Read Tunisian Arabic New Testament الرُّؤْيَا 9 Bible Online

الرُّؤْيَا 9 - Tunisian Arabic New Testament bible

الرُّؤْيَا 9

¹نَادَى المَلاَكْ الخَامِسْ بِالبُوقْ مْتَاعُو، وْشُفْتْ كَوْكَبْ طَايِحْ مِالسْمَاءْ لِلأَرْضْ وْتِعْطَالْو المِفْتَاحْ مْتَاعْ حُفْرِةْ الهَاوْيَة.

²تْحَلِّتْ الحُفْرَة مْتَاعْ الهَاوْيَة، وِطْلَعْ مِنْهَا دُخَّانْ كِيفْ دُخَّانْ مْتَاعْ حْرِيقَة كْبِيرَة، وِالسْمَاءْ وِالجَّوْ ظْلاَمُوا مِالدُّخَّانْ مْتَاعْ الحُفْرَة.

³وِخْرَجْ مِالدُّخَّانْ جْرَادْ وْغَطَّى الأَرْضْ، وْتِعْطَاتْلُو سُلْطَة كِيفْ سُلْطِةْ عْقَارِبْ الأَرْضْ،

⁴وِتْقَالُّو إِنُّو مَا يْضُرِّشْ الحْشِيشْ مْتَاعْ الأَرْضْ وِلاَّ أَيْ حَاجَة خَضْرَاء وِلاَّ شَجْرَة، آمَا يْضُرْ النَّاسْ الِّي مَا عِنْدْهُمْشْ الخَاتِمْ مْتَاعْ اللهْ عْلَى جْبِينْهُمْ.

⁵وْقَالُولُو إِنُّو مَا يُقْتُلْهُمْشْ، آمَا يْعَذِّبْهُمْ خَمْسَة شْهُرْ عْذَابْ كِيفْ قَرْصَانْ العْقَارِبْ.

⁶وْفِي النْهَارَاتْ هَاذُوكُمْ النَّاسْ بَاشْ يُطْلْبُوا المُوتْ، وْمَا هُمْشْ بَاشْ يَلْقَاوْهَا مَهْمَا عَمْلُوا، وْبِشْ يِشْتْهَاوْ بَاشْ يْمُوتُوا وِالمُوتْ بَاشْ تُهْرُبْ مِنْهُمْ.

⁷وِالجْرَادْ يُظْهُرْ كَإِنُّو حْصُنَّة حَاضْرَة بَاشْ تْحَارِبْ، فُوقْ رُوسْهُمْ حَاجَة تِشْبِهْ لْتِيجَانْ ذْهَبْ وِوْجُوهْهُمْ كِيفْ وْجُوهْ البَشَرْ،

⁸عِنْدْهُمْ شْعَرْ كِشْعَرْ النْسَاء وْسِنِّيهُمْ كِسِنِّينْ الصْيُودَا،

⁹وِالدْرُوعْ الِّي عْلَى سْدُورَاتْهُمْ كِيفْ دْرُوعْ الحْدِيدْ، وِالحِسْ مْتَاعْ جْنَاوِحْهُمْ كِيفْ حِسْ بَرْشَة كْوَالِيسْ وِحْصُنَّة مَاشِينْ لِلحَرْبْ،

¹⁰وْعَنْدْهُمْ ذْيَالْ كِيفْ أَذْيَالْ العْقَارِبْ، وْعَنْدْهُمْ شُوكْ فِي آخِرْ ذْيَالْهُمْ، وْعَنْدْهُمْ سُلْطَة بَاشْ يْضُرُّوا النَّاسْ لْمُدِّةْ خَمْسَة شْهُرْ،

¹¹وْعَنْدْهُمْ مَلِكْ هُوَ مَلاَكْ الهَاوْيَة وْإِسْمُو بِالعِبْرِيَّة أَبَدُّونْ وْبِاليُونَانِي أَبُولِّيُونْ.

¹²مْشَى الوِيلْ الأُوِّلْ وِيْجِيوْ وِيلِينْ أُخْرِينْ بَعْدُو.

¹³وْنَادَى المَلاَكْ السَّادِسْ بِالبُوقْ مْتَاعُو، وِسْمَعْتْ صُوتْ خَارِجْ مِالأَرْبْعَة قْرُونْ مْتَاعْ مَذْبَحْ الذْهَبْ الِّي قُدَّامْ اللهْ.

¹⁴وْقَالْ لِلمَلاَكْ السَّادِسْ الِّي عَنْدُو البُوقْ: «سَيِّبْ الأَرْبْعَة مْلاَيْكَة الِّي مَرْبُوطِينْ فِي نَهْرْ الفُرَاتْ!»

¹⁵وِتْسَيّْبُوا المْلاَيْكَة الأَرْبْعَة الِّي كَانُوا مْحَضّْرِينْ رْوَاحْهُمْ لِلسَّاعَة وِاليُومْ وِالشْهَرْ وِالعَامْ بَاشْ يُقْتْلُوا ثْلُثْ البَشَرْ.

¹⁶وِسْمَعْتْ الِّي عْدَدْ الخَيَّالَة كَانْ مِيتِينْ مَلْيُونْ.

¹⁷وْهَكَّا شُفْتْ الحْصُنَّة فِي الرُّؤْيَا، وِالخَيَّالَة مْتَاعْهُمْ الِّي كَانِتْ عِنْدْهُمْ دْرُوعْ عْلَى سْدُورَاتْهُمْ لُونْهَا كِيفْ لُونْ النَّارْ وِاليَاقُوتْ الأَزْرِقْ وِالكِبْرِيتْ وِالحْصُنَّة رْيُوسْهَا كِيفْ رْيُوسْ الصْيُودَا وْخَارْجَة مِنْ فُمّْهَا النَّارْ وِالدُّخَّانْ وِالكِبْرِيتْ

¹⁸وِثْلُثْ النَّاسْ قَتْلُوهُمْ المْصَايِبْ الثْلاَثَة هَاذُومَا، بِالنَّارْ وِالدُّخَّانْ وِالكِبْرِيتْ الِّي يُخْرُجْ مِنْ افَّامْ الحْصُنَّة.

¹⁹وِالقُوَّة مْتَاعْ الحْصُنَّة فِي افَّامْهُمْ وْفِي ذْيَالْهُمْ. وِذْيَالْهُمْ كِيفْ الحْنَاشْ وْعَنْدْهُمْ رُوسْ يْضُرُّوا بِيهُمْ.

²⁰وِبْقِيِّةْ البَشَرْ الِّي مَا قَتْلُوهُمْشْ المْصَايِبْ هَاذُومَا، مَا تَابُوشْ مِنْ عْمَايِلْ يْدِيهُمْ وْلاَ بَطّْلُوا مِنْ عِبَادَة الشْوَاطِنْ وِصْنَبْ الذْهَبْ وِالفِضَّة وِالنْحَاسْ وِالحْجَرْ وِاللُّوحْ الِّي هِيَ لاَ تْنَجِّمْ تْشُوفْ وِلاَّ تِسْمَعْ وِلاَّ تِمْشِي،

²¹وْلاَ تَابُوا لاَ عْلَى القَتْلْ وْلاَ عْلَى السِّحْرْ وْلاَ الزْنَى وْلاَ السِّرْقَة.