدِيدْ.

¹³الِّي عَنْدُو وِذْنِينْ، خَلِّيهْ يِسْمَعْ آشْ يْقُولْ الرُّوحْ لِلكَنَايِسْ."»

¹⁴«وْإِكْتِبْ لِلمَلاَكْ مْتَاعْ كَنِيسِةْ لاَوْدُكِيَّة: "هَاذَا آشْ يْقُولْ الأَمِينْ، الشَّاهِدْ الأَمِينْ وِالصَّادِقْ، الِّي هُوَ أَصْلْ الخْلِيقَة مْتَاعْ اللهْ.

¹⁵آنَا نَعْرِفْ أَعْمَالِكْ، وْنَعْرِفْ الِّي إِنْتِ لاَكْ بَارِدْ وْلاَكْ سْخُونْ، وْيَا لِيتِكْ جِيتْ بَارِدْ وِلاَّ سْخُونْ!

¹⁶إِمَّالاَ عْلَى خَاطْرِكْ لاَكْ بَارِدْ وْلاَكْ سْخُونْ، آمَا مْلَذْلِذْ، هَاذَاكَا عْلاَشْ بَاشْ نِتْقَيَّاكْ مِنْ فُمِّي.

¹⁷تْقُولْ: آنَا غْنِي وْوَلِّيتْ لاَبَاسْ عْلِيَّ وْمَا نِحْتَاجْ لْحَتَّى شَيْء. وْمَا كِشْ عَارِفْ الِّي إِنْتِ شَاقِي وْمِسْكِينْ وِفْقِيرْ وْأَعْمَى وْعِرْيَانْ.

¹⁸هَاذَاكَا عْلاَشْ نَنْصْحِكْ بَاشْ تِشْرِي مِنْ عِنْدِي ذْهَبْ مْصَفِّي بِالنَّارْ بَاشْ تِتْغْنَى، وْلِبْسَة بِيضَة تِلْبِسْهَا وْتُسْتْرِكْ وِالعْرَى مْتَاعِكْ الِّي يْحَشِّمْ مَا عَادِشْ يِتْشَافْ، وِكْحُلْ تْكَحِّلْ بِيهْ عِينِيكْ بَاشْ تْشُوفْ.

¹⁹رَانِي نْوَبِّخْ وِنْأَدِّبْ الِّي نْحِبُّو، إِمَّالاَ كُونْ مِتْحَمِّسْ وْتُوبْ.

²⁰هَانِي وَاقِفْ قُدَّامْ البَابْ وِنْدُقْ، إِذَا كَانْ وَاحِدْ سْمَعْ صُوتِي وْحَلْ البَابْ، رَانِي بَاشْ نُدْخُلْ بِحْذَاهْ وْنِتْعَشَّى مْعَاهْ وْهُوَ يِتْعَشَّى مْعَايَا.

²¹الِّي يِغْلِبْ بَاشْ نْخَلِّيهْ يُقْعُدْ مْعَايَا عْلَى العَرْشْ مْتَاعِي، كِيمَا آنَا غْلِبْتْ وِقْعَدْتْ مْعَ بَابَا عْلَى العَرْشْ مْتَاعُو.

²²الِّي عَنْدُو وِذْنِينْ، خَلِّيهْ يِسْمَعْ آشْ يْقُولْ الرُّوحْ لِلكَنَايِسْ."»