Read Tunisian Arabic New Testament الرُّؤْيَا 6 Bible Online

الرُّؤْيَا 6 - Tunisian Arabic New Testament bible

الرُّؤْيَا 6

¹وْشُفْتْ الخَرُوفْ كِحَلْ وَاحِدْ مِالخْوَاتِمْ السَّبْعَة، وِسْمِعْتْ وَاحِدْ مِالمَخْلُوقَاتْ الأَرْبْعَة يْقُولْ بْصُوتْ كِيفْ الرَّعْدْ: «إِيجَا!»

²وِخْزَرْتْ وْإِذَا بِيهْ حْصَانْ أَبْيِضْ، وِالرَّاكِبْ عْلِيهْ هَازْ نَبْلْ، وِعْطُوهْ تَاجْ وِخْرَجْ كِيفْ غَالِبْ بَاشْ يِغْلِبْ.

³كِحَلْ الخَاتِمْ الثَّانِي، سْمَعْتْ المَخْلُوقْ الثَّانِي يْقُولْ: «إِيجَا!»

⁴وِخْرَجْ حْصَانْ آخَرْ، لُونُو أَحْمَرْ، الِّي رَاكِبْ عْلِيهْ تِعْطَاتْلُو القُدْرَة بَاشْ يْنَحِّي السَّلاَمْ مِالأَرْضْ بَاشْ النَّاسْ يْذَبّْحُوا بْعَضْهُمْ، وْتِعْطَالُو سِيفْ كْبِيرْ.

⁵كِحَلْ الخَاتِمْ الثَّالِثْ، سْمَعْتْ المَخْلُوقْ الثَّالِثْ يْقُولْ: «إِيجَا!» خْزَرْتْ وْإِذَا بِيهْ حْصَانْ أَكْحَلْ وِالرَّاكِبْ عْلِيهْ فِي يِدُّو مِيزَانْ.

⁶وِسْمَعْتْ حَاجَة تِشْبِهْ لْصُوتْ خَارِجْ مِنْ بِينْ المَخْلُوقَاتْ الأَرْبْعَة يْقُولْ: «كِيلُو قَمْحْ بْحَقْ نْهَارْ خِدْمَة، وِثْلاَثَة كِيلُو شْعِيرْ زَادَا، آمَا مَا تْضُرُّشْ الزِّيتْ وِالشْرَابْ.»

⁷كِحَلْ الخَاتِمْ الرَّابِعْ، سْمَعْتْ صُوتْ المَخْلُوقْ الرَّابِعْ يْقُولْ: «إِيجَا!»

⁸وِخْزَرْتْ وْإِذَا بِيهْ حْصَانْ أَخْضَرْ، وِالرَّاكِبْ عْلِيهْ إِسْمُو المُوتْ، وِالهَاوْيَة اتَّبَّعْ فِيهْ، وْهَاذُومَا تِعْطَاتِلْهُمْ سُلْطَة عْلَى رْبُعْ النَّاسْ الِّي فِي الدِّنْيَا بَاشْ يُقْتْلُوهُمْ بِالسْيُوفَا وِالجُّوعْ وِالمُوتْ وْبِالوُحُوشْ الِّي فِي الأَرْضْ.

⁹كِنَحَّى الخَرُوفْ الخَاتِمْ الخَامِسْ، شُفْتْ تَحْتْ المَذْبِحْ الأَرْوَاحْ مْتَاعْ الِّي تْذِبْحُوا عْلَى خَاطِرْ كِلْمِةْ اللهْ وِالشّْهَادَة الِّي شِهْدُوا بِيهَا.

¹⁰صَاحُوا بْصُوتْ عَالِي: «يَا رَبِّي القُدُّوسْ وِالحَقْ، لْوَقْتَاشْ مَا كِشْ بَاشْ تُحْكُمْ عَلِّي سَاكْنِينْ فِي الأَرْضْ وْتِنْتَقَمْ مِنْهُمْ لْدَمّْنَا؟»

¹¹وْتِعْطَاتْ لْكُلْ وَاحِدْ فِيهُمْ جِبَّة بِيضَة، وِتْقَالِلْهُمْ بَاشْ يِرْتَاحُوا شْوَيَّة حَتَّى لِينْ يِكْمِلْ العْدَدْ مْتَاعْ الخُدَّامْ الِّي كِيفْهُمْ وِخْوَاتْهُمْ الِّي بَاشْ يِتْقَتْلُوا كِيفْهُمْ.

¹²كِحَلْ الخَاتِمْ السَّادِسْ، خْزَرْتْ وْإِذَا بِيهْ زِلْزَالْ كْبِيرْ، وِالشَّمْسْ وَلاَّتْ سُودَة كِيفْ لِبْسِةْ امَّالِي المِيتْ، وِالقَمْرَة الكُلْهَا وَلاَّتْ كِيفْ الدَّمْ،

¹³وِنْجُومْ السْمَاءْ اطِّيحْ فُوقْ الأَرْضْ كِيفْ مَا اطَّيَّحْ الكَرْمَة كْعَبْهَا النَّيَّة وَقْتِلِّي تْهِبْ عْلِيهَا رِيحْ قْوِيَّة،

¹⁴السْمَاءْ تِطّْوَى كِيفْ مَا تِطّْوَى الوَرْقَة وِالجْبَالْ وِالجُزُرْ الكُلْهَا تِتْحَرِّكْ مِنْ بْلاَيِصْهَا،

¹⁵وِالمُلُوكْ مْتَاعْ الأَرْضْ وِالمَشْهُورِينْ وْقُوَّادْ الجَيْشْ وِالغْنِيِّينْ والقْوِيِّينْ وِالعَبِيدْ وِالأَحْرَارْ الكُلْهُمْ يِتْخَبَّاوْ فِي الدْوَامِيسْ وْمَا بِينْ الحْجَرْ مْتَاعْ الجْبَالْ،

¹⁶وْهُومَا يْقُولُوا لِلجْبَالْ وِالحْجَرْ: «طِيحُوا عْلِينَا وْخَبِّيوْنَا عَلِّي قَاعِدْ عْلَى العَرْشْ وْمِنْ الْغَضَبْ مْتَاعْ الخَرُوفْ.

¹⁷رَاهُو جَا اليُومْ العْظِيمْ مْتَاعْ الغَضَبْ مْتَاعْهُمْ، وِشْكُونُو الِّي يْنَجِّمْ يَاقِفْ قُدَّامُو؟»