Read Tupuri NEHEMI 1 Bible Online

NEHEMI 1 - Tupuri bible

NEHEMI 1

¹Waçaçre Nehemi je ni Hakaliya no. Nen few Kislef nen kiñgi ma de do äog maga Artagserses ti wañ mono, ndi hay Suse äi leege ma kluu no.

²Hanani, diñ jobo yoo heçeçre äin wo de jar po wo mbag raw wo a ge le ti sir Juda. Ndi raw wii jag äaara ti jar Jwif maga hay yaçaç wo le go jag dañgay day gwa' wo mono, ti Jerusalem lay.

³Saara kal ferge ne ndi gano: Jar maga yaçaç wo le go jag dañgayn yañ mbaara wo ti prog ma Judan ni, aà wo nen ree ma kluu, soçoçre go de wuu ti ne hara lay. Kor ma ti Jerusalem go de nduë ywaale, day jag tiñn wo go de roëge de wuu lay.

⁴De maga ndi laa waçaçre sen wo mono, ndi raw hayge gesiñ, ndi ra, day ndi raw joñ naw pur nen lawge. Ndi raw heçeç bii, ndi raw tosge pel Baa ma ciñ no.

⁵Ndi day gano: O Manwuri, Baa ma ciñ no, Baa ma kluu maga aè nen heçeç moge mono, ndo maga ndo oo ti tayge jagge day ndo ko decoo jar maga da wo ndo day ëaw wo jag liñgi äon wo mono!

⁶Daga ndo mo co'o sugi, day nen äo mo bul wo go ma yiñ jag ti tosge mani weejoçoç äo no. Ndi tos patala pel äo de suñ lay, de ceeg lay ti jar Israyel weere joçoçre äon wo, ndi de wii fuggi äil ti älagge jar Israyeln wo, ti älagge wuur maga wuur joñ ra see äo mono, wuur de jar ni äi wuur hay joñ älagge.

⁷Cwaçy, wuur joñ fen ma bay ngar go see äo, day wuur hoo sug ti jag liñgi äon wo gaa, ti waçaçre ma de yergen wo de jag liñgi ma äod faage waçaçre maga ndo hay haç ra ne Moyis weejoçoç äon wo mo gaa lay.

⁸Fer ëig ti ti waçaçre maga ndo hay yern go ne Moyis weejoçoç äon mono, ndo hay waçaç ne wuur gano: Hayga nday see wee de deele gaa no, ndi dus gi nday yañ wo go yoo wer jar wo ra.

⁹Ama, hayga nday fer we le see äi, nday ëaw jag liñgi äin wo we, day nday joñ joñre we de äaara no, ko nday mo hay ba wo go de welge ti jag sir tawge yaw, ndi tay ge ti äay yañ le ni, day ndi fer yañ le de äay ti ngeel maga ndi hay ban ma ra ëu äi ni mono.

¹⁰Jar Israyel wo diñ weere joçoçre äo, aà wo diñ jar mani äo maga ndo hay yaçaç ra le go de eegre äo ma debañ no, de do äo ma de eegren mono.

¹¹O Wañkluu, co' mbo sug laa tosge mani weejoçoç äon wo de weere joçoçre äo maga da wo heçeç ëu äon mono! Joñ wara ga weejoçoç äon mo sii ti, day joñ mbo ga aà mo coo jag blo seno. Ndi hay diñ je gus reege mani wañ no.