Read Tunisian Arabic New Testament الرُّؤْيَا 4 Bible Online

الرُّؤْيَا 4 - Tunisian Arabic New Testament bible

الرُّؤْيَا 4

¹مْبَاعِدْ خْزَرْتْ وْشُفْتْ بَابْ مَحْلُولْ فِي السْمَاءْ، وِسْمِعْتْ الصُّوتْ الِّي كَلِّمْنِي قْبَلْ كِيفْ صُوتْ البُوقْ يْقُلِّي: «أَطْلِعْ لِهْنَا بَاشْ نْوَرِّيكْ الشَّيْء الِّي لاَزِمْ يَاقَعْ بَعْدْ الحَاجَاتْ هَاذُومَا.»

²وْبِالوَقْتْ وَلِّيتْ فِي الرُّوحْ، وْإِذَا بِيهْ عَرْشْ فِي السْمَاءْ، وْوَاحِدْ قَاعِدْ عْلِيهْ

³وِلِّي قَاعِدْ عْلَى العَرْشْ مَنْظْرُو كِيفْ اليَشْبْ وِالعْقِيقْ الأَحْمَرْ، وِالعَرْشْ دَايِرْ بِيهْ قَوْسْ قُزَحْ كِيفْ الزْمُرُّدْ.

⁴وْأَرْبْعَة وْعِشْرِينْ عَرْشْ أُخْرِينْ دَايْرِينْ بِالعَرْشْ، وْأَرْبْعَة وْعِشْرِينْ شِيخْ قَاعْدِينْ عْلَى العْرُوشْ ولاَبْسِينْ لِبْسَة بِيضَة وِعْلَى رُوسْهُمْ تِيجَانْ ذْهَبْ.

⁵وِالعَرْشْ خَارِجْ مِنُّو ضَوْ بَرْقْ وِصْوَاتْ مْتَاعْ رَعْدْ، وْشَاعْلَة قُدَّامُو سَبْعَة فْنَارَاتْ هِيَ أَرْوَاحْ اللهْ السَّبْعَة،

⁶وْقُدَّامْ العَرْشْ كَإِنُّو بْحَرْ شَفَّافْ كِيفْ البُلاَّرْ، وْفِي وُسْطْ العَرْشْ وِعْلَى جْنَابُو أَرْبْعَة مَخْلُوقَاتْ مْعُبِّينْ بِالعِينِينْ مِنْ قُدَّامْ وْمِنْ تَالِي:

⁷المَخْلُوقْ الأُوِّلْ يِشْبِهْ لِلصِّيدْ، وِالمَخْلُوقْ الثَّانِي يِشْبِهْ لِلعْجِلْ، وِالمَخْلُوقْ الثَّالِثْ وِجْهُو كِيفْ وِجْهْ الإِنْسَانْ، وِالمَخْلُوقْ الرَّابِعْ يِشْبِهْ لِلنِّسْرْ الطَّايِرْ.

⁸وْكُلْ وَاحِدْ مِالمَخْلُوقَاتْ الأَرْبْعَة هَاذُومَا عَنْدُو سِتَّة جْوَانِحْ مْعُبِّينْ بِالعِينِينْ مِالبَرَّة وْمِنْ دَاخِلْ وْلِيلْ وِنْهَارْ وْهُومَا يْسَبّْحُوا مِنْ غِيرْ مَا يَاقْفُوا: قُدُّوسْ! قُدُّوسْ! قُدُّوسْ! الرَّبْ الإِلاَهْ القَادِرْ الِّي كَانْ مُوجُودْ وِلِّي مُوجُودْ تَوَّا وِلِّي هُوَ جَايْ.

⁹وِالمَخْلُوقَاتْ الكُلْهُمْ يْسَبّْحُوا وِيْمَجّْدُوا وِيعَظّْموا وْيِحْمْدُوا فِلِّي قَاعِدْ عْلَى العَرْشْ الِّي هُوَ حَيْ لِلأَبَدْ،

¹⁰وِالأَرْبْعَة وْعِشْرِينْ شِيخْ رَكْعُوا قُدَّامْ الِّي قَاعِدْ عْلَى العَرْشْ وْسِجْدُولُو هُوَ الِّي حَيْ لِلأَبَدْ وِرْمَاوْ التِّيجَانْ مْتَاعْهُمْ قُدَّامْ العَرْشْ وْسَبّْحُوا وْقَالُوا:

¹¹يَا رَبّْنَا وْإِلاَهْنَا، تِسْتْحَقْ بَاشْ تَاخُذْ المَجْدْ وِالكَرَامَة وِالقُدْرَة عْلَى خَاطْرِكْ خْلَقْتْ الحَاجَاتْ الكُلْهَا، وِبْإِرَادْتِكْ تْوِجْدِتْ وِانْتِ الِّي خْلَقْتْهَا.