Read Tunisian Arabic New Testament الرُّؤْيَا 8 Bible Online

الرُّؤْيَا 8 - Tunisian Arabic New Testament bible

الرُّؤْيَا 8

¹كِحَلْ الخَرُوفْ الخَاتِمْ السَّابِعْ، بْقَاتْ السْمَاءْ سَاكْتَة قْرِيبْ نُصْفْ سَاعَة.

²شُفْتْ المْلاَيْكَة السَّبْعَة الِّي وَاقْفِينْ قُدَّامْ اللهْ، وْتِعْطَاوْلْهُمْ سَبْعَة أَبْوَاقْ.

³وْجَا مَلاَكْ آخَرْ هَازْ كَانُونْ ذْهَبْ وِوْقُفْ بِحْذَا المَذْبِحْ، وْتِعْطَالُو بَرْشَة بْخُورْ بَاشْ يْقَدّْمُو مْعَ الصَّلَوَاتْ مْتَاعْ القِدِّيسِينْ الكُلْهُمْ عْلَى مَذْبَحْ الذْهَبْ قُدَّامْ العَرْشْ.

⁴وِطْلَعْ الدُّخَّانْ مْتَاعْ البْخُورْ وِالصَّلَوَاتْ مْتَاعْ القِدِّيسِينْ مِنْ يِدْ المَلاَكْ قُدَّامْ اللهْ

⁵وِمْبَاعِدْ هَزْ المَلاَكْ كَانُونْ البْخُورْ وْعَبَّاهْ بِالجْمَرْ مِالمَذْبَحْ وِرْمَاهْ فِي الأَرْضْ، وْوُقْعُتْ رْعُودْ وْأَصْوَاتْ وِبْرُوقْ وِزْلاَزِلْ.

⁶وِالمْلاَيْكَة السَّبْعَة الِّي عِنْدْهُمْ الأَبْوَاقْ السَّبْعَة حَضّْرُوا رْوَاحْهُمْ بَاشْ يْنَادِيوْ بِالأَبْوَاقْ الِّي هَازِّينْهُمْ.

⁷نَادَى المَلاَكْ الأُوِّلْ بِالبُوقْ وِهْبَطْ تَبْرُورِي وْنَارْ مْخَلّْطِينْ بِالدَّمْ عْلَى الأَرْضْ، وْتِحْرَقْ ثْلُثْ الأَرْضْ وِثْلُثْ الشَّجَرْ وِالحْشِيشْ الأَخْضَرْ الكُلُّو.

⁸وْنَادَى المَلاَكْ الثَّانِي بِالبُوقْ مْتَاعُو، وْحَاجَة كِيفْ جْبَلْ كْبِيرْ شَاعِلْ طَاحِتْ فِي البْحَرْ، وِثْلُثْ البْحَرْ وَلَّى دَمْ،

⁹وْمَاتْ ثْلُثْ المَخْلُوقَاتْ الحَيَّة الِّي تْعِيشْ فِي البْحَرْ، وِتْكَسّْرِتْ ثْلُثْ السُّفُنْ.

¹⁰وْنَادَى المَلاَكْ الثَّالِثْ بِالبُوقْ مْتَاعُو، وْهَبَطْ كَوْكَبْ كْبِيرْ مِالسْمَاءْ شَاعِلْ كِيفْ الفْنَارْ، طَاحْ عْلَى ثْلُثْ الوِدْيَانْ وِعْلَى عْيُونْ المَاء.

¹¹الْكَوْكِبْ إِسْمُو «الدِّفْلَة.» وِثْلُثْ المَاء وَلَّى مُرْ، وْبَرْشَة نَاسْ مَاتُوا كِشَرْبُوا مِالمَاء عْلَى خَاطْرُو وَلَّى مُرْ.

¹²وِالمَلاَكْ الرَّابِعْ نَادَى بِالبُوقْ مْتَاعُو، وْتِضْرَبْ ثْلُثْ الشَّمْسْ وِثْلُثْ القَمْرَة وِثْلُثْ النْجُومْ حَتَّى لِينْ الثْلُثْ مْتَاعْهُمْ ظْلاَمْ، وِثْلُثْ النْهَارْ ظْلاَمْ وِثْلُثْ اللِّيلْ زَادَا.

¹³وْشُفْتْ وِسْمَعْتْ نِسْرْ طَايِرْ فِي قَلْبْ السْمَاءْ يْصِيحْ بْصُوتْ عَالِي: «يَا وِيلْهُمْ! يَا وِيلْهُمْ! يَا وِيلْهُمْ! الِّي سَاكْنِينْ فِي الأَرْضْ مِالثْلاَثَة أَبْوَاقْ الِّي مَا زَالُوا عِنْدْ المْلاَيْكَة الثْلاَثَة، رَاهُمْ قْرِيبْ يْنَادِيوْ بِيهُمْ.»