Read Tunisian Arabic New Testament الرُّؤْيَا 7 Bible Online

الرُّؤْيَا 7 - Tunisian Arabic New Testament bible

الرُّؤْيَا 7

¹مْبَاعِدْ شُفْتْ أَرْبْعَة مْلاَيْكَة وَاقْفِينْ فِي الأَرْبْعَة جِيهَاتْ مْتَاعْ الأَرْضْ، شَادِّينْ الأَرْبْعَة رْيَاحْ مْتَاعْ الأَرْضْ بَاشْ حَتَّى رِيحْ مِنْهُمْ مَا تْهِبْ عْلَى البَرْ وِلاَّ البْحَرْ وِلاَّ الشَّجَرْ.

²وِمْبَاعِدْ شُفْتْ مَلاَكْ آخَرْ طَالِعْ مْنِينْ تُطْلُعْ الشَّمْسْ. هَازْ الخَاتِمْ مْتَاعْ اللهْ الحَيْ. وْنَادَى بْصُوتْ عَالِي الأَرْبْعَة مْلاَيْكَة الِّي مْكَلّْفِينْ بَاشْ يْضُرُّوا البَرْ وِالبْحَرْ

³وْقَالِلْهُمْ: «مَا تْضُرُّوشْ البَرْ وِلاَّ البْحَرْ وِلاَّ الشَّجَرْ حَتَّى لِينْ نْحُطُّوا أَمَارَة عْلَى الجْبَاهِي مْتَاعْ خُدَّامْ إِلاَهْنَا.»

⁴وِسْمَعْتْ إِنُّو العْدَدْ مْتَاعْ المَخْتُومِينْ مْيَة وْأَرْبْعَة وْأَرْبْعِينْ أَلْفْ تْخِتْمُوا مِالعْرُوشَاتْ مْتَاعْ بَنِي إِسْرَائِيلْ الكُلْهُمْ:

⁵ثْنَاشِنْ أَلْفْ مَخْتُومِينْ مِنْ عَرْشْ يَهُوذَا، وِثْنَاشِنْ أَلْفْ مِنْ عَرْشْ رَأُوبَيْنْ، وِثْنَاشِنْ أَلْفْ مِنْ عَرْشْ جَادْ،

⁶وِثْنَاشِنْ أَلْفْ مِنْ عَرْشْ أَشِيرْ، وِثْنَاشِنْ أَلْفْ مِنْ عَرْشْ نَفْتَالِي، وِثْنَاشِنْ أَلْفْ مِنْ عَرْشْ مَنَسَّى،

⁷وِثْنَاشِنْ أَلْفْ مِنْ عَرْشْ شَمْعُونْ، وِثْنَاشِنْ أَلْفْ مِنْ عَرْشْ لاَوِي، وِثْنَاشِنْ أَلْفْ مِنْ عَرْشْ يَسَّاكَرْ

⁸وِثْنَاشِنْ أَلْفْ مِنْ عَرْشْ زَبُولُونْ، وِثْنَاشِنْ أَلْفْ مِنْ عَرْشْ يُوسُفْ، وِثْنَاشِنْ أَلْفْ مِنْ عَرْشْ بِنْيَامِينْ. الكُلْهُمْ تْخِتْمُوا.

⁹وِمْبَاعِدْ خْزَرْتْ وْإِذَا بِيهُمْ بَرْشَة نَاسْ مَا يِتْعَدُّوشْ، مِنْ كُلْ أَمَّة وْمِنْ كُلْ عَرْشْ وْشَعْبْ وْلُغَة، وْكَانُوا وَاقْفِينْ قُدَّامْ العَرْشْ وْقُدَّامْ الخَرُوفْ، لاَبْسِينْ جْبَايِبْ بِيضْ وْهَازِّينْ فِي يْدِيهُمْ عِيدَانْ النْخَلْ،

¹⁰وْهُومَا يْصِيحُوا بْصُوتْ عَالِي وِيْقُولُوا: «الخَلاَصْ يْجِي مِنْ عِنْدْ إِلاَهْنَا القَاعِدْ عْلَى العَرْشْ وْمِنْ عِنْدْ الخَرُوفْ!»

¹¹وِالمْلاَيْكَة الكُلْهُمْ دَايْرِينْ بِالعَرْشْ وْدَايْرِينْ بِالشْيُوخْ وْبِالأَرْبْعَة مَخْلُوقَاتْ، وْهَبْطُوا عْلَى وْجُوهْهُمْ قُدَّامْ العَرْشْ وْعِبْدُوا اللهْ

¹²وْقَالُوا: آمِينْ. البَرْكَة وِالمَجْدْ وِالحِكْمَة وِالشُّكْرْ وِالكَرَامَة وِالقُوَّة وِالقُدْرَة لإِلاَهْنَا لِلأَبَدْ. آمِينْ.

¹³وْقَلِّي وَاحِدْ مِالشْيُوخْ: «شْكُونْهُمْ هَاذُومَا الِّي لاَبْسِينْ جْبَايِبْ بْيُضْ وِمْنِينْ جَاوْ؟»

¹⁴جَاوِبْتُو: «يَا سِيدِي، إِنْتِ تَعْرِفْ.» قَالِّي: «هَاذُومَا الِّي خَرْجُوا مِالمِحْنَة العْظِيمَة، غَسْلُوا الجْبَايِبْ مْتَاعْهُمْ وْرَدُّوهُمْ بِيضْ بْدَمْ الخَرُوفْ.

¹⁵هَاذَاكَا عْلاَشْ هُومَا قُدَّامْ عَرْشْ اللهْ وْيِعْبْدُوا فِيهْ لِيلْ وِنْهَارْ فِي الهَيْكِلْ مْتَاعُو، وِلِّي قَاعِدْ عْلَى العَرْشْ يِحْمِيهُمْ فِي وُسْطْ خِيمْتُو،

¹⁶مَا عَادُوشْ بَاشْ يْجُوعُوا وْمَا عَادُوشْ بَاشْ يَعْطْشُوا وْمَا عَادِشْ بَاشْ تَضْرِبْهُمْ لاَ شَمْسْ وْلاَ سْخَانَة

¹⁷عْلَى خَاطِرْ الخَرُوفْ الِّي فِي وُسْطْ العَرْشْ يِتْلْهَى بِيهُمْ وِيْهِزّْهُمْ لِعْيُونْ مْتَاعْ مَاء حَيْ، وِالله بَاشْ يِمْسَحْ كُلْ دَمْعَة مِنْ عِينِيهُمْ.»