Read Tunisian Arabic New Testament الرُّؤْيَا 5 Bible Online

الرُّؤْيَا 5 - Tunisian Arabic New Testament bible

الرُّؤْيَا 5

¹وْشُفْتْ عْلَى يْمِينْ الِّي قَاعِدْ عْلَى العَرْشْ كْتَابْ مَكْتُوبْ مِنْ دَاخِلْ وْمِنْ بَرَّا، وْمَخْتُومْ بْسَبْعَة خْوَاتِمْ،

²وْشُفْتْ مَلاَكْ قْوِي يْنَادِي بْصُوتْ عَالِي: «شْكُونُو الِّي يِسْتَاهِلْ بَاشْ يْحِلْ الكْتَابْ وِيْنَحِّي الخْوَاتِمْ مْتَاعُو؟»

³وْحَتَّى وَاحِدْ فِي السْمَاءْ وِلاَّ فِي الأَرْضْ وِلاَّ تَحْتْ الأَرْضْ مَا نَجِّمْ يْحِلْ الكْتَابْ وِيْشُوفْ الِّي فِي وُسْطُو.

⁴وِبْكِيتْ كِمَا ثَمَّاشْ حَتَّى وَاحِدْ يِسْتَاهِلْ بَاشْ يْحِلْ الكْتَابْ وِيْشُوفْ الِّي فِي وُسْطُو.

⁵وْقَلِّي وَاحِدْ مِالشْيُوخْ: «مَا تِبْكِيشْ. هَاوْ الصِّيدْ اللّي مِنْ أصْلْ يَهُوذَا وِلِّي هُوَ الأَصْلْ الِّي جَا مِنُّو دَاوُدْ غْلِبْ، بَاشْ يْحِلْ الكْتَابْ وِيْنَحِّي الخْوَاتِمْ السَّبْعَة مْتَاعُو.»

⁶وْشُفْتْ مَا بِينْ العَرْشْ وِالمَخْلُوقَاتْ الأَرْبْعَة وْفِي وُسْطْ الشْيُوخْ خَرُوفْ وَاقِفْ كَإِنُّو مَذْبُوحْ، عَنْدُو سَبْعَة قْرُونْ وْسَبْعَة عِينِينْ الِّي هُومَا الأَرْوَاحْ السَّبْعَة مْتَاعْ اللهْ الِّي بْعَثْهُمْ لِلأَرْضْ الكُلْهَا.

⁷وِمْشَى وِخْذَا الكْتَابْ مِاليِدْ اليْمِينْ مْتَاعْ الِّي قَاعِدْ عْلَى العَرْشْ.

⁸وْكِخْذَا الكْتَابْ، سِجْدُوا المَخْلُوقَاتْ الأَرْبْعَة وِالشْيُوخْ الأَرْبْعَة وْعِشْرِينْ لِلخَرُوفْ. وْكُلْ وَاحِدْ فِيهُمْ كَانِتْ عَنْدُو قِيتَارَة وْكِيسَانْ ذْهَبْ مِلْيَانَة بِالبْخُورْ، الِّي هُومَا الصَّلَوَاتْ مْتَاعْ القِدِّيسِينْ.

⁹وْكَانُوا يْغَنِّيوْ فِي غْنَايَة جْدِيدَة وِيْقُولُوا: إِنْتِ تِسْتَاهِلْ بَاشْ تَاخُذْ الكْتَابْ وِتْنَحِّي مِنُّو الخْوَاتِمْ! رَاكْ تِقْتَلْتْ وِفْدِيتْ نَاسْ وْبْدَمِّكْ جِبْتْهُمْ للهْ مِنْ كُلْ عَرْشْ وْلُغَة وْشَعْبْ وْأُمَّة،

¹⁰وْرَدِّيتْهُمْ مَمْلْكَة وْكُهَّانْ مْتَاعْ إِلاَهْنَا وِالأَرْضْ بَاشْ يُحْكْمُوهَا.

¹¹وِخْزَرْتْ وِسْمَعْتْ أَصْوَاتْ مْتَاعْ بَرْشَة مْلاَيْكَة دَايْرِينْ بِالعَرْشْ وْبِالمَخْلُوقَاتْ الأَرْبْعَة وِالشْيُوخْ وِعْدَدْهُمْ مْلاَيِنْ المْلاَيِنْ وْآلاَفْ الآلاَفْ،

¹²وْهُومَا يْقُولُوا عْلَى قُوةْ صُوتْهُمْ: الخَرُوفْ المَذْبُوحْ يِسْتَاهِلْ بَاشْ يَاخُذْ الغْنَى وِالقُدْرَة وِالحِكْمَة وِالقُوَّة وِالكَرَامَة وِالمَجْدْ وِالبَرْكَة!

¹³وِالمَخْلُوقَاتْ الِّي فِي السْمَاءْ وِالأَرْضْ وِلِّي تَحْتْ الأَرْضْ وِلِّي فِي البْحَرْ الكُلْهُمْ سْمِعْتْهُمْ يْقُولُوا: البَرْكَة وِالكَرَامَة وِالمَجْدْ وِالقُوَّة لِلأَبَدْ لِلخَرُوفْ ولِلِّي قَاعِدْ عْلَى العَرْشْ.

¹⁴وِالمَخْلُوقَاتْ الأَرْبْعَة كَانُوا يْقُولُوا: «آمِينْ!» وِالشْيُوخْ هَبْطُوا وْسِجْدُوا.