Read Tupuri 2 SAMYEL 2 Bible Online

2 SAMYEL 2 - Tupuri bible

2 SAMYEL 2

¹Blam feçeçre sen wo mono, Dafid raw wii jag Manwur gano: Ndi mbi nen woge äi leege po yoo ma ti sir Judan wo yawla? Manwur kal ferge ne hen ga: Wo mbo. Dafid day gano: Ndi woge na gen la? Manwur fer ne hen ga: Wo Hebroñ.

²Dafid raw woge ni de naare äe ma äogn wo ga wo diñ Ahinowam ma Jisreyel wo de Abigayel waçy mani Nabal je Karmeln mono.

³Dafid hoo jar maga hay wo see äe ni wo wer äe lay, wosela äuy de jar ni äe wo. Saara kal lagge de tiñ äi leege ma ti sir ma Hebroñn wo.

⁴Jar Judan raw wo age, kaa wo noo ne hen ti day hayn wo go wañ ti jar ni Juda wo. AÀ raw wii Dafid ga jar Yabes ma ti sir Galaad tee wo Sawul we go.

⁵Dafid kal laa jar wo see jar Yabes ma ti sir Galaad wo ma riñ rage gano: Daga Manwur mo kañ bosa' wee ti werga nday joñ de el se kayn see Sawul wañ äay no, day nday teen go mono.

⁶Patalam no, daga Manwur mo joñ de el see äay ti ngeel äe keëed lay. Ndi de see äi, ndi joñ ge nday yañ de el lay wer maga nday joñ fen se kayn mono.

⁷Daga do äay mo hay ciñ kay, ko wee see äay do werpiiri wo nono. Sawul wañ äayn hu go day jar ni Juda kaa wo noo me ti day hay wo ndi go wañ äaara.

⁸Abner, je ni Nern wañ sode mani Sawuln wo kal baa Is-Bosed je ni Sawul no, cegaë go de äe Mahanayim.

⁹AÈ raw hayge äe ti sir Galaad, ti jar Asurid wo, ti Jisreyele, ti Efrayim, ti Benjame day go ti Israyel äuy.

¹⁰Kiñgi Is-Bosed je ni Sawuln hay do naa ti wur maga se kol wañ mono. Se joñ kiñgi ti wañ äoge. Jar ni Juda hay wo äaaran de sa' see äaara see Dafid ane.

¹¹Naw maga Dafid joñ wañ ti jar ni Juda wo äi leege Hebroñ tay äuy kiñgi renam de few ti hiira'a.

¹²Abner je ni Nern wo de weere joçoçre mani Is-Bosed je ni Sawuln laa wo le go Mahanayim, kañ wo ti äaaran wo ne Gabawoñ ti.

¹³Jowab je ni Seruyan wo de weere joçoçre mani Dafidn kal wo hoo seele lay. Saara wo yiñgi jag man gloñ ma Gabawoñ no. Saara lag de kañ nen ne kaçaçra ti ta' ta'a, jar la wo go faale äañla lay, jar la wo äañla lay.

¹⁴Abner raw wii Jowab gana: Daga weere joçoçren mo hoo wo day mo ngaä wo jag pel naa la. Jowab kal yiñ jag ga: A mo hoo wo mbaara go ciñ.

¹⁵Saara kal hooge, see wo ne kaçaçra ti, jar hwal ti äog wer jar Benjame wo de Is-Bosed je ni Sawuln lay, hwal ti äog wer weere joçoçre mani Dafidn wo lay.

¹⁶Wosela äuy ëaw ti je hee äe no day tuñn de moslam yoo. Saara hu go jag kaçaçra ta' boñ äuy. AÀ raw ëe ngeel se ma Gabawoñ ni ga Helkat-Hatsurim.

¹⁷Jawn kal joñge go ti wur sen ni ëawa, weere joçoçre mani Dafidn äum wo Abner wo de jar Israyel wo.

¹⁸Jowabe, Abisay wo de Asayel jar ni Seruya ma swa'n hay wo wur sen ni. Äaale Asayel hay wo deparday do baryam ma yoofi nono.

¹⁹Se raw ur ëee wer Abner de deele bay go caage ti äañ war wa lay, go ti äañ guur gaa lay.

²⁰Abner raw mbuë nen äe day gano: Na diñ ndo Asayel yawla? Se kal ferge ga: AÀ diñ ndi mbi.

²¹Abner raw wiigi äe gano: Caa go ti äañ war noga ti äañ guuri, baa yoo weere joçoçre wo mo ti' boñ ni ndo yaçaç feçeçre äen wo. AÀma Asayel la dayge mañ äil go see äe gaè.

²²Abner day wii Asayel gano: Mañ äil wo go see äi. Wer mayse ga do äi raw go mo, day ndi taw mo go la? Ndi mañ ge nen äi ko hen äo Jowab ge na koge la?

²³Ama Asayel la dayge go mañ äil see äe gaè. Mo so no Abner raw so'ge äe de manjaw äili, jag manjawn kal wo go faale. Se le' ti ngeel ni, kal hugi go. Jar maga aà wo go dayge ti ngeel maga Asayel le' go de huli ni mokay kal wo tawge ni tu.

²⁴Jowab wo de Abisay kal wo mañ blam Abner niigi. Wur wo go le'ge gesiñ mokay de maga saara day go ti coçoç huuli ma Ama maga pel Giya ti faage maga le' wo ti puuli ma Gabawoñ mono.

²⁵Jar ni Benjame raw wo tay see äaara wer Abner, tay wo go see kaçaçra doälog ta'a, day wo wo lagge ti tipeçeçge huuli po.

²⁶Abner kal ëe Jowab day gano: Moslamn joñ ge mbe tum car jar so yawla? Ndo bay de koge ga aà äo' ge ti go diñ de lawge wa yawla? Ndo gor ge na hun ëa so ga ndo wii jarn ga aà mo nii wo heçeçre äaaran wo wa so mo la?

²⁷Jowab kal ferge gano: Baa yañ mbe tenene! Ndo de waçaç waçaçre we la gaa no, jarn de men wo durgi na de jag toñ, wosela de hay mbe nii hen äen ëa.

²⁸Jowab raw 'waa coçoç, day jarn äuy kal wo lagge. Saara men nii Israyel wo lay. Men wo durgin lay.

²⁹Abner wo de jar äen na wo ti seele poëag äil Araba no. Saara kal cegaë Jurdeçeç go, caa wo Bitron wo go, wo wo go Mahanayim.

³⁰Jowab men nii Abner le go mokay raw tay jarn le äuy. Jar gwa' go yoo weere joçoçre mani Dafid wo hwal ti kaawa'a, lan diñ Asayele.

³¹Ama jar mani Dafid ii wo jar kiskis swa' wer jar Benjame wo de Abnere.

³²Saara kal mañ huli Asayel le, raw wo teege äe wo go ti tipale mani pan äen go Betlehem. Jowab wo de jar äen na wo ti seele poëage, saara wo laage Hebroñ de maga ngeel mañ le go mono.